Ejekel 21

Terrtag dɔ kiyaɗɔɔt lo Bɨraɓe

1Ta lo Bɨraɓe'n elɨmt an: 2Ngon de, i teltakumi ko kɨjikõt na elta ndoorɨn lo kɨjikõ. I elta kɨtamt ndoorɨn dɔning ku kam lot kɨjikõ. 3A i el ku kɨ lot kɨjikõ, an: Oo dɔ ta lo Bɨraɓe. Titbe kel Bɨraɓe Luwah; M'a m'la horr kamit kad õ kag kɨmbool kɨɗen kamit kɨ kag kɨtut kɨɗen, ndõhorr 'nten kɨ kõ giling giling a oi al, nyag tube kɨ dɔningt a õ horr ko kɨjikõt mbã kɨ jigel. 4Na nya kumkajir kɨɗen a oo ta kad mĩ Bɨraɓe m'la horr na horr a oi al.

5Kamla m'el m'an: Ah Bɨraɓe Luwah, elɨn ta dɔmt anan, de'n non el terrtag koon ale?

6Ta lo Bɨraɓe'n elɨmt an: 7Ngon de, i teltakumi kɨdɔ Jerusalemt na elta ndoorɨn log kɨjaɓat. Elta kɨ tamt ndoorɨn dɔning Israel. 8A i el dɔning Israel an: Titbe kel Bɨraɓe: Oo m'ndoori. M'a m'ɔrr kiyaɗɔɔ lom kam hawat kad m'nujɨn de kɨdenesew kɨ de kɨmajal kamit kɔ. 9M'ge nuj de kɨdenesew kɨ de kɨ majal kamit ko, kɨta 'nten kiyaɗɔɔ lom a teen hawnt kad tɔl nya kumkajir kɨɗen ko kɨjikõt mbã kɨjigel, 10na nya kumkajir kɨɗen a ger ta kad mĩ Bɨraɓe m'ɔrr kiyaɗɔɔ lom kam hawat; a tel lat gog al. 11Kɨtɔ 'nten, in ngon de, i ton ɗusɨɗusɨ kɨ kam kɨ gang man. Ã i ton ɗusɨɗusɨ kɨ nõ kɨkatbang takumdt. 12A i titbe lon a elɨn anan: I ndɨ tõn ɗusɨɗusɨ kɨta ɗi a? A i el an: I kɨta hoita in ndɨ ɗe, na a ad kam dekɨɗen gang man, ji dekɨɗen a oi siw, ndil de kɨ ɗen a tee bolong na goj dekɨɗen a ndan na. Oo, ndɨ ɗe na a tɔlɨn kona, kel Bɨraɓe Luwah.

13Ta lo Bɨraɓe'n elɨmt an: 14Ngon de, i elta kɨtamt an: Titbe kel Bɨraɓe; kiyaɗɔɔ, kiyaɗɔɔ. Olin taa ada at pepep kɨ ndulo ngãingãi. 15Olin ta kiyaɗɔɔ kad tɔlɨn ne deg,

ndulo ngãi ngãi tit telndii.

J'a kɨ ɗa ronel lon elɨn anan:

Kagkõɓe lo ngomd kid kagg tube a?

16Titbe adɨn kiyaɗɔɔ 'nten

kad usɨn taa kɨtakad hɔnjidt,

i kiyaɗɔɔ kɨ kɔl taa at pepep

ndulo ngãi ngãi

kɨtakad lan ji det kɨ ngetɔldeg.

17I nõ na ud wi, ngon de,

kɨta ɔrrɨn kiyaɗɔɔ

ndoorɨn deg lom

kɨ ndoorɨn mbaiɓeg lo Israel tube.

Land ta kiyaɗɔɔt

nat kɨ deg lom.

Kɨtɔ 'nten i nda bingi.

18Ã, nan ndɨ ɗe nõ,

a tuj kagkõɓe kɨ ngedɔngang kɔ,

kel Bɨraɓe Luwah.

19Na ĩ, ngon de,

i elta kɨtamt, i nda jii.

Kɨ kiyaɗɔɔ ga nya nja joo,

ã, nja mɨta. I kiyaɗɔɔ tɔl deg,

i kiyaɗɔɔ tɔl deg ngãibe

in gug dɔd gej

20kɨtakad kamd gang man

na kad deg ngãibe son ta tabitgt lod.

M'ad'd kiyaɗɔɔ

kɨ ndulo ngãi ngãi

tit telndii be,

ɔlɨn taa kɨta tɔl deg.

21I ga ko kont kɨ ko gelt kɨ lo kɨɗen kɨ sumba ta kiyaɗɔɔ. 22Mĩ tɔ, m'a m'nda jim kad m'tɔl kon wong lom kɨtɔlsɔkɨr, mĩ Bɨraɓe la m'elta ye.

Ta kɨdɔ Jerusalemt kɨ ngar loa

23Ta lo Bɨraɓe'n elɨmt ɓaitɔ an: 24Ngon de, i ɔj ɗobg jo kad kiyaɗɔɔ lo ngar kɨ Babilon tɔit. Ĩn tujoo a ten ko kam dɔningt kɨ kɨɗabe I ɗa nya kojɗob, i nda ta ɗob kaw ɓebot. 25I ɔj ɗob kɨkɨɗa kad kiyaɗɔɔ awɨn Daba, ɓebo lo Amoniag, na kɨmad kɨtakad awɨn kam Judat kɨ Jerusalem ɓebo kɨngang. 26Kɨtɔ ngar kɨ Babilon a ɗa lo to ɗobt ta ɗobgt kɨjoo kɨta ndõ tee, ɗa ye kɨrãg yekɨyekɨ, ɗa ndɨje ta yo terapg, ɗa nɔl wur oo. 27Nya ndõ te kɨ ɔj dɔ Jerusalem i jikõat. Nu la a ndan gindkag to tabit, a ndan mber tɔl deg, a kunɨn deg kɨta ɗɔɔ, a ɗan go gindkagg sumba ta tabitg, a ũn ning dɔnat kad lan ndogbɔrr gugɨn dɔ. 28A i tit ndɔnte kɨngom kɨrodt ĩgɨn unɨn kɔd kɨ yokɨnda na ngar kɨ Babilon a ga kamɨn dɔ ɗagootalt lod kad hɔnd. 29Kɨtɔ 'nten, titbe kel Bɨraɓe Luwah: Adɨn kamsɨ gah dɔ ɗagootalt losɨ lon i teen ne dɔ tɔidɔtag losɨ kɨtɨga wang na i adɨnd gerɨn majalg losɨ kɨtakul nyaɗasɨ tube. Tit'n adɨn hangald tɔsɨ ndool dɔ nyagakamdɔt, titbe tɔ la a hɔsɨn ne kɨ jid ho ye.

30Na ĩ de kɨyerr kɨ kɨmajal, ĩn mbaiɓe lo Israel ndɔi asɨ, kaglo ɗagootal asɨ woi. 31Titbe kel Bɨraɓe Luwah: I ɔrr jɔg ngar kɨ kadmul'n ten kɔ. Nyag tube a mbelɨn, nya kɨdu a telɨna kɨbo na nya kɨbo, a telɨna kɨdu. 32M'a m'tuj, tuj, tuj. A goto mbã ngea ɗe, in takɨgang i loa, na m'a m'laa jiat.

33Na ĩn ngon de, i elta kɨtamt an: Titbe kel Bɨraɓe Luwah kɨdɔ Amoniagt kɨ kɨdɔ rosɔlt lod. I el an: Kiyaɗɔɔ, kiyaɗɔɔ i kɨkɔr, ɔlɨn taa at kɨta tɔl deg, ndulo ngãingãi tit telndii be. 34Na ndɨ elɨn ta nya kookamndilt kɨngom, ndɨ ndõn tee takɨbal. A i son dan nin ngéɗamajalgt ĩgɨn ndɔd asɨ, ndɔ gangta dɔdt asɨ woi. 35I la kiyaɗɔɔ hawat gog. M'a m'gangta dɔsɨt kam lot'n m'ndasɨ tit kɨ dɔningt'n oojsɨn tit tɔ. 36M'a m'ũ wong lom dɔsɨt, m'a m'tɔ horr wong lom kɨtɔlsɔkɨr dɔsɨt, m'a m'lasɨ ji degt kɨ ngérokat kãrɨr, ĩgɨn kɨlaɗad i tuj nya koon. 37Horr a õsɨ mugɨj, mosɨsɨ a ãi kam dɔningt, a gan dɔsɨt gog al ta, kɨta mĩ Bɨraɓe la m'elta ye.

Currently Selected:

Ejekel 21: MlL

Highlight

Copy

Compare