Ejekel 22
22
Majalkɨɗa lo Israel
1Ta lo Bɨraɓe elmɨn an:
2In ngon de, a i gangta, a i gang ta dɔ ɓebot kɨ ngekũ mosɨ kɔ a? Ɔja ada ger kɨlaɗaag kɨyerr tube.
3A i el an: Titbe kel Bɨraɓe Luwah; Ɓebo kɨ ngekũ mosɨ kɔ kamit, dɔkàd loi asɨ. Ɓebo kɨ ngeɗa yog kɨta roi kad i yerrɨn kɨ roi. 4Ĩ kɨ ta dɔit kɨta mosɨ kɨ ũ ko na i tel kɨyerr kɨta yog kɨ i ɗa. I ndɔt kɨ ndɔi nderbe na i tee do ngoi ɓalt loi. Kɨtɔ 'nten m'teli nya kɨ rosɔl kɨro girrdegt kɨ nya godɔt kɨro degt kɨ dɔningg tube 5Ĩgɨn ĩn nderbe kɨ ĩgɨn ĩn sãi a gon dɔit, in ɓebo kɨ tɔko loi tuj na i ɗoosɨ kɨ burɓukt.
6Oo, mbaiɓeg lo Israel ĩgɨn ndin kamit ũn mosɨ kɔ, dekɨɗen kɨgo tɔgɨnt. 7Kamit nõ deg kidin bɔw kɨ kon, kamit nõ dan kum mbah ndo, kamit to ɗan ngetɔg dɔ ngonhalt kɨ ngengawkoi. 8I kid nyag lom kɨjaɓat, i yerr kɨ ndɔ taakòg lom. 9Ngelata kɔ degt in ɓe loi kɨta kũ mosɨ kɔ, kamit nõ deg san nya dɔ mbalbogt, kamit to deg ɗan kayat. 10Kamit nõ deg ten dɔ ro kɨkari lo bɔwdg, kamit to deg bin kɨ dekɨdẽg kaglo'n mosɨ ɗad. 11Kamit nõ de mad to kɨ nẽ madɓen, kɨmad yerr kɨ mumɨn kɨdẽ, kɨmad to kɨ kõnan'n, ngon bɔwɨn kɨdẽ. 12Kamit nõ taan nya kutdɔta kɨta kũ mosɨ kɔ, i ta gira kɨ mana dɔt i ta man nya ji madɓeit kɨlo ngetɔgt na kami oi dɔmt, kel Bɨraɓe Luwah.
13Oo, kɨta 'nten m'nda jim kɨta nyangahdɔt kɨgoot al kɨ i ngah kɨ mosɨ kɨ kũ kɔ kamit. 14Kami a ɗa tɔg ɗà bijir ke jii a i kɨ tɔg kam ndɔgt ĩgɨn m'a m'ndoorɨn a? Mĩ Bɨraɓe, m'elta na m'a m'ɗa ho. 15M'a m'tɨndai m'tĩ kɔ ku girrdegt na m'a m'tĩ kɨ dɔningg kɨ dang dang, m'a m'bɔrr yerr loi kɨ kamit kɔ. 16Kamla a i tel nyakid takum girrdegt na a i gerɨn ta kad mĩ Bɨraɓe.
Wong lo Luwah a ɗe dɔ Israelt
17Ta lo Bɨraɓe ɗe romt an:
18Ngon de, ngékɨɓe lo Israel telɨn sĩ nar kɨromt, ĩn tube ĩn ninga kasɨ kɨ nyatĩya hand kɨ gind kɨ nar plomb kam nabt, tel kĩ nar. 19Kɨtɔ 'nten, titbe kel Bɨraɓe Luwah: Ĩn tube, i telɨn tit sĩ nar. Kɨtɔ 'nten oon, m'a m'kawsɨ kɨnat kam Jerusalemt. 20Tit'n a kawɨn ne nar arjã kɨ ningakasɨ kɨ gind kɨ nar plomb kɨ nyatĩya hand kam nabt na ɔsɨn ndub dɔt kad lẽ ye, titbe tɔ m'a m'kawsɨ kɨnat kam wongt lom, wong lom kɨtɔlsɔkɨr, m'a m'lasɨ kam nabt, m'lẽsɨ. 21M'a m'kawsɨ kɨnat na m'a m'tɔ horr wong lom kɨdɔsɨt kad i yẽn kam Jerusalemt. 22Tit in hã nar arjã lẽ'n kam nabt ye, titbe tɔ a i yẽn ne kamat na a i gerɨn ta kad mĩ Bɨraɓe la m'ũ wong lom kɨtɔlsɔkɨr dɔsɨt ye.
Takɨgang i dɔ Israelagt kɨ mbaiɓeg lod
23Ta lo Bɨraɓe'n elɨm an: 24Ngon de, ela an: Ĩn dɔning kɨ ar al, man ndii ed dɔit ndɔ wongt al. 25Mbaiɓeg loa ɔjɨn na ta gid tilt kamat tit'n tubo kɨ ngeko ndɨ tɔrr dan hɔn huthut, san ro deg, tan nyamajg kɨ nyag kɨ gatd I ngãi, adɨm nge ngawkoig loa ĩn koosɨg kamat. 26Ngejanyamosɨ loa tɔin dɔ mberkɨnda lom, yerrɨn kɨ nyag lom kɨjaɓat tɔrrɨn go nya kɨjaɓat kɨ nya kɨyerr al na ndoon deg kad ɔrrɨn go nya kɨ kar al kɨ nya kɨkar nat al, unɨn kumd kɔ dɔ ndɔ taakògt lom na yerrɨn kɨ tɔm kudt. 27Mbaiɓeg loa kɨ kamat ĩn tit biskolog kɨ ngetɔr dan hɔd hut hut, ũn mosɨ kɔ na nujɨn ro deg kɨtakad ngahn ne nyangahdɔt kɨ gootal. 28Ngekelta kɨta Luwaht loa ɗan horr rodt, oon nyakookamndilt kɨ ngom na elɨn tag kɨbal anan: Titbe kel Bɨraɓe Luwah. Na Bɨraɓe elta al. 29Deg kɨ dɔningt'n non ɗan nya kɨlo ngetɔgt, ɓoogɨn nya, dan kum ngendog kɨ kɨdangtg ndo, ɗan ngetɔg do mbahgt kɨkanj ta. 30M'sah de mad kɨɗa kudt'nhan a ɗa tabit kɨ dõ na a ɗa burrolot kɨtet nomt kɨtɔ maj lo dɔning kɨtakad m'tuja al na m'ngaa de al. 31Kɨtɔ 'nten m'ũ wong lom dɔdt, m'õd mugɨj kɨ horr wong lom kɨtɔlsɔkɨr, m'ɓad kɨgo ɗob kɨlaɗadt, kel Bɨraɓe Luwah.
Currently Selected:
Ejekel 22: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
