Ejekel 14
14
Jeremi kun kɨbog lo Israel kad tɔrrɨn ndid
1Deg madg dan kɨbogt lo Israel ɗen romt, ndin ber nomt. 2Kamla ta lo Bɨraɓe ɗe romt an:
3Ngon de, deg'n non ndan yog lod ngarkamdt na ndan kumd kɨdɔ nyagt kɨ ngekad'd son kam nyaɗat kɨgoot al ye. M'a m'nya ɗob kad ndɨjemɨn ta a? 4Kɨtɔ 'nten i eld ta na i eld an: Titbe kel Bɨraɓe Luwah; Israela kɨɗen in nda yog lon kamɨnt na ndah kumɨn kɨdɔ nyagt kɨ ngekada so kam nyaɗat kɨgoot al, ĩla aw ro ngekelta kɨta Luwaht a ne, mĩ Bɨraɓe la m'a m'tura ta kɨta yog loa kɨngãi'n non, 5kad m'hɔ Israelag kɨ ta kɨ ngar kamdt kɨta nyàmɨn kɔ kɨta yog lod. 6Kɨtɔ 'nten i el Israelag an: Titbe kel Bɨraɓe Luwah; I tɔrrɨn ndisɨ, i nyan go yog losɨ, i telɨn takumsɨ ko dɔ nyagt kɨyerr losɨ tube, 7kɨta Israela kɨɗen ke mbah kɨɗen in ndɨ kam dɔning Israelt in gangɨn na sem na nda yog lon ngar kamɨnt na nda kumɨn kɨdɔ nyagt kɨ ngekada so kam nyaɗat kɨgoot al lon, ĩla aw ro ngekelta kɨta Luwaht kad ko kɨtakula a ne, mĩ Bɨraɓe kɨdɔm la m'a m'tura ta ye. 8M'a m'tel takum'm ndoorɨn de'n non m'a m'tela nyakɔj kɨ nya godɔt, m'a m'ganga kɔ ku degt lom na a i gerɨn ta kad mĩ Bɨraɓe.
9Ĩla goolɨn ngekelta kɨta Luwaht ad elta mad, i mĩ Bɨraɓe la m'gool ngekelta'n ɗan ye. M'a m'la jim m'ndooran, m'a m'ganga ko ku degt lom Israel. 10A ton kɔjkum lo majal lod kɔjkum lo ngekelta kɨ kɔjkum lo ngendɨjeta a asɨna, 11kad Israelag son mut sãi romt gog al na yerrɨn rod kɨta tɔidɔta lod gog al tɔ. Kamla a ĩn deg lom na m'a mĩ Luwah lod, kel Bɨraɓe Luwah.
Luwah a nya Jerusalem kanj takɨgang al
12Ta lo Bɨraɓe'n elɨmt an: 13Ngon de, ĩla dɔning mad ɗa maj al ndoorɨm kɨta tɔidɔta ad m'la jim kɨdɔat, m'tuj'n nyasa loa na m'la kɨ bo kɨdɔat kad tɔl deg kɨ dãg kɨtit 14ke neni deg kɨmita'n non ĩn kamt, ad i Noe, kɨ Daniel kɨ Job kaa ne a ajɨn rod kɨdɔd koon kɨta nyaɗad kɨ goɗobat, kel Bɨraɓe Luwah.
15Ĩla mad dãg kɨmajal ndian kam dɔningt'n non kad san deg ad dɔning tel gootɓe na de mad tɔit al kɨta dãg'n non, 16ke neni deg kɨmita'n non ĩn kamat kaa, do ndimt kɨdɔ dõ, kel Bɨraɓe Luwah, a ajɨn ngan kɨdɨngãg ke ngan kɨdẽg al. Ĩn kɨ kɨɗadbe a ajɨn na dɔning a tel gotɓe.
17Ke ĩla mad kiyaɗɔɔ ɗe dɔ dɔningt'n oon, na m'el m'an: Kɨ kiyaɗɔɔ lago dɔning, m'nujɨn deg kɨ dãg kamt, 18ke neni deg kɨmita'n non ĩn kamt kaa, rota do ndimt kɨdodõ, kel Bɨraɓe Luwah, a ajɨn ngan kɨdɨngãg ke ngan kɨdẽg al na ĩn kɨ kɨɗadbe a ajɨn koon.
19Ke ĩla m'la kɨ yokoosɨ kam dɔningt'n non, ke m'ũ wong lom kɨtɔlsɔkɨr dɔat kɨta nuj deg kɨ dãg kamt, 20ke neni Noe kɨ Daniel kɨ Job ĩn kamat kaa, do ndimt kɨdɔ dõ, kel Bɨraɓe Luwah, a ajɨn ngan kɨdɨngãg ke ngan kɨdẽg al na ĩn kɨ kɨɗadbe a ajɨn rod kɨta nyaɗad kɨdenesew.
21Ã, titbe kel Bɨraɓe Luwah: Ke m'la kɨ tag lom kɨgang kɨkootɓool so kɨdɔ Jerusalemt, ad i kiyaɗɔɔ kɨ bo kɨ kõ kɨ dãg kɨmajal kɨ yokoosɨ kɨ to nuj deg kɨ dãg kamt, 22kaa, oon, ndegag a nãin kamt ĩgɨn a ten kɨ tɨga kɨ ngan kɨdɨngãg kɨ ngan kɨdẽg. Lon ten kɨrosɨt a i oon ɗob lod kɨ kɨlag lod na a i sɔlɨn kamsɨ dɔ nyakɨtot kɨ m'ɗen dɔ Jerusalemt kɨ nyag tube'n m'ɗen dɔat. 23A sɔlɨn kamsɨ lon i oon ɗob lod kɨ kɨlag lod? A i gerɨn ta kad nyag ĩn m'ɗa kamt m'ɗa kari al, kel Bɨraɓe Luwah.
Currently Selected:
Ejekel 14: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
