Ejekel 26
26
Ta kɨdɔ Tirt
1Ɓal kɨ kõkɨlah gidaikɨɗa, ndɔ kɨdasa lo nah, ta lo Bɨraɓe ɗe romt an: 2Ngon de, Tir elta dɔ Jerusalemt an: Oiyo, mersi, tabit lo girrdeg tet, deg turɨn rosɨ kɨromt, m'a m'ɗoosɨ kɨta Jerusalem tel gotɓe. 3Kɨtɔ 'nten, titbe kel Bɨraɓe Luwah: Oo Tir, m'ndoori. M'a mad girrdeg koosɨg ɓain ndoorɨn tit hã hul bahbo ɓain be. 4A nujɨn tabit lo Tir, a tetɨn kuj ngomlog loa. M'a m'kusɨ bua ko, m'a m'tela mbal kɨ to dɨla kari. 5A tel lo naj bandbɨrag dan bahbot kɨta m'elta, kel Bɨraɓe Luwah. A i nyatetɗɔɔ lo girrdeg. 6Ngan kɨdẽg kɨ dɔningt loa, a tujɨnd kɨ kiyaɗɔɔ. Kamla a gerɨn ta kad mĩ Bɨraɓe.
7Kɨto titbe kel Bɨraɓe Luwah: Oon, m'a mad Nebukadnesar, ngar kɨ Babilon, ngar lo ngarg, ɓai kojigel, a ɗe kɨ sɨndag kɨ pusɨɗɔɔg kɨ nge kalsɨndag kɨ koosɨ ngéɗɔɔ ngãibe kɨ do Tirt. 8A tɔl ngéndɨ ngan ɓegt kɨ dɔning loi kɨ kiyaɗɔɔ, a la ndogbɔrr gugɨn dɔi, a ũ ning dɔnat ndoorɨn, a ɔsɨn derg tanat, utɨn ne dɔd ndoorɨn 9A nda gindkagg to tabit lon ndoorɨn ne tabitg loi, a ga kuj ngomlog loi tet kɨ kɨngag lon. 10Sɨndag lod a in ngãi, bu njad a ut dɔi, ndogbɔrrg loi a yeen kɨta kah ngékalsɨndag kɨ pusɨg kɨ pusɨɗɔɔg lon a andɨn ta tabitgt loi tit'n deg a andɨn ne kam ɓebogt kɨ burrolog kɨ to ye be. 11A ɓa dɔ ɗobg loi tube mbujmbuj kɨ gotnja sɨndag lon, a tɔl deg loi kɨ kiyaɗɔɔ, a tet pilieg loi kɨngangngang. 12A ɔin nyangahg loi, a tirɨn nyagatg loi pur lo tetɗɔɔt, a tɔsɨn ndogbɔrrg loi tetɨn, a tɔsɨn kujg kɨmajmaj loi tɨlan, a ũn mbalg kɨ kagg loi mbã kɨ buning loi to kam ɓahbot. 13M'a mad ndi pag loi goto, a oon dɔ kah ndi kɨ ndeg loi gog al ta. 14M'a m'adi tel mbal kɨ todɨla kari, a in lo naj band bɨrag, a tel ɗain gog al bat, kɨta mĩ Bɨraɓe m'elta, kel Bɨraɓe Luwah. 15Titbe Bɨraɓe Luwah elta kɨ Tir an: Doorlog a yeen yɨkɨtyɨkɨt lon oon kah so loi, lon ngéngahdog tõn ɗusɨɗusɨ, lon tɔlɨn deg ngãibe kamit al e? 16Mbaiɓeg kɨ bahbot tube a ɗisɨn dɔ pong kõɓet lod, a tɔrrɨn kubg lod, a tɔrrɨn kubg lod kɨkɔsɨ desẽ dɔt rodt kɔ, a lan rondad rodt a ndɨn ningt. Kɨngasa a gad kanj nya ta, ta a yad biw kɨtatɔi. 17A tɔin pa non kɨdɔit, a elɨn anan: Titbãi i nuj. Ĩn londɨ deg koosɨg kɨ ngenda do bahbot, ĩn ɓebo kɨ ngetɔko kɨ ngetɔg dɔ bahbot, ĩn kɨ ngéndɨ kamit ĩgɨn adɨn ɓool ɗa deg tube kɨ ndin ta bahbot. 18Tajigla doorlog yeen dɔ ndɔ sot loi, doorlog kɨ dan bahbot rod ndad yatata kɨta goto loi. 19Kɨtɔ titbe kel Bɨraɓe Luwah: Lon m'a m'adi tel gotɓe tit ɓebog ĩgɨn nge ndit goton, lon m'a m'ɗe kɨ man kɨ wo kɨbing kɨdɔit na bahbo a ut dɔi, 20kamla m'a m'ɔsɨ m'lai nat kɨ ĩgɨn hã ɗisɨn kam holɓet kɨro degt kɨ maɗi, m'a m'ndai kam lot kɨwo girr dɔningt, kam lot kɨtuj kete nu nat kɨ ngeɗisɨ kɨ koo kɨtɔkad deg hɔn londɨ karnit gog al kad i ngah lo kam dɔningt lo ngékumkajɨrg al tɔ. 21M'a m'teli nyakootɓool. A i goto. Ke sahin kaa ne, a oin gog al bat, kel Bɨraɓe Luwah.
Currently Selected:
Ejekel 26: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
