Ejekel 31
31
Terrtag dɔ kag sedɨrt kɨ Libã
1Bal kɨkɨlah gidaikɨɗa kɨ nah kɨkõmɨta kɨ ndɔ kɨdasabang lo nah'n non ye, ta lo Bɨraɓe ɗe romt an: 2Ngon de, el Paraõ, ngar kɨ Ejipt, kɨ koosɨg loa an: Nõ i ta'na sia kɨ bo loi a? 3Oo i tana kɨ sedɨr kɨ Libã. Dɔjiag ĩn kɨmaj, mbia lana durur, kadroa ngal puwuw, tasoma aw mbã ɔd kilndii, 4man ada tɔg maj, ɓulman ada ngal kɨ dõ bahg nũn gugɨn dɔ in hɔnat, ngan bahg nũn girr kaggt tube kɨ mut. 5Titbe kadroa ngal tɔi ndeg kagg tube kam mut, to bajin ngãi, dɔjiag alɨn kɨkete kete kɨtakul man kɨngãi takõnat. 6Yelg kɨ dõ tube lan ngod dɔjiagt dãg kɨmut tube oojɨn ngang girat, girrdeg kɨbobo tube hɔn londɨ ndilat. 7Majkooa i ngãi kɨtakul boa kɨ do jiag kɨ ngal kɨta ngɨra i kam mant kɨngãi. 8Kedreg kam ndɔɔt lo Luwah tɔina baji sipresg asɨna sia al, kag platan'g kaa asɨna kɨ dɔjiag al, kag mad kam ndɔɔt lo Luwah kɨ majkooa tit sia goto. 9M'tela kɨmaj kɨtakul dɔjiag kɨ ngam, kagg tube kɨ Eden, kam ndɔɔt lo Luwah, nin sia. 10Kɨtɔ 'nten, titbe, kel Bɨraɓe Luwah: Tit'n tɔi dõ kɨ dõ kɨ ta ngalɨn mbã tasoma ɔd kilndii ad dɔa sir kɨta ngala. 11M'a m'laa ji de kɨ ngetɔg dɔ girrdegt na a ɗa sia kɨgo majalt loa. M'tuɓaa ko. 12Nyakorg, girrdeg kɨ ngeɗanya kɨlo ngetɔgt tɔi deg tube a gana, nyana kɔ. Dɔjiag a tuson dɔ mbalbogt kɨ kam hollogt tube. Bajiag a tetɨn, tuson kam hol lo nun mangt tube kɨdɔningt, deg tube kɨdɔningt a ɔrrɨn rod ndilat, nyana do. 13Yelg kɨ dõ tube a hɔn londɨ gootat kɨtuj nõ na dãg kɨmut tube a ndin dɔ dɔjiagt. 14Ɗan titbe kɨtakad kagg kɨ ɗan kad mangt, kad rod ngalɨn gog al, tasomd ɔdɨn metɨr ndɨ gog al tɔ. Ɗan titbe kɨtakad kagg kɨ ngekãi man a ndan kamd dɔ ngal det al kɨta land tube kɔit kam lot kɨwo girr dɔningt ku ngan degt nat kɨ ngeɗisɨ kɨ holɓet. 15Mĩ Bɨraɓe Luwah ta'n m'el laten: Ndɔt'n kag sedɨr a ɗisɨ aw kam lot kɨ Koo ye, m'a m'lamber hɔ ndo, m'a m'ut ta holɓe kɨtatɔa, m'a mad bahg kɨ man koosɨg duban, m'a mad Libã hɔ ndɔɔ kɨtoa, na kagg kɨmut tube a tutɨn kɨtatɔa. 16M'a mad girrdeg ndadɨn kɨtɔ kah soa kɨ so, lon m'ɔsa kɨ Koo nat kɨ ĩgɨn ndɨ ɗisɨn holɓet, na kagg tube kɨ Eden kɨ kagg kɨmajtɔi kɨ Libã tube, ĩgɨn ãin man ye, kamd a sɔl kam lot kɨwo girr dɔningt. 17In tɔ a ɗisɨn nat sia kam lot kɨ Koo kɨ ro ĩgɨtɨn oin koi kiyaɗɔɔ. Ã ĩgɨn ĩn jia, ngéndɨ ndilat ku girrdegt. 18Nõ titna sei, kɨ kɔsɨgon kɨ bo loi ku kaggt kɨ Eden a? A ɔsɨ lain kɔ nat kɨ kagg kɨ Eden kam lot kɨwo girr dɔningt, a i to dan ngéjagajalgt nat kɨ ĩgɨn oin koi kiyaɗɔɔ. Paraõ kɨ Koosɨg loa a ĩn titbe, kel Bɨraɓe Luwah.
Currently Selected:
Ejekel 31: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
