Ejekel 23
23
Kayakɨɗa lo Ohola kɨ Oholiba
1Ta lo Bɨraɓe tel ɗe romt gog an: 2Ngon de, maɗi dekɨdẽg jo ĩn nõ, kondi i kɨɗa. 3Ɗan kaya kam Ejipt't, ɗan kaya kaglot in hã ĩn ne kɨ dud ɓaitɔ. Nu la hɔn mbaadi, nu to la momɨn ta mbaad kaglo mand'dt. 4Tɔ ngonderr i Ohola, tɔ ngongoa i Oholiba. Ĩn lom na oojɨn ngan kɨdɨngãg kɨ kɨdẽg. Taa ne, Ohola i Samari, Oholiba i Jerusalem. 5Ohola ɗa kaya lon i lom na nyur oona kɨta ngeɗasia kaya, kɨta madɓea Asiriag, 6ngela kub kɨkil musɨmusɨ, ngekõɓeg kɨ mbaiɓeg, tube ĩn basag kɨmaj kɨ ngekelta kɨmajmaj, ngekalsɨndag. 7Ɗà sed kaya, kɨkɔt dan dekɨdɨngãgt kɨ Asiri tube, ad in kɨɓe kɨ dɔn yerr kɨ ron, kɨ yog lod tube'n nyur oona kɨtɔd. 8Nya go kaya lon kɨ ɗa Ejipt't al kɨta deg ɓin sia lon ĩ kɨdu ɓaitɔ, momɨn ta mbaa kaglo manda na ũn nyurkõ lod kɨdɔat. 9Kɨtɔ 'nten m'laan ji ngé ɗasia kayat kɨ ji Asiriagt ĩgɨn nyur õd kɨtɔd. 10Ngĩn nyakutdɔ roa kɔ, oin ngana kɨdɨngã kɨ kɨdẽ na in kɨdɔa, tɔlɨna kɨ kiyaɗɔɔ. Adɨna tel nge tɔko ku dekɨdẽgt kɨta gangɨn ta dɔat. 11Oholiba, ngonkõa kɨdẽ, oo nya 'nten na tɔi Ohola kɨyerrkɨɗa lon. Nyurkõ lo Oholiba kɨ kayakɨɗa loa tɔi kɨlo ngonkõa. 12Nyur õd kɨta Asiriag, ngekõɓeg kɨ mbaiɓeg, ngela kub parhand kɨtaagbe, nge kalsɨndag, tube ĩn basag kɨmaj kɨ ngekelta kɨmajmaj. 13M'oa i kɨyerr, ĩn tujoo unɨn ɗob kɨkɨɗa 14na Oholiba aw kɨ ketekete kam kayat lon. Oo ɓakumta dekɨdɨngãg kɨ jand kad bɔrt, ɓakumta Kaldeag kɨ ɗand kɨ nduba 15kɨ dɔ ɓod kɨ ndar na lan kadmul kɨ ɓala i dang dang dɔdt. Kodi tube tit'n kɨ ngarg be, ɗana kɨ Babiloniag ĩgɨn lo koojd i dɔning Kalde. 16Lon Oholiba ood ye, nyur õa kɨtad na la ngombangkɨlag godt Kaldet. 17Babiloniag awɨn roat kam tɨra kayat na yerrɨn sia kɨlo nyurkõt lod na got'n yerr ron sed woi ye, gangɨn na sed. 18Ɔj kayakɨɗa lon kɨtɨga wang, ngĩn nya kut dɔ ron kɔ na mĩ ta, rom gangɨn na sia tit'n m'gangɨn na kɨ ngon kona ye be. 19Na ɗa kaya kɨdɔtdɔt, ga do mandɨnt lon ɗan kaya kam dɔning Ejipt't. 20Nyur õd kɨta ngeɗasia kaya ĩgɨn nya lod i tit kɨlo korrog be na mandi i tit man sɨndag be. 21Titbe i gah dɔ kayakɨɗat loi kɨ mandɨt nu lon Ejiptiag momɨn ne ta mbaai kaglo kɨ ĩn kɨ dui ɓaitɔ.
Takɨgang kɨdɔ Ohola kɨ Oholiba
22Oo Oholiba, kɨta 'nten, titbe kel Bɨraɓe Luwah: Oo, m'a m'sɨla ngeɗasei kaya kad ndoorɨn ĩgɨn i gangɨn na sed na m'a m'ɗe sed ko lot kɨɗen ndoorɨn.
23Babiloniag kɨ Kaldeag tube, deg kɨ Pekod kɨ Soa kɨ Koa kɨ Asiriag tube nat sed. Ĩn basag kɨ ngekelta kɨmajmaj, tube ĩn ngekõɓeg kɨ mbaiɓeg, pajag kɨ ngeɗɔɔg tube ĩn ngékalsɨndag. 24A ɗen ɗɔɔ dɔit ko kɨjigel kɨ pusɨɗɔɔg kɨ pusɨ sɨndag kɨ deg koosɨg, a gugɨn dɔi kɨ derdɔg kɨ derg kɨ jɔg ɗɔɔg. M'a m'la takɨgang jidt, a gangɨn ta dɔit kɨgo mberkɨndat lod. 25M'a m'ɗa sei jàng na ĩgɨn non oon tɔ a ɗan sei wong kɨtɔl sɔkɨr, a jan kɔi kɨ mbii, na ndeg deg loi kɨnãi a son ta kiyaɗɔɔt. A hɔn ngani kɨdɨngãg kɨ kɨdẽg na ndeg deg loi kɨnãi, horr a õd mugɨj. 26A ngĩn kub loi tube roit kɔ, a tɔrrɨn nyaparero loi kɨ i ndɨn roit.
27Titbe m'a mad yerrkɨɗa loi ɔsɨ ngoi kɨ kayakɨɗa loi kɨ i ɗen dɔning Ejipt't. A i ur kumi kɨdɔ Ejiptiagt al, a i gah dɔdt gog al tɔ ho. 28Kɨtɔ titbe kel Bɨraɓe Luwah: Oo, m'a m'lai ji ĩgɨtɨn i ɔsɨd ta, ji degt ĩgɨn i gangɨn na sed. 29A ɗan sei nya kɨlo kɔsɨtat, a oin kand kɨlaɗai tube na a nyain kɨ roi kari kɨkanj kub. A teen kɨ rosɔl kayakɨɗa loi kɨtɨga wang, yerrkɨɗa loi kɨ kayakɨɗa loi tujoo. 30A ɗan sei nyag'n non kɨta i aw ro girrdegt, i ɗa sed kaya na i yerr kɨ roi kɨ yog lod. 31I un ɗob lo ngonkõi na m'la kop loa jiit. 32Titbe kel Bɨraɓe Luwah: A i ãi kam kopt lo ngonkõi, kop kɨ kama ur, taa tat ho. A i tel nya godɔt kɨ nyakid kɨta kop ɗoosɨ taptap. 33Kasɨ a ɗai, a i ba kot kɨ kamkil. I kop rondad kɨ tuj, i kop lo ngonkõi Samari. 34A i ãi kam kopt'n non mbã tɨga, a i ton kama langɨmlangɨm, a i til mbaai huthut kɨta m'elta, kel Bɨraɓe Luwah. 35Kɨtɔ 'nten, titbe kel Bɨraɓe Luwah: Kami oi dɔmt, na i lam kɔ gidit ye, kɨta 'nten a i to nya ba yerrkɨɗa kɨ kayakɨɗa loi. 36Bɨraɓe elɨm an: Ngon de, a i gangta dɔ Oholat kɨ Oholiba a? Maj, i eld ta tɔ wakɨsɨ dɔ kɨlaɗadt kɨyerr. 37Kɨtɔ ɗan kaya na mosɨ i jidt, hɔn nama'n kɨ yog lod mbã ngang ĩgɨn oojɨnd admɨn ye kaa, land kadkari nyasa adɨnd. 38Oo nya'n ɗan sem ɓaitɔ: Kam ndɔt kɨkɨɗa nõ yerrɨn kɨ lo lom kɨjaɓat, tujɨn ndɔ taakòg lom ho. 39Goot'n tɔlɨn nga ndig adɨn yog lod, kam ndɔt kɨkɨɗa nõ awɨn kam kujt lom kɨjaɓat kad yerrɨn ne. Oo, ɗan titbe kam kujt lom. 40Kɨtɔi 'nten, lan go de kɨdɨngãgt ko sãi kad ɗen, lan ngombangkɨla godt kad ɗen. Kɨtatɔd la i ndog man, i tɔr bel dɔ kumit, i pare roi kɨ nyaparero. 41I ndɨ dɔ tɨrat kɨmaj dum, i nda tabɨl nõat na i nda nõkag lom kɨkootmbĩ kɨ yib lom dɔt. 42Oon dɔ ndi deg koosɨg kɨ ngeɗaronel nat sia. Ɗen kɨ deg kɨpapa kɨ ngékasɨɗag ko kam dɨlalot ĩgɨn lan ngan ningag ji de kɨdẽgt kɨ kadmulg kɨmaj ngãi dɔdt. 43Kamla m'el m'an: Dekɨdẽg kɨ bɨgan a ɗan ngaw kɨ ɗan kaya kɨ deg kɨ titbe ɓai a? 44Na ɗen rodt tit in hã awɨn ne ro kaya dekɨdẽgt, titbe la awɨn ne ro Oholat kɨ Oholiba, dekɨdẽg kɨ ngeyerr kɨ rod. 45Na deg kɨdenesew a gangɨn ta dɔdt tit'n a gangɨn ne ta dɔ dekɨdẽgt kɨ ngeɗa ngaw, na tit'n a gangɨn ne ta dɔ dekɨdẽgt kɨ nge kũ mosɨ kɔ, kɨta ĩn ngehɔmaru na mosɨ i jidt. 46Kɨtɔ titbe kel Bɨraɓe Luwah: M'a mad koosɨ deg awɨn kɨ dɔdt ndoorɨnd na m'a m'lad jidt kad ndand mboolt na turɨnd pur tɔ. 47Koosɨ deg'n non a tɨland kɨ mbal kɨ gand kɨ kiyaɗɔɔ, a tɔlɨn ngandg kɨ dɨngã kɨ kɨdẽ, a lan horr kujg lod. 48Titbe la m'a mad yerrkɨɗa goto kam dɔningt, a ug elɨn dekɨdẽg tube kad ndajɨn yerrkɨɗa losɨ al. 49A adɨn yerrkɨɗa losɨ tel so dɔsɨt, a i ton nyaba majal lo yokɨnda losɨ na a i gerɨn mĩ la mĩ Bɨraɓe Luwah ye.
Currently Selected:
Ejekel 23: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
