Ejekel 24
24
Terrtag dɔ jo ndirr nyat
1Bal kɨjikɨɗa kɨ nah kɨkɨlah kɨ ndɔ kɨkɨlah lo nah'n non ye, ta lo Bɨraɓe ɗe romt an: 2Ngon de, i ndang to ndɔ kɨɓone, ndɔ kɨɓone'n ɗan. Ngar kɨ Babilon ɗe nderbe kɨ Jerusalem kam ndɔt kɨɓone'n ɗan. 3I el terrta kɨ ngekɨɓe'n ɗan kɨ ngétaaɗɔɔ, eld an: Titbe kel Bɨraɓe Luwah: I nda jo dɔ horrt, i nda dɔt, i mbel man kamt. 4Ɔi dã kɨ gangɨn dogɨrdogɨr ro kamt, gaja kɨmajmaj tube, bɨnga kɨ bɔga, i ɗoosɨ kɨ kɨngag kɨkɔt. 5I kɔtdã kɨmaj tɔi kam ɓut't na i la kir girr jot'n non ad ndirr maj, ad gaj dã ndirr maj kɨ kɨngag edɨn maj ho.
6Kɨtɔ 'nten, titbe kel Bɨraɓe Luwah: Beto lo ɓebo kɨ ngekũ mosɨ kɔ jo ĩn nõ nãi tit na ɔrr kamt kɔ al. I ɔi gaj dã kɨ kamt tube kɨkanj kɔt. 7Kɨtɔ mosɨ kɨ ũ ko nõ i kamat ũ mosɨn non kɔ dɔ mbalt kɨ todɨla kari, ũ ningt kɨtakad bu ut dɔa al. 8Kɨtɔkad wong lom kɨtɔlsɔkɨr bai na kad m'nda ngɨra la, m'ũ mosa kɔ dɔ mbalt kɨ todɨla kari kad ut dɔa al. 9Kɨtɔ 'nten, titbe kel Bɨraɓe Luwah: Beto lo ɓebo kɨ ngekũ mosɨ kɔ. Mĩ tɔ, m'a m'kaw kir kɨ nat ngãibe. 10I kaw kir kɨdɔat, i la horrt, i ndirr dan maj, i la kat't ad horr oon kɨngag. 11Goot gog i nda jo kɨ kama kari dɔ yalhorrt ad tɨnga ngãi kɨtakad ningakasɨ loa õn horr na kɨta kad yɨro kɨ kamt yẽ na horr õ nõa kɔ. 12M'ɔrr rɔkɨ kari kɨndang; titbe kaa nõa non ɔr al ke kɨ horr. 13Nõa i yerrkɨɗa loi. Tit'n m'ndig tugoi, na i ar al ye, a ĩn kɨkar dɔ yerrt loi al mbã m'tɔl kon wong lom kɨtɔlsɔkɨr dɔit kamtã. 14Mĩ Bɨraɓe m'elta 'nten a ɗa nya, m'a m'ɗa ho. M'a m'nya al, m'a m'oo kum tondo ke m'a m'mbel kom al tɔ. M'a m'gangta dɔit kɨgo ɗobt loi kɨ kɨ go kɨlaɗait, kel Bɨraɓe Luwah.
Koi nẽ Ejekel
15Ta lo Bɨraɓe'n elɨmt an:
16Ngon de, oo m'a m'un nya kɨmaj ngãi takumit kɨtakul koi kɨ tee pat. A i ud ɓi kɨtaa al, a i hɔ ndɔa al, mankumi a so al tɔ. 17I tõ ɗusɨɗusɨ tai mbo, ot hɔndo kɨta ngekoi, ot sanya lo deg.
18M'el deg ta kɨsĩ na lokɨsɔle nẽm oi, loti kɨsĩ m'ɗa nya'n ndam mbera. 19Kamla deg elɨmɨn anan: A i ɔrrj girr nya'n ɗa nya kɨtaj kɨ nya'n i ɗa ale? 20M'turd m'an: Ta lo Bɨraɓe'n elɨmt an: El titbe. 21El ngékɨɓe lo Israel an: Titbe kel Bɨraɓe Luwah: Oon, m'a m'yerr kɨ lo lom kɨjaɓat, tɔgsɨ kɨlo gaburot, nyag kɨmaj ngãi takumsɨt, nyatar losɨ, na ngansɨg kɨdɨngã kɨ kɨdẽ ĩgɨn i a son ta kiyaɗɔɔt. 22A ɗan tit'n m'ɗan. A i utɨn dɔ ndartasɨ al, a i san nya lo ngehɔ ndo al. 23Kadmulg losɨ a ĩn dɔsɨt kɨ sag losɨ nyasɨt, a i hɔn ndo al, a i nõn al. Rosɨ a lo haw kɨta ɗagootal losɨ, a i tõn ɗusɨɗusɨ kusɨt. 24Ejekel a i nyakɔj kɨtasɨ, nyag tube ĩgɨn ɗa, a i ɗan titbe tɔ. Lon ɗa nya titbe a ne, a i gerɨn ta kad mĩ Bɨraɓe Luwah.
25Na ĩ, ngon de, dɔ ndɔt'n m'a m'ɔrr tɔgd ko, ronel kɨ tɔko lod, nyag kɨmaj ngãi takum det kɨ nyatar lod, ngandg kɨdɨngã kɨ kɨdẽ. 26Ndɔt'n non ngekãi mad a ɗe roit, a ɔrr hoia mbiit. 27Ndɔt'n non tai a tee kad i elta kɨ ngekãi, a i ndɨ tai mbo al, a ĩn nya kɔj kɨrodt na a gerɨn ta kad mĩ la mĩ Bɨraɓe ye.
Currently Selected:
Ejekel 24: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
