Ejekel 29
29
Ta kɨ dɔ Ejipt't
1Bal kɨkɨlah kɨ nah kɨkɨlah kɨ ndɔ kɨkɨlah gidaijoo lo nah'n non ye, ta lo Bɨraɓe ɗe romt an: 2Ngon de, i turta kumi kɨro Paraõt, ngar kɨ Ejipt, na elta kɨtamt dɔat kɨ dɔ Ejiptiagt tube, 3el an: Titbe kel Bɨraɓe Luwah; Oo, m'ndoori, Paraõ ngar kɨ Ejipt, mar kɨbobe kɨ to kam bahgt loi in el an: Bah lom i lom kɨkɔsɨdɔm mĩ la m'ɗaa ye. 4M'a m'la kui girr ngangit, m'a mad kanjg kɨ bahgt loi tĩnyan dɔ ngɔit, m'a m'ɔrri kam bahgt loi kɨtɨga nat kɨ kanjg tube kɨ bahgt loi ĩgɨn tĩyan na kɨ ngɔi. 5M'a m'lai kɔ kam dɨlalot nat kɨ kanjg tube kɨ bahgt loi, a i so kam dɨlalot kɨmut, a kawɨna kɨnat al a dubɨn al tɔ m'teli nyasa dãg kɨ dɔningt kɨ yelg kɨ dõ. 6Kamla ngendɨ Ejipt't tube a gerɨn ta kad mĩ Bɨraɓe kɨta ĩn kagtɔsɨ kɨ i kadnya ndɨna ro lo ngékɨɓe lo Israel. 7Lon Israelag hoin kɨ jid a ne, i tet ad'd dɔ dɔbɔgdt, lon ndinan rod roit ye ad bodi ndad. 8Kɨtɔ 'nten, titbe kel Bɨraɓe Luwah: M'a mad kiyaɗɔɔ so dɔit, m'a m'tɔl deg kɨ dang kamit. 9Na dɔning Ejipt a tel gotɓe kɨ lo kɨ de gotot na a gerɨn ta kad mĩ Bɨraɓe kɨta Paraõ el kete an: Bah i lom, mĩ la m'ɗaa ye. 10Kɨtɔ 'nten, oo, m'ndoori, ĩn kɨ bahg loi, na m'a mad dɔning Ejipt tel lo kɨ de gotot kɨ gotɓe ko Migdol mbã kɨ Siyene kɨ ɗobnin dɔning Etiopi. 11De mad kɨ nda njant goto, dan kɨ tɔit goto, a to be kɨkanj de ndit ɓal dɔsɔɔ. 12M'a mad dɔning Ejipt tel gootɓe dan dɔninggt kɨ tel in gotɓe, m'a mad ɓebog loa telɨn gootɓe ku ɓebogt kɨ telɨn gootɓe ɓal dɔsɔɔ, m'a m'tɨnda Ejiptiag m'tĩd ku girrdegt, m'a m'tuɓad ko kad tĩn na kɨgo dɔninggt kɨ dang dang. 13Titbe kel Bɨraɓe Luwah: Do ngoi ɓal kɨdɔsɔɔ a ne, m'a m'kaw Ejiptiag kɨnat ku girrdegt ĩgɨn tɨnda tĩd tit. 14M'a m'tel kɨ Ejiptiag ɓeɓert, m'a m'ɔrrd m'ɗe sed dɔning Patros kam dɔningt lod kɨ oojɨnd tit na a telɨn kõɓe kɨtan. 15Ejiptiag a telɨn kõɓe kɨdu toi kõɓeg tube, a tɔi dõ kɨ dɔ girrdegt kɨ dang dang gog al ta na m'a m'ad'd telɨn nya kɨdu tẽbe kad õnɓe do girrdegt gog al. 16Ngekɨɓe lo Israel a ɓan kul Ejipt gog al na a gan kamd do ɗagootalt loa lon telɨn kɨroat. Kamla a gerɨn ta kad mĩ la mĩ Bɨraɓe Luwah ye.
17Ɓal kɨdɔjoo gidaitanaimɨta kɨ nah kɨdasa kɨ ndɔ kɨdasa lo nah'n non ye, ta lo Bɨraɓe ɗe romt an: 18Ngon de, Nebukadnesar ngar kɨ Babilon ad ngéɗɔɔg lon ɗan kɨla kɨ kõ ngãibe ndoorɨn ne Tir. Dɔd tube ngɔ, dɔ bɔgd tube tɔrr njɔtnjɔt, bekaa ngar'n non ke ɓut ngéɗɔɔg loa ngahn nyabaji kam ɓebot kɨ Tir, kɨtɔ kɨla lod'n ɗan nõ al. 19Kɨtɔ 'nten, titbe kel Bɨraɓe Luwah: Oo, m'ndɨ mad dɔning Ejipt ji Nebukadnesar, ngar kɨ Babilon. A oi nyamajg loa, a oi nyatetɗɔɔ loa, a tir nyag loa pur, a i nyabaji ɓut ngéɗɔɔg loa. 20M'ada dɔning Ejipt nyabaji kɨla kɨ kõ in ɗa ndoorɨn Tir kɨta ɗan kɨla admɨn, kel Bɨraɓe Luwah. 21Ndɔt'n non m'a mad ngetɔg ɓai dan ngékɨɓet lo Israel, na ĩ taa, m'a m'tee tai dandt na a gerɨn ta kad mĩ Bɨraɓe.
Currently Selected:
Ejekel 29: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
