Ejekel 20
20
Luwah ga dɔ Israelt kɨ tɔidɔta loa
1Ɓal kɨkõtanãimɨta kɨ nah kɨkõmi kɨ ndɔ kɨkɨlah kam naht'n non ye, deg madg dan kɨbogt lo Israel ɗen kɨta ndɨje ta Bɨraɓe na ndin nomt. 2Ta lo Bɨraɓe'n elɨmt an:
3Ngon de, elta kɨ kɨbog lo Israel, eld an: Titbe kel Bɨraɓe Luwah; I kɨta ndɨjem ta la i ɗen ne yo? Dɔ ndimt kɨdɔ dõ, kel Bɨraɓe Luwah, m'a m'nyasɨ kad i ndɨjemɨn ta al. 4I ndig gangta dɔdt e? Ngon de, i ndig gangta dɔdt a? Ad'd gerɨn nyaɗag kɨyerr lo bɔwdg.
5Na i eld an: Titbe kel Bɨraɓe Luwah, Ndɔ'n m'mbed Israel ye, m'nda yo kɨ mad ngaka ngékɨɓe lo Jakob m'ad'd germɨn kam dɔning Ejipt't lon m'ndan yo m'ad'd m'an: Mĩ Bɨraɓe Luwah losɨ. 6Ndɔt'n non la m'nda yo m'ad'd kad m'tee sed dɔning Ejipt't kɨtɨga kad m'aw sed kam dɔningt'n m'sah kɨtɔd, dɔning'n mbà kɨ tej nũnt, dɔning kɨmaj tɔi dɔningg tube. 7Na m'eld m'an: Kɨ dekɨɗen kusɨt la nyag kɨyerr ĩgɨn nyur kood kɨ kum ɗaa sãi ko, ot yerrɨn rosɨ kɨ yog kɨ Ejipt't, mĩ Bɨraɓe Luwah losɨ.
8Na taamɨn ɗɔɔ, ndig kon dɔ ta lom al. Ĩn tube lan nyag kɨyerr kɨ nyurkood kɨ kum sãi kɔ al, na nyan yog kɨ Ejipt't ko al. Titbe m'el m'an: M'a m'ũ wong lom kɨdɔdt kad m'tɔl kon wong lom dɔdt kam dɔning Ejipt't. 9M'ɗa nya 'nten kɨta tɔm kɨtakad telɨn tɔm kɨyerr ro girrdegt ĩgɨn Israelag ndin kudt al, ke takum girrdegt ĩgɨn m'ad'd germɨn lon m'teen sed kam dɔning Ejipt't kɨtɨga. 10Titbe m'tee sed kam dɔning Ejipt't kɨtɨga, na m'aw sed kam dɨlalot. 11M'ad'd mberkɨndag lom na m'ad'd gerɨn tagkɨgang lom kad de hɔ ɗa got na ndi'n kɨ dɔn dõ. 12M'ad'd ndɔ taakòg lom kad i nyakɔj mbɨnadit kɨ mĩ kɨtakad gerɨn ne mĩ Bɨraɓe la m'ndad kɔtko kɨɗa ye.
13Na ngékɨɓe lo Israel taamɨn ɗɔɔ kam dɨlalot. Ndian kɨ go mberkɨndagt lom al, kidin tag kɨ gang lom ĩgɨn de a ngom god kad ndi'n kɨ dɔn dõ. Adɨn ndɔ taakòg lom telɨn kɨyerr na m'el m'an: M'a m'ũ wong lom kɨtɔlsɔkɨr kɨdɔdt kam dɨlalot kad nujd kɔ. 14Na m'ɗa nya 'nten kɨta tɔm kɨta kad telɨn tɔm kɨyerr ro girrdegt al ĩgɨn m'tee kɨ Israelag kam dɔning Ejipt't kɨtɨga takumdt. 15Na m'nda yo m'ad'd kam dɨlalot kad m'aw sed kam dɔningt'n m'ad'd al, dɔning in mba kɨ tej nũnt, dɔning kɨmaj tɔi dɔningg tube. 16Kɨtɔ kidin tagkɨgang lom, ndian kɨgo mberkɨndagt lom al, na yerrɨn kɨ ndɔ taakòg lom kɨta kamd i dɔ yogt lod. 17Be kaa, kumm oo kumtondo lod ad m'tujd al, m'nujd kɔ kam dɨlalot al. 18Na m'el ngandg kam dɨlalot m'an: Ot ndian go mberkɨndagt lo bɔwsɨg, ot ngomɨn go nyabelɓeg lod, ot yerrɨn rosɨ kɨ yog lod. 19Mĩ Bɨraɓe Luwah losɨ, i ndian go mberkɨndagt lom, i ngomɨn go tagkɨgang lom, i hɔn ɗad, 20i ndan ndɔ taakòg lom kɔtkokɨɗa kad i nyakɔj mbɨnamt kɨ in kad i gerɨn ne mĩ Bɨraɓe la mĩ Luwah losɨ ye.
21Na ngang taamɨn ɗɔɔ ad ndian go mberkɨndagt lom al, ngomɨn go tagkɨgang lom al, hɔn ɗad al, ĩgɨn de a ngom god kad ndɨn kɨ dɔn dõ. Yerrɨn kɨ ndɔ taakòg lom ad m'el m'an: M'a m'ũ wong kɨtɔl sɔkɨr kɨdɔdt kad m'tɔl kon wong lom dɔdt kam dɨlalot. 22Be kaa, m'ɔr jim kɨgog na m'ɗa nya kɨta tɔm kɨtakad telɨn tɔm kɨyerr ro girrdegt al ĩgɨn m'tee kɨ Israelag kɨ tɨga takumdt. 23M'nda yo m'ad'd kam dɨlalot kad m'a m'tɨnda m'tĩd ku girrdegt kɨ m'tuɓad kɨ dɔningg kɨ dang dang 24kɨta ɗan kɨgo tagkɨgang lom al, mbetɨn mberkɨndag lom, yerrɨn kɨ ndɔ taakòg lom na telɨn kumd kɨdɔ yogt lo bɔwdg. 25Kɨtɔ 'nten m'ad'd mberkɨndag kɨmajal kɨ tag kɨ gang ĩgɨn a ndin ne kɨ dɔd dõ al. 26M'ad'd telɨn kɨyerr kɨtakul kadkarig lod lon lan nganderg lod horro. M'ge nda kɔjd kɨ ɗob'n non. M'ɗa titbe kɨ tokad gerɨn ne mĩ la mĩ Bɨraɓe ye.
27Kɨtɔ 'nten ngon de, i elta kɨ ngékɨɓe lo Israel, eld an: Titbe kel Bɨraɓe Luwah; Bɔwsɨg kidmɨn kɨta ɗan sem nyaɗakɨro al ɓaitɔ 28lon m'ɔrrd ta ɗob, m'aw sed kam dɔningt'n m'ndan yo kɨ m'ad'd na urɨn kumd kɨdɔ door lot kɨ dõ kɨɗen kɨ dɔ kagt kɨɗen kɨ mbia nder, nu la lan kadkarig lod kɨjakɔ, lan kadkarig sɔkɨmɨn ne, lan kadkarig lod kɨkootmbĩ kɨ lahort na ũn kadkari nyakãig lod tɔ. 29M'eld m'an: Dɨngɨr lo kɨ dõ in hã i awɨn sem ye, i ɗi a? Kɨtɔ 'nten a kunɨn tɔa Doorlo, mbã ɓone.
30Kɨtɔ 'nten, el ngekɨɓe lo Israel an: Titbe kel Bɨraɓe Luwah; I ndɨ yerrɨn kɨ rosɨ kɨgo nyaɗa bɔwsɨgt a? I ndɨ ɗan kaya kɨgo nyaɗadt kɨyerr a? 31Kɨtɔ lon i lan kadkarig losɨ, lon i tɔlɨn ngansɨg i land kadkari kɨ lahort, i ndɨ yerrɨn kɨ rosɨ kɨ yog losɨ mbã ɓone. M'a m'nyasɨ kad i ndɨjemɨn ta a? Ngékɨɓe lo Israel. Dɔ ndimt kɨdɔ dõ, kel Bɨraɓe Luwah, m'a m'nyasɨ kad i ndɨjemɨn ta al. 32Dɔ kɔjtaɗat losɨ nõ nya mad kɨ a ɗa nya dɔt goto lon i ndɨ elɨn anan: J'a jĩ tit girrdeg, tit girrkoojg kɨ dɔningg kɨ dang dang kad kɨ ɗa ɓer jad kag kɨ mbal. 33Dɔ ndimt kɨdɔ dõ, kel Bɨraɓe Luwah, rota m'a m'õɓe dɔsɨt kɨ ji kɨtɔg kɨ ji kɨla kɨ dõ kɨ wong lom kɨtɔlsɔkɨr. 34M'a m'tee sesɨ ku degt, m'a m'kawsɨ kɨnat ko kam dɔninggt ĩgɨn i tĩn na tit kɨ ji kɨtɔg kɨ ji kɨla kɨ dõ kɨ wong lom kɨtɔlsɔkɨr. 35M'a m'ɗe sesɨ kam dɨlalot lo deg, nu la m'a m'gangta dɔsɨt kum kɨ kum. 36Tit'n m'gangɨn ta dɔ bɔwsɨgt kam dɨlalot kɨ dɔning Ejipt't ye, titbe tɔ m'a m'gangɨn ta dɔsɨt ho, kel Bɨraɓe Luwah. 37M'a m'adsɨ tɔin girr kagtɔsɨt na m'a m'ndasɨ, m'a m'dɔsɨ kam kunkɔt. 38M'a m'ge mɔr nge taaɗɔ dãsɨt kɔ kɨ ĩgɨn tɔin dɔ tag lom, m'a m'tee sed ko kam dɔningt'n hɔn londɨ tit, na a andɨn kam dɔning Israelt al. Titbe a i gerɨn ta kad mĩ Bɨraɓe.
39Na ĩn ta, ngékɨɓe lo Israel, titbe kel Bɨraɓe Luwah: Awɨn, kɨ dekɨɗen kusɨt ɗa ɓer ad yog lon na goat gog a i oon dɔ ta lom na a i yerrɨn kɨ tɔm kɨkunjɗang kɨta kadkarig losɨ kɨ yog losɨ gog al ta. 40Kɨtɔ dɔ mbalbot lom kɨjaɓat, ad i kɨ dõ dɔ mbalbot lo Israel, kel Bɨraɓe Luwah, nu la ngékɨɓe lo Israel tube, ĩn tube ĩgɨn ndɨ kam dɔningt a ɗan kɨlaɓer admɨn. Nu la m'a m'hɔd kɨromt, nu la m'a m'ndig kadkarig losɨ kɨ kand kɨdasag losɨ kɨ nyag losɨ tube kɨjaɓat. 41M'a m'hɔsɨ kɨromt tit sé kɨkootmbĩ lon m'tee sesɨ ku degt, m'a m'kawsɨ kɨnat ko kam dɔninggt ĩgɨn i tĩn na tit kɨtakad mĩ kɨkunjɗang kusɨt kɨ takum girrdegt. 42A i gerɨn ta kad mĩ Bɨraɓe lon m'and sesɨ kam dɔning Israelt, kam dɔningt'n m'nda yo kɨ mad bɔwsɨg. 43Nu la a i gan kamsɨ dɔ nyaɗasɨt kɨ kɨlag tube'n i yerrɨn ne rosɨ, ĩn kɨdɔsɨ, rosɨ a sɔlsɨ njur kɨta nyag kɨ majal tube ĩgɨn i ɗan. 44Na a i gerɨn ta kad mĩ Bɨraɓe lon m'ɗan sesɨ kɨta tɔm. I kɨta ɗobg losɨ kɨmajal al ke kɨlaɗasɨg kɨmajal. Oon maj, ngékɨɓe lo Israel, kel Bɨraɓe Luwah.
Currently Selected:
Ejekel 20: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
