Ejekel 13
13
Ta kɨdɔ ngekeltagt kɨngom
1Ta lo Bɨraɓe'n elɨmt an: 2Ngon de, elta kɨtamt ndoorɨn ngekelta kɨta Luwaht lo Israel, ngekelta kɨgo kamndigt lod kɨkɔsɨdɔd, eld an: Oon dɔ ta lo Bɨraɓe. 3Titbe kel Bɨraɓe Luwah; beto lo ɓoodg kɨ ngekelta kɨta Luwaht ĩgɨn ndulon go ndild kɨkɔsɨdɔd na oon nya mad al. 4Ah Israel, ngekelta kɨta Luwaht loi tit'n kɨ talg kam gootɓet, 5I alɨn dɔ ndogbɔrrt, ɗan go log al, i ɗan ndogbɔrr gugɨn dɔ Israel al tɔ kad ɗà bijir kam ɗɔɔt dɔ ndɔt lo Bɨraɓe. 6Nyakokamndilt lod i kɨpãbe na takeld i kɨngom. Elɨn anan: Titbe kel Bɨraɓe na Bɨraɓe lad al. Ndɨ ngoon kad tɔlkon ta lod kari kɨndang. 7Nyakokamndilt in oon ye, i kari pãbe ale? Takel in elɨn i ta kɨ ngom ale? Elɨn anan: Titbe kel Bɨraɓe na mĩ m'elta al. 8Kɨtɔ 'nten, titbe kel Bɨraɓe Luwah: I elɨn nyag kɨpãbe na nyakookamndilt losɨ i takɨbal Kɨtɔ 'nten, oon, m'ɔsɨsi ta, kel Bɨraɓe Luwah.
9Jim a ndoori ngekelta kɨta Luwaht ĩgɨn oon nyakookamndilt kɨpãbe na takeld i kɨngom. A ĩn kam ngekawnat lom al, a ndangɨn tɔd kam maktubt lo Israel al, a andɨn kam dɔning Israelt al tɔ na a gerɨn ta kad mĩ Bɨraɓe Luwah.
10Kɨtɔɗi ũn deg lom mut lon elɨn anan: Lapia, na lapia goto. Lon deg ɗan ndogbɔrr ye ngekelta kɨta Luwaht'n non ɗan gida kɨ hɔr. 11El ĩgɨn ɗan gid ndogbɔrr kɨ hɔr kad tet ningt. Ndii kɨ ed ngãi kɔsɨndii kɨ nélbarwãi a ndana ad tet kɔ. 12Na oon lon ndogbɔrr tet kɨ ningt a elsɨn anan: Hɔr kɨ i ɗan ne gid ndogbɔrr nõ i ɗah a? 13Kɨtɔ 'nten, titbe kel Bɨraɓe Luwah; M'a mad wong lom kɨtɔlsɔkɨr ndu kɨ nélbarwãin, ndii a ed ngãi kɨtakul wong lom kɨtɔlsɔkɨr na kɔsɨndii kɨbobe a tuso kɨgo wongt lom kɨta tuja. 14M'a m'tet ndogbɔrr in i ɗan gida kɨ hɔr m'ada so ningt kad gira to kɨtɨga kari. Lon tet so a ne, a i nujɨn kamt na a i gerɨn ta kad mĩ Bɨraɓe. 15Titbe m'a m'tɔl kon wong lom kɨdɔ ndogbɔrrt'n ɗan kɨ kɨdɔ ĩgɨn ɗan gida kɨ hɔr na m'a m'elsɨ m'an: Ndogbɔrr goto ke ngeɗa gida. 16Ngekelta kɨta Luwaht lo Israel ĩgɨn elɨn ta dɔ Jerusalemt, kɨ ĩgɨn oon lapia loa kam nyakookamndilt na lapia goto, kel Bɨraɓe Luwah.
Luwah gangta dɔ dekɨdẽg kɨ ɗa mbooli
17Na ĩ ngon de, i ur kumi kɨdɔ ngan kɨdẽgt lo deg loi ĩgɨn elɨn ta kɨgo kamndigt lod kɨ kɔsɨdɔd, i elta kɨta Luwaht ndoordɨn, 18el an: Titbe kel Bɨraɓe Luwah; Beto lo dekɨdẽg'n urɨn bɨragajg dõ dɔ kurjigt tube na ɗan kub lɔwdɔ kɨta kutɨn deg kɨdug, kɨ kɨbog, kɨtakad hɔn ne ro deg kɨ gum. I ndig hɔn ro deg lom kɨ gum na in kɨɓeg i ngomɨn rosɨ a? 19I yerrɨn kɨ tɔm ro degt lom kɨta nyako ɔrj kɨmbɔj dajit kɨ gaj bɨnag lon i tɔlɨn ne deg kɨ sumba kad oin al na deg kɨ sumba kad nyand kɨ dɔd dõ al ye, i nyandɨ kumkajir. I goolɨn deg lom titbe ad oon dɔ ta kɨngom. 20Kɨtɔ 'nten, titbe kel Bɨraɓe Luwah: Oon, m'ɔsɨ ta bɨragajg losɨ ĩgɨn i hɔn ne ro deg kɨ gum na m'a m'ug m'ɔrrd jisɨt. Deg kɨ i hɔnd, m'a n'nyad dõ kad ɓain tit yelg be. 21M'a m'til kub lowdɔ losɨ kɔ na m'a m'ug deg lom m'ɔrrd jisɨt, a in jisɨt kad i hɔnd kɨ gum gog al na a i gerɨn ta kad mĩ Bɨraɓe. 22Kɨtɔ i adɨn kamkil deg kɨdenesew kɨ tag kɨbal lon mĩ kɨɓe m'ad'd kamkil al na i adɨn ji de kɨmajal ngang na beta nyàgo ɗob lon kɨmajal kɔ ad ndɨ kɨ dɔ dõ. 23Kɨtɔ 'nten a i oon nya kookamndilt kɨpãbe gog al ta na a i ndõn tee gog al. M'a m'ug deg lom m'ɔrr jisɨt, kamla a i gerɨn ta kad mĩ Bɨraɓe.
Currently Selected:
Ejekel 13: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
