Ejekel 16
16
Kamkẽ lo Bɨraɓe kɨdɔ Jerusalemt
1Ta lo Bɨraɓe elɨm ɓaitɔ an: 2Ngon de, ad Jerusalem ger kɨlaɗang kɨyerr. 3Ela an: Titbe kel Bɨraɓe Luwah kɨro Jerusalemt; mba giri kɨ kooji, ĩn ko dɔning Kanat. Bɔwi i Amoriya na kõi i Hetia. 4Ta kɨdɔ koojit ta, ndɔ kooji jan kɨla kumi al, tugoin kɨ man ad i ar al, wurɨn roi kɨ kat al, ɓirin kɨ kub al. 5Ngekokumtondo loi kad n'ɗa nya mad kɨɗa sei ku nyagt'n non kɨtɔ kɔj kamkẽ goto na lain ko kam ndɔɔt ndɔ koojit nõ kɨta mbetɨn.
6M'tɔi kadt nderbe, m'ooi i to kam mosit na lon i to kam mosit ɓaitɔ m'eli m'an: I to kumkajir. 7Mad i bɨla kɨdɔtdɔt tit nyako kam ndɔɔt. I tɔg, i ngal mbã asɨ ngon mand, mbai tee, bisɨdɔi ngal na kub goto roit, roi to kari. 8M'tɔi roit nderbe, m'ooi na oo, kaglo loi i kaglo tar. M'la kubji lom m'utɨn dɔ roi kɨ to kari, m'nda yo m'adi, m'a m'un kom nat sei, kel Bɨraɓe Luwah; ĩn lom.
9M'tugoi kɨ man, mad mosɨ kɨroit goto, m'uri kɨ yib, 10m'lai kub kɨ jo kɨ markop kɨ urɨn kɨ ndar ang, m'dɔ ɓoi kɨ kub lẽ kɨ sɔl lom, m'ut dɔi kɨ kub soi. 11M'pare roi kɨ nyapare ro, m'la ngan ningag jiit kɨ kɨla ninga kɔit, 12m'la ninga konit kɨ ningambi mbiit kɨ jɔg pare kɨmaj dɔit. 13Titbe la paren ne roi kɨ nar ɔr kɨ arjã na lain kub lẽ kɨ sɔl lom kɨ kub soi kɨ kub kɨ joo'n. Nduj kɨtoletlet kɨ tej kɨ yib ĩn nyasai. I mand ngãi kɨ dumbit asɨ kɨ ngar kɨdẽ. 14Tɔi ko ngãi ku girrdegt kɨta mandi kɨta in kɨkasɨnatap kɨtakul nyamajg lom kɨ m'la roit, kel Bɨraɓe Luwah.
Jerusalem tel tit kaya dekɨdẽ
15Na i ɓakul mandi, i ɗa kaya kɨta toi kɨ ko, i tĩn kayakɨɗa loi kɨro degt tube kɨ ngétoi dõ, i nya roi ad'd. 16Ɔi kubg loi kɨ ɓala i dang dang, i paren dɨngɨr log na i ɗa kaya tit. Nyag kɨ titbe ɗan nya kete al, a ɗan nya gog nja kɨɗa al tɔ ho. 17Ɔi nyapare ro loi kɨmaj, nar ɔr kɨ arjã ĩgɨn m'adi, i ɗan nyag kɨtɔsɨ ɓakumta de kɨdɨngã na a ɗa kaya sed. 18I ɔi kubg loi kɨ joo'n utɨn dɔd, i nda yib lom kɨ mbikam lom kɨkootmbĩ nõdt. 19Nyasa'n m'adi, nduj kɨtoletlet, yib kɨ tej ĩgɨn hã m'uli'n ye, i nda nyag 'nten nõdt kad tĩn sé kɨkootmbĩ. I ɗa titbe, kel Bɨraɓe Luwah.
20I oi ngani kɨdɨngã kɨ kɨdẽ ĩgɨn i oojd adɨm, i lad kadkarit ad'd kad san. Kaya loi i nya kɨ tẽbe e? 21I tɔl nganɨm, i lad kadkari kɨlahorrt ad yog'n non. 22Kam kɨlaɗait kɨyerr kɨɗen kɨ kayakɨɗa loi i ga dɔ ndɔ kɨnit kɨdui al lon roi ton kari, kub goto roit na i to kam mosit.
23Go kɨlaɗai kɨmajal tube be to loi, be to loi, kel Bɨraɓe 24i ɗa kuj kayag kɨta roi, i ɗa dɨngɨr log kam natlot kɨɗen. 25I ɗa dɨngɨr log ta to ɗobt kɨɗen, i yerr kɨ majkoo loi, i la roi ad ngetoig tube ad kayakɨɗa loi bɨla kɨdɔtdɔt 26I ɗa kaya kɨ Ejiptiag madɓeig kɨ ngenyurkõ na i ad kaya kɨɗa loi bɨla kɨdɔtdɔt kad i sɔkɨm. 27Na oo, m'la jim m'ndoorɨn, mad gaj loi tel kɨdu toi, m'lai kɨgo ndigt lo madngétaig, ngan kɨdẽ lo Pilistiag ĩgɨn ĩn kɨ rosɔl kɨta kɨlaɗaig kɨmajal. 28I ɗa kaya kɨ Asiriag kɨta nyurkõ loi asɨi al. I ɗa kaya sed be kaa, nyurkõ loi tɔl ɓoi al. 29I ɗa kaya kɨ dɔning Kana mbã Kalde, ke i titbe kaa nyurkõ loi tɔl ɓoi al.
30Titbãi hali i kɨtan, kel Bɨraɓe Luwah, kɨta i ɗa nyag 'nten tube'n ĩn kɨlaɗa kaya dekɨdẽ kɨ roa sɔla al 31I ɗa kujkayag loi ta toɗobt kɨɗen, i ɗa dɨngɨr log loi kam natlogt tube na ĩn tit kaya dekɨdẽ al kɨta i kid nyabaji, 32i tit dekɨdẽ kɨ ngeɗangaw ndɨ sah de kɨ mbahg ɔrrɨn goot ngawɨn. 33Deg adɨn nyabaji kaya dekɨdẽg tube na i ad kadkarig ngésaihg tube. Kɨ lo kɨɗen i bad kad ɗen ɗan sei kaya. 34Kayakɨɗa loi i tadang kɨ lo ndeg kaya dekɨdẽg kɨta de kɨɗa kɨ saih kad kɨ ɗa sei kaya goto, ĩ kɨdɔi bad na adin nyabaji al ad ta loi i tadang.
Takɨgang a ɗe dɔ Jerusalemt
35Kɨtɔ 'nten, ĩn kaya dekɨdẽ, oo dɔ ta lo Bɨraɓe. 36Titbe kel Bɨraɓe Luwah: Kɨtɔ rosɔl loi kɨ to kɨtɨga do kɨ ro kɨkari loi kɨ ger kɔikɔi dɔ kayat loi kɨ i ɗa kɨ ngesaihg na kɨta yog loi tube kɨyerr kɨ kɨta mosɨ nganig ĩgɨn i la ad'd, 37kɨta 'nten, oo, m'a m'kaw ngésaihg tube'n roi neli sed, tube'n i ndigd kɨ tube ĩgɨn i ɔsɨd ta, m'a m'kawd kɨnat kɨ lo kɨɗen kad ndoorɨn, m'a m'tee dɔ roi kɨ to kari kɨrodt kad oon roi kɨ kari kɨtaagbe. 38M'a m'gangta dɔit tit'n a gangɨn ne ta dɔ dekɨdẽgt kɨ ngéɗangaw, kɨ ngékũ mosɨ kɔ, m'a m'lai kɨ mosɨ kɨ wong kɨtɔlsɔkɨr kɨ jàng kɨ dɔit. 39M'a m'lai jidt, a ɔsɨn kuj kayag loi lan ningt, a tɔn dɨngɨr log loi kɔ, a ngĩn kub loi roit, a tan nyapare loi kɨmaj na a nyain kɨ roi kari kɨkanj nyakutdɔ. 40A ɗen kɨ deg koosɨg kɨdɔit kad tɨlain kɨ mbal, a gangɨn njikɨt njikɨt kɨ kiyaɗɔɔg lod, 41a lan horr kujg loi, a gangɨn ta dɔit takum dekɨdẽgt ngãibe. M'a m'adi i nya ta ɗa kaya, a i ad nyabaji gog al. 42M'a m'tɔl kon wong lom kɨdɔit, m'a m'ɔrr jang lom dɔit kɔ, m'a m'ndɨ gom mbo, m'a m'ɗa wong gog al ta. 43Kɨtɔ i ga kami dɔ ndɔgt kɨ in kɨdui nu al na i sɔkɨ wong lom kɨtakul nyag 'nten tube, oo, mĩ tɔ m'a m'nda ngɨra dɔit, kel Bɨraɓe Luwah. I ɗa nya kɨmajal 'nten dɔ nyagt kɨyerr loi nõ tube ale?
44Oo, ngekelterrtag tube a elɨn terrta 'nten dan ne dɔi anan: Kõ ɗa titbe, ngon kɨdẽ ɗa titbe ho. 45Ĩn ngon kɨdẽ lo kõi ĩn oo ngawɨn kɨ nganɨn tit nya kɨyerr be, ĩn ngonkõ ngankõig ĩgɨn oon ngawd kɨ ngand tit nya kɨyerr be. Kõi i Hetia bɔwi i Amoriya. 46Ngonkõi kɨtag i Samari in hã ndɨ ko jigelit nat kɨ nganɨn kɨdẽ na ngonkõi kɨdu i Sodom in hã ndɨ ko jikõit nat kɨ nganɨn kɨ dẽ. 47Na i ndia go ɗobgt lod ke i ɗa kɨgo yerrgt lod kɨɗabe koon al. Ɗà titbe i nya kɨ tẽbe roit na i tel nya kɨ tuj tɔid kam nyaɗaigt tube. 48Do ndimt kɨdɔ dõ, kel Bɨraɓe Luwah, ngonkõi Sodom kɨ ngana kɨdẽ ɗan nya'n ĩn kɨ ngani i ɗan al. 49Oo, majal lo ngonkõi Sodom la ten: Dongang kɨ sanya boot kɨ ko majro. Nyag'n non tube la ndi'n kɨ nganɨn kɨdẽ na ɗa nya mad kɨɗa kɨta ngendog kɨ kɨdangtg al. 50Ĩn ngé gaburo na ɗan nyag kɨyerr nomt, kɨta 'nten m'ɔrrd ko lon m'oon nya 'nten. 51Samari ɗa nusɨ majal loi al, yerrg loi ĩn ngãi tɔi kɨloa, i ɔrr ta ngankõigt kɨta kɨlaɗaig kɨyerr tube'n i ɗad. 52Ĩ tɔ in hã i gangta dɔ ngankõigt, i un rosɔl loi tit kan hã ɗamajal loi i kɨyerr tɔid na ĩn denesew tɔin, kɨ ĩn kɨ rosɔl na un rosɔl loi kɨta i ɔrr ta dɔ ngankõigt.
53M'a m'tel sed ɓeɓert gog, Sodom kɨ ngana kɨdẽ kɨ Samari kɨ ngana kɨdẽ, kamla m'a m'tel kɨ deg loi ɓeɓert gog kudt 54kɨtakad i un gang loi na kad roi sɔli dɔ nyagt tube'n i ɗa kad i tel nyasɔlkamd. 55Ngonkõi Sodom kɨ ngana kɨdẽ a telɨn kɨ londɨdt kɨdasa, Samari kɨ ngana kɨdẽ a telɨn kɨ londɨdt kɨdasa na ĩn kɨ ngani kɨdẽ a telɨn kɨ londɨsɨt kɨdasa. 56Ndɔ dɔngang loi a i kun ngonkõi Sodom al 57lon girr majal loi tee al ɓaitɔ. Tajigla i tel nyataj kɨro ngan kɨdẽt kɨ Siri kɨ madɓeag tube kɨ ngan kɨdẽ kɨ Pilistiat, ngendɨ gug dɔ ĩgɨn kidin. 58I to nyabaji kaya loi kɨ kɨlaɗai kɨ yerr, kel Bɨraɓe.
Luwah a ngomgo kunkɔg lon
59Kɨtɔ titbe kel Bɨraɓe Luwah: M'a m'ɗa sei tit'n i ɗan, ĩn kɨ kid ndɔlɨn i gangɨn kunkɔ to mbɨnamt sei. 60Ke titbe kaa m'a m'ga dɔ kunkɔt'n m'un sei kaglot kɨ ĩn ngon kɨdu ɓaitɔ, na m'a m'un kɔm m'adi gog ɓaitɔ ad i yokɨnda kɨtokɨnõt. 61Kamla a i gah dɔ nyaɗait, na roi a sɔli lon a i hɔ ngankõig kɨroit kɨ teen kete kɨ nge kɨ teen goit. M'a m'ad'd tit ngani kɨdẽ na kɨgo kunkɔt loi al. 62M'a m'un kom m'adi kɨ yokɨnda na a i ger ta kad mĩ Bɨraɓe, 63kad i ga kami dɔt, kɨ roi sɔli kɨtakad i tee tai gog nja kɨɗa al bat kɨta rosɔl loi lon m'nyago majalg loi tube'n ɗa kon kel Bɨraɓe Luwah.
Currently Selected:
Ejekel 16: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
