Ejekel 30
30
Tuj a so dɔ Ejipt't
1Ta lo Bɨraɓe'n elɨm an: 2Ngon de, elta kɨtamt na el an: Titbe kel Bɨraɓe Luwah; Udɨn wi anan: Beto lo ndɔ'n non. 3Kɨtɔ ndɔ ɗe nderbe, ndɔ lo Bɨraɓe ndɔt nderbe, i ndɔ kɨdiw til, a i kaglo lo girrdeg. 4Kiyaɗɔɔ a ɗe dɔ Ejipt't, kamkil a ɗa Etiopi lon deg'n tɔlɨnd tuson kam dɔning Ejipt't. A oin nyamajg loa ko na a tɔsɨn girag kɨber, ton. 5Etiopi kɨ Put kɨ Lud kɨ Arabi kɨtaagbe kɨ Kub kɨ deg kɨ dɔning kunkɔt a son ta kiyaɗɔɔt nat sed. 6Titbe kel Bɨraɓe: Ngendɨna Ejipt a son, tɔg dɔngang loa a tel kɨber ko Migdol mbã kɨ Siene, a son ta kiyaɗɔɔt kel Bɨraɓe Luwah. 7A tel gootɓe dan dɔninggt kɨ telɨn got ɓe, ɓebog loa a ĩn dan ɓebogt kɨ telɨn gootɓe. 8Kamla a gerɨn ta kad mĩ Bɨraɓe lon m'la horr dɔ Ejipt't na nge ɗasia nujɨn tube. 9Ndɔt'n non ngombangkɨlag a ɓain kokɨromt, a awɨn kam toogt kɨ n'ndan Etiopiag ɓoolt dɔ ndilomt lod. Kamkɔl a ɗe dɔdt dɔ ndɔ gangtat lo Ejipt kɨtɔ oo nyag 'nten ndɨ ɗen. 10Titbe kel Bɨraɓe Luwah: M'a mad koosɨg kɨ Ejipt goton kɨtakul ji Nebukadnesar, ngar kɨ Babilon. 11Ĩ kɨ deg loa, girrdeg kɨ ngeɗa nya kɨlo ngetɔgt tɔi deg tube. A ɗen sed kad nujɨn dɔning, a ɔrrɨn kiyaɗɔɔg lod ndoorɨn ne Ejipt kad dɔning ɗoosɨ kɨ nin. 12M'a mad bahg tutɨn kurum, m'a m'la dɔning ji degt kɨmajal, m'a m'nuj dɔning kɨ nyag tube kɨ kamt kɨtakul ji mbahg. Mĩ Bɨraɓe m'elta. 13Titbe kel Bɨraɓe Luwah: M'a m'nuj yog, m'a mad ɓakumta nyag kɨtɔsɨ goton Nopt. Mbaiɓe a i dɔning Ejipt't gog al ta, m'a m'nda ɓool kam dɔning Ejipt't. 14M'a mad Patros tel gootɓe, m'a m'la horr dɔ Soant, m'a m'gangta dɔ Not. 15M'a m'ũ wong lom kɨdɔ Sint in i tɔg Ejipt, m'a m'nuj koosɨg kɨ Nõ kɔ. 16M'a m'la horr dɔ Ejipt't, Sin kɨ kamkɔl kɨbobe, a tetɨn Nõ kɨningt, madngétag a son dɔ Nopt dan kada. 17Basag kɨ oon kɨ Piteen Beset a son ta kiyaɗɔɔt, ngendɨ kamt tube a awɨn ɓert. 18Kad a diw til kam ɓebot kɨ Takpanes lon m'tet tɔg kõɓe lo Ejipt kɔ. Tɔg dɔngang loa a goto kamat, kilndii a ut dɔa na ngana kɨdẽ a awɨn ɓert. 19Titbe tɔ la m'a m'gangɨn ta do Ejipt't, kamla a gerɨn ta kad mĩ Bɨraɓe.
20Bal kɨkɨlah gidaikɨɗa kɨ nah kɨdasa kɨ ndɔ kɨkõtanãimɨta lo nah'n non ye, ta lo Bɨraɓe ɗe romt an: 21Ngon de, m'tet ji Paraõ, ngar kɨ Ejipt, na oo, lan kɨ'n dɔt al, dɔ kɨ band kad yoot al na ɓeta ngang ad hɔn nyakat. 22Kɨtɔ 'nten, titbe kel Bɨraɓe Luwah: Oo, m'ndoor Paraõ, ngar kɨ Ejipt, m'a m'tet jia, jia kɨ lapia ho kɨ jia kɨ tet kete nõ ho, m'a mad nyakat so jiat kɔ. 23M'a m'tɨnda Ejiptiag m'tĩd ku girrdegt, m'a m'tuɓad kɨ dɔninggt kɨ dang dang. 24M'a mad ji ngar kɨ Babilon ngang, m'a m'la kiyaɗɔɔ lom jiat, m'a m'tet Paraõ na a ton ɗusɨɗusɨ nõat tit de'n ngah dó kɨ tee koi. 25M'a mad ji ngar kɨ Babilon ngang na ji Paraõ a so, kamla a gerɨn ta kad mĩ Bɨraɓe. Lon m'la kiyaɗɔɔ lom ji ngart kɨ Babilon a tura ndoorɨn dɔning Ejipt, 26na m'a m'tɨnda Ejiptiag m'tĩd ku girrdegt, m'a m'tuɓad kɨ dɔningt kɨ dang dang na a gerɨn ta kad mĩ Bɨraɓe.
Currently Selected:
Ejekel 30: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
