Ejekel 17
17
Terrtag dɔ kurog kɨjoo
1Ta lo Bɨraɓe'n elɨmt an: 2Ngon de, i el goosɨta mad, na el terrta mad kɨ ngékɨɓe lo Israel. 3A i el an: Titbe kel Bɨraɓe Luwah: Kuro kɨbobe kɨ bɔga i kɨbo, kɨ bela ngal, kɨ ɓala i dang dang aw Libãt, hɔ tasom kag sedɨr tet. 4Tɔrr dɔjiag kɨdɔt, oi awɨn kam dɔningt kɨ loɗagat, ndaa ɓebot lo ngéɗagagt. 5Kamla un kohnya kɨ dɔningt'n non i dub kam ningt kɨ tee kɨ kand ngãi, hɔa kad mant kɨnun, hɔa tit dɔj kag ndẽ. 6Ɓa, tɔg na tel dĩ kɨ tɔ jin, al na ngal kɨ dõ ngam al. Dɔjiag telɨn kɨro kurot na ngɨrag ĩn girat. Titbe tel dĩ, dɔjiag ton, mbã mbin. 7Kuro mad kɨɗang kɨbobe kɨ bɔga kɨbo kɨ bela i ngãi i nõ, na oo, dĩn non tel ngɨran kɨro kurot 'nten na la dɔjɨn kɨroat kɨtakad kuro la man dɔat. Kokam lot'n han hɔat tit, ɔrra hɔa kete, 8kam ningt kɨmaj kad mant kɨ nũ kɨtakad dɔjia a ba, tee kɨ kandɨn na tel dĩ kɨmaj dum.
9El an: Titbe kel Bɨraɓe Luwah: Maj a ura a? A ret ngɨra, a ja kanda kad ndulo kɨta kad mbiag tube kɨ ten tutɨn ale? A ge ji kɨ ngetɔg ke deg koosɨg kad ɔrrɨna kɔ dɔ ngɨrat al. 10Oo, lon hɔa, maj a ura a? Lon nel kɨ loɓakàdt ɔda ye, a tut kɨtaagbe ale? Rota a tut kam lot'n hɔa tit.
Sedekias taaɗɔ Nebukadnesar
11Kamla ta lo Bɨraɓe ɗe romt ɓaitɔ an: 12Tajigla i el girrdeg kɨ ngétaaɗɔɔ'n ɗan an: I gerɨn girr nya 'nten ale? Eld an: Oon, ngar kɨ Babilon aw Jerusalem, hɔ ngar kɨ mbaiɓeg loa aw sed ront Babilon. 13Kɔt de mad kɨɗa kɨ girra i ngar, na un kɔn sia kɨ yokɨnda kɨta ɗa nyakɨro. Ɔrr kɨbog kɨ dɔningt, 14kɨtakad la dɔ kõɓe kɨber kad ɗa tɔg bai gog al na kɨ ngomɨn go kunkɔ lon ad tokɨnõt. 15Na Sedesias taa ro, la ngombangkɨlag lon Ejipt kɨtakad adnɨn sɨndag kɨ deg koosɨg. De kɨ ngeɗa nya kɨ titbe ye, maj a ura kad aj a? Gang kunkɔ ye, a aj a?
16Dɔ ndimt kɨdɔ dõ, kel Bɨraɓe Luwah, rota kam londɨt lo ngar in ndaa ngart, kam Babilont nu la a oit ye, kɨta kid yokɨnda loa na mbet kunkɔ loa. 17Paraõ a aw kɨ ngéɗɔɔ kɨngãi kɨ deg koosɨg lon kad ɗan ne sia kam rot al lon ũn ning dɔnat gugɨn dɔ na lan ndogbɔrr gugɨn do kad nujɨn ne deg koosɨg. 18Kɨtɔ Sedekias kid yokɨnda, mbet kunkɔ, un kɔn na ɗa nyag 'nten tube. Kɨtɔ 'nten a aj al.
19Kɨtɔ 'nten, titbe kel Bɨraɓe Luwah: Dɔ ndimt kɨdɔ dõ rota, kid yokɨnda kɨta ɗa nyakɨro lom, na mbet kɨbo. M'a m'nda ngɨra nyag 'nten dɔat. 20M'a m'la band lom dɔat na gum lom a hɔa, m'a m'aw sia Babilont, nu la m'a m'gangta dɔat kɨ ta ɗagootal loa kɨ ɗa sem. 21Ngekãig tube ko kam ɓut ngéɗɔɔt loa a son ta kiyaɗɔɔt na ndega kɨnãi, a tɨnda tĩd kɨ log pa pa. Kamla a i gerɨn ta kad mĩ Bɨraɓe la m'elta ye.
Kunkɔ lo Bɨraɓe
22Titbe kel Bɨraɓe Luwah: M'a m'un takõ kag sedɨr kɨ ngal tɔi. M'a m'hɔa. M'a m'tet dɔjia kɨɗa kɨdu kɨ to ngoor na mĩ kɨdɔm m'a m'hɔa dõ dɔ mbalt kɨ ngal puwuw. 23M'a m'hɔa dõ dɔ mbalbot lo Israel, dɔjiag a ɓan, na a teen kɨ kand'd, a tel kag sedɨr kɨmaj dum. Yelg kɨ dang dang kɨ awɨn kɨ bɔgd a hɔn londɨ girat, a hɔn londɨ ndil dɔjiagt. 24Na kagg tube kɨ kam mut a gerɨn ta kad mĩ Bɨraɓe la m'la dɔ kag kɨ ngal kɨber, na m'tɔi kag kɨ kij kɨ dõ. Mad kag kɨmbool tel kɨtut na mad kag kɨ tut ɓa hunj. Mĩ Bɨraɓe la m'elta, na m'a m'tɔl kona.
Currently Selected:
Ejekel 17: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
