Ejekel 28
28
Dɔngang lo Tir kɨ tuj loa
1Ta lo Bɨraɓe'n elɨmt ɓaitɔ an: 2Ngon de, el mbaiɓe kɨ Tir an: Titbe kel Bɨraɓe Luwah: Dɔi sir ad i el an: Mĩ Luwah, m'ndɨ dɔ pong ndɨ luwahgt ngawdan bahbogt. Be kaa ĩn Luwah al. Ĩn de na i oo roi nge terrt tit Luwah be. 3Rota, terr loi tɔi terr lo Daniel, nya mad kɨyarɔ roit goto. 4Kɨtakul terr loi kɨ goosɨ loi la i ngahn nyamajg, i mbõ nar ɔr kɨ nar arjã kam kuj ngom nyamajgt loi. 5Kɨtakul goosɨ ɗa gat loi kɨbobe ad nyangahg loi bɨlan kɨdɔtdɔt na dɔi sir kɨta nyamajg loi. 6Kɨtɔ 'nten la Bɨraɓe Luwah elɨn an: I oo roi ngeterrt tit Luwah be. 7Kɨtɔ 'nten, oo, m'a mad mbahg ɗen dɔit kɨ ro, deg kɨkootɓool kɨtɔi ku girrdegt a tɔrrɨn kiyaɗɔɔg lod ndoorɨn ne terr loi kɨbobe, a yerrɨn kɨ majkooi. 8A ɔsɨ lain kam lot kɨ Koo, a i oi tit deg'n tɔlɨnd ngawdan bahbot. 9A i elta kɨ ngeto lig an: Mĩ Luwah a? Kɨtɔ ĩ de ji ngetɔligt koon, ĩn Luwah al. 10A i woi koi lo ngejagajalg ji mbahgt kɨ to mĩ, m'elta, kel Bɨraɓe Luwah.
11Ta lo Bɨraɓe'n elɨmt gog tɔ an: 12Ngon de, i toi pa nõ kɨdɔ ngart kɨ Tir, ela an: Titbe kel Bɨraɓe Luwah: Ĩn kɨɗoosɨ kɨ terr kɨ majkooi kɨ kasɨnatap, 13maɗi ĩn kam Edent, ndɔɔ lo Luwah, medkɔsɨ kɨɗen kɨ gata i ngãi I nyakutdɔ roi, sardoin kɨ mbal topaj kɨ diamãt, krisolit kɨ oniks kɨ jaspɨ, sapir kɨ eskarboukle kɨ emerod, kɨ ɗand kɨ nar ɔr, Ĩn kɨ ɗa oi dɔ ndɔt'n ndaih'nt nu. 14M'uri kad ĩn Kerub kɨ ngengomlo, m'ndai dɔ mbalbot kɨjaɓat lo Luwah, i ndia ku mbalgt kɨ ngekõhorr. 15Ĩn kɨkasɨnatap kam kɨlaɗaigt do ndɔt kɨ ndaih mbã ndɔ in ngahn ɗagootal kamit. 16Kɨtakul gatkɨɗa loi kɨngãi la kami ɓan kot kɨ nyaɗa kɨlo nge tɔgt na i ɗa majal. Kɨtɔ 'nten m'ɔsɨ m'lain kɔ dɔ mbalbot lo Luwah. Ah serub kɨ ngengomlo, m'tuɓai kɔ ku mbalgt kɨ ngékõhorr. 17Dɔi sir kɨta majkooi, i nuj terr loi kɨ ta tɔko loi m'ɔsɨ m'lai ningt, m'ndai tɨga do nõ ngargt kad nɔlɨn. 18Kɨtakul ɗagootalg loi kɨngãi, kɨ gatkɨɗa loi kɨgoɗobat al la i yerrɨn kɨ log loi kɨjaɓat. Kɨtɔ 'nten mad horr tee kamit õi mugɨj, m'teli buhoort takum degt tube kɨ dɔningt, ĩgɨn ndɨ nɔlɨn. 19Tubeg'n gerɨn ku girrdegt ye, kɨngasa gad kɨtatɔi. I tel nya kɨkootɓool na a i goto kɨ nõt.
Ta kɨdɔ Sidõt
20Ta lo Bɨraɓe'n elɨmt an: 21Ngon de, i turta kumi kɨdɔ Sidõt na elta kɨtamt dɔat, 22el an: Titbe kel Bɨraɓe Luwah; Ah Sidõ, m'ndoori. M'a m'ngaa tɔko kamit na a gerɨn ta kad mĩ Bɨraɓe. M'a m'gangta dɔat, m'a m'tee kɨ kunjɨm kɨɗangeɗeng kamat. 23M'a m'la kɨ yokoosɨ kamat kɨ mosɨ dɔ ɗobgt loa, ngengahdog a so oin kamat kɨta kiyaɗɔɔ kɨ a ɗe dɔat ko lo kɨɗen, kamla a gerɨn ta kad mĩ Bɨraɓe. 24Kon mad kɨ a ɔsɨ ngékɨɓe lo Israel goto, ke ngár kɨ til ro de goto to ku degt tube kɨ gugɨn dɔa na kɨ dĩa. Kamla a gerɨn ta kad mĩ Bɨraɓe Luwah. 25Titbe kel Bɨraɓe Luwah: Lon m'a m'kaw ngekɨɓe lo Israel kɨ nat ku girrdegt kɨ dang dang, lot'n han tĩn na tit, na m'tee kɨ kunjɨm kɨɗangeɗeng takum girrdegt, kamla a ndɨn kam dɔningt lod in mad ɓer lom Jakob. 26A ndɨnt kɨ lapia, a ɗan kujg, a hɔn ndɔɔ nduug. A ndɨnt kɨ lapia lon m'gangta dɔ degt tube kɨ gugɨn dɔd, ĩgɨn kidɨnd, kamla a gerɨn ta kad mĩ Bɨraɓe Luwah lod.
Currently Selected:
Ejekel 28: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
