Ejekel 32
32
Ta mad dɔ Paraõt kɨ Ejipt ɓaitɔ
1Ɓal kɨkɨlah gidaijoo kɨ nah kɨkɨlah gidaijoo kɨ ndɔ kɨ dasabang lo nah'n non ye, ta lo Bɨraɓe ɗe romt an:
2Ngon de,
i toi pa nõ kɨdɔ Paraõt,
ngar kɨ Ejipt, ela an:
I oo roi tit tubo be ku girrdegt
na i tit mar kam bahbogt.
I la ko pũ kam bahgt loi
i ɓul man kɨ njai ad ɓu
na bahg lod telɨn kɨyerr.
3Titbe kel Bɨraɓe Luwah:
M'a m'la band lom dɔit nat kɨ deg
koosɨg ngãibe
m'a m'ɔrri kɨtɨga kɨ band lom,
4m'a m'lai ningt,
m'a m'lai ko kam gawgt,
m'a mad yelg tube ɗen udɨn dɔit,
m'a mad dãg kɨdɔningt kɨtaagbe
ndanɨn kɨ dai,
5m'a m'la dai dɔ mbalbogt,
m'a mad nini ɗoosɨ hollog,
6m'a mad mosi nun ningt tit man be
mbã kɨdɔ mbalbogt
na ɗobman'g a ɗoosɨn sei.
7Lon m'tɔl horr loi ye
m'a m'ut takum dɔrã,
m'a mad kɨmẽg diwɨn til,
m'a mad kilndii ut kum kad,
nah a unj al,
8M'a mad kunjg kɨdɔrãt
tube di bin til dɔit,
m'a m'la til dɔ dɔningt loi,
kel Bɨraɓe Luwah.
9M'a mad ta oon kam deg ngãibe
lon m'aw sei ɓert ku girrdegt
kam dɔninggt ĩgɨn i gerd kete al.
10M'a m'nda deg koosɨg ɓoolt kɨtatɔi,
ngarg lod kɨngasa a gad kɨtatɔi lon
m'ye kiyaɗɔɔ lom nõdt na dekɨɗen
kudɨt, roa a ndad kɨta ndɨ kɨdɔ dõ loa do ndɔ sot loi.
11Kɨtɔ titbe kel Bɨraɓe Luwah: Kiyaɗɔɔ lo ngar kɨ Babilon a ɗe dɔit. 12Kɨtakul nyakatg lo deg kɨ ngang la m'a mad koosɨ deg loi son ĩn tube ĩn deg kɨkootɓool ku girrdegt. A tujɨn dɔngang lo Ejipt na koosɨ deg loa tube a nujɨn kɔ. 13M'a m'tɔl nyakulg loa tube kɨ kad man bogt, nja de a ɔd'd al, ngotinja dãg a yeed al tɔ, 14kamla m'a mad mang lod ton nding, m'a mad bahg lod nũn tit yib be, kel Bɨraɓe Luwah. 15Lon mad dɔning Ejipt tel gootɓe, na tirɨn nyag tube kamt pur lon m'nda deg tube'n ndɨnt, kamla a gerɨn ta kad mĩ Bɨraɓe. 16Ĩ non la i pa nõ kɨ kad ɔsɨn ngan kɨdẽg lo girrdeg a tɔin na, a tɔin pa nõ'n non kɨdɔ Ejipt't kɨ koosɨg loa tube, kel Bɨraɓe Luwah.
17Bal kɨkɨlah gidaijoo kɨ nah kɨdasa kɨ ndɔ kɨkɨlah gidaimi lo nah'n non ye, ta lo Bɨraɓe ɗe romt an: 18Ngon de, i ud ɓi kɨdɔ koosɨgt kɨ Ejipt na ɔsɨ lad kɨ ber, in kɨ ngan kɨdẽg lo girrdeg kɨ ngetɔko, kam lot kɨwo girr dɔningt kɨro ĩgɨtɨn ɗisɨn kam holɓet. 19Nõ i tɔia kɨ majkoo a? I ɗisɨ, i to ber nat kɨ ngejagajalg. 20A son ku degt ĩgɨn oin koi kiyaɗɔɔ na koosɨg loa a ton sia nat. 21Kɨrãɗɔɔg kɨngang a elɨna ta ko kam lot kɨ Koo nat kɨ ngeɗased, anan: Ɗisɨn woi na ton sir kɨkanj kɔdɨn rod, ngejagajalg ĩgɨn oin koi kiyaɗɔɔ. 22Asiri i nu nat kɨ koosɨg loa tube, dɔɓadg lod gugɨn dɔa. Tɔlɨnd tube, oin koi kiyaɗɔɔ. 23Dɔɓadg lod ĩn dɔngoi lot kɨ kam holɓet na koosɨg loa lan na gugɨn dɔɓada. Tɔlɨnd tube na oin koi kiyaɗɔɔ, ĩgɨn adɨn ɓool ɗa ngendɨ kɨdodõ kam dɔningt. 24Elam i nõ nat kɨ koosɨg loa tube gugɨn dɔɓada. Tɔlɨnd tube, oin koi kiyaɗɔɔ. Ngéjagajalg ĩgɨn ɗisɨn kam lot kɨwo girr dɔningt, ĩgɨn adɨn ɓool ɗa ngendɨ kɨdodõ kam dɔningt na awɨn kɨ rosɔl lod nat kɨ ĩgɨn hã ɗisɨn kam holɓet. 25Ndan tɨra toa ku ngékoigt nat kɨ koosɨg loa tube na dɔɓadg lod gugɨn dɔa. Tube ĩn ngéjagajalg ĩgɨn oin koi kiyaɗɔɔ kɨta adɨn ɓool ɗa ngéndɨ kɨdɔ dõ kam dɔningt, mbool dã ku ngékoigt. 26Mesek kɨ Tubal ĩn nõ kɨ koosɨg lod na dɔɓadg lod gugɨn dɔd, tube ĩn ngejagajalg ĩgɨn oin koi kiyaɗɔɔ kɨta adɨn ɓool ɗa ngendɨ kɨ dɔ dõ kam dɔningt. 27Ton nat kɨ kɨrãɗɔɔg kɨ son maɗi al ĩgɨn awɨn kam lot kɨ Koo kɨ nyakatg lod ĩgɨn lan dɔd girr kiyaɗɔɔgt lod, ĩgɨn derg lod in dɔ kɨngadt kɨtɔ in nyakootɓool kɨ ro ngéndɨ kɨdɔdõ kam dɔningt. 28Ã, a dudɨnd rumrum na a i to ku ngéjagajalgt nat kɨ ĩgɨn oin koi kiyaɗɔɔ. 29Edom i nõ, ngarg loa kɨ mbaiɓeg loa tube, ke ĩn kɨrãɗɔɔg kaa, mbool dã nat kɨ ĩgɨn oin koi kiyaɗɔɔ. Ton nat kɨ ngéjagajalg'n awɨn kam holɓet. 30Mbaiɓeg kɨ dɔning kɨjigel ĩn nõ tube kɨ Sidõiag tube ĩgɨn awɨn kɨ rosɔl nat kɨ ngékoig kɨta adɨn deg ɓoolɨn ngãi kɨtakul tɔg lod. Ton kɨkanj jagaj nat kɨ ĩgɨn oin koi kiyaɗɔɔ na awɨn kɨ rosɔl lod nat kɨ ĩgɨn ɗisɨn kam holɓet. 31Paraõ a ood na kama a sɔl kɨta deg koosɨg lon, Paraõ kɨ ngéɗɔɔg loa tube, ĩgɨn oin koi kiyaɗɔɔ, kel Bɨraɓe Luwah, 32kɨtɔ ad ɓool ɗa ngéndɨ kɨdodõ kam dɔningt. Kɨtɔ 'nten a to ku ngéjagajalgt nat kɨ ĩgɨn oin koi kiyaɗɔɔ, Paraõ kɨ koosɨg loa tube. Titbe kel Bɨraɓe Luwah.
Currently Selected:
Ejekel 32: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
