Ejekel 12
12
Ejekel i nyakɔj kɨta ngéndɨ Jerusalem
1Ta lo Bɨraɓe'n elɨm an:
2Ngon de, i ndɨ ku girrdegt kɨ ngétaɗɔɔ. Aw kɨ kum kɨta ko lo na oo lo al, aw kɨ mbi kɨta ko da na oo dɔ al kɨta i girrdeg kɨ ngétaɗɔɔ. 3Kɨtɔ 'nten, ngon de, i ɗago nya kaw ɓer loi na aw ɓeɓert dan kada ta kumdt. I ɓai takumdt kam lot loi tit ɓer be, aw lot mad kɨɗang. Maj a ne, a gerɨn ta kad ĩn girrdeg kɨ ngétaɗɔɔ. 4I tee kɨ nya kaw mbah loi dan kada takumdt tit nya kaw ɓert na in kɨdɔi aw lokɨsɔle takumdt tit deg kɨ nge kawbert be. 5I mbut ndogbɔrr ta kumdt na kɨta ɗob'n non la a i teen kɨ nyag loi kɨtɨga. 6A i oi nyag dɔ bɔgit takumdt, a i teen kɨtɨga lo kɨdiwt, a i ut takumi kad i oo dɔning al kɨta m'teli nyakɔj kɨta Israelag.
7M'ɗa tit'n ndamɨn mbera. M'tee kɨ nyag lom dan kada tit nya kaw ɓer. Lokɨsɔle m'mbut ndogbɔrr kɨ jim, m'tee tɨga kam lo kɨ diwt, m'to nyag lom dɔ bɔgɨmt takumdt.
8Loti kɨsĩ ta lo Bɨraɓe ɗe romt an: 9Ngon de, girrdeg lo Israel, ngétaaɗɔɔ'n non, elɨn anan: I ndɨ ɗa ɗi a? Ndɨjen be ale? 10Eld an: Titbe kel Bɨraɓe Luwah; Bɨraɓe elta 'nten kɨdɔ mbaiɓegt kɨ ndin Jerusalem kɨ Israelag tube'n ndɨnt. 11El an: Mĩ nya kɔj kɨtɔsɨ. Tit'n m'ɗan, titbe tɔ la a ɗan sed ho ye. A awɨn ɓeɓert 12Mbaiɓe in ndɨ kudt a to nyag lon do bɔgnt, teen tɨga kam lo kɨdiwt. A mbut ndogbɔrr kad teen na a ut ta kumɨn kɨtakad oo dɔning kɨ kumɨn al 13M'a m'la band lom dɔat, gum lom a hɔa na m'a m'aw sia Babilon kam dɔningt lo Kaldeag. A oo dɔning'n non al, na nu la a oit ye. 14Tubeg'n gugɨn dɔa, ad i ngeɗa sia kɨ koosɨ ngéɗɔɔ loa tube, m'a m'tɨnda m'tĩd kam nélt kɨɗen, na m'a m'ɔrr kiyaɗɔɔ godt. 15A gerɨn ta kad mĩ Bɨraɓe lon m'tɨnda m'tĩd ku girrdegt, m'tuɓad kɨ dɔningg kɨ dang dang. 16M'a m'nya kɨmadg kudt kad ten ta kiyaɗɔɔt kɨ ɓo kɨ yokoosɨ, kɨtakad ton tad dɔ nyaɗadt kɨyerr tube ku girrdegt ĩn awɨn dandt na a gerɨn ta kad mĩ la mĩ Bɨraɓe ye.
17Kamla ta lo Bɨraɓe ɗe romt an: 18Ngon de, i sanya loi kɨ rondad i ãi man loi kɨ ɓool kɨ sool. 19El deg kɨdɔningt an: Titbe kel Bɨraɓe Luwah do ngéndɨ Jerusalem kam dɔning Israelt; A san nya lod kɨ ɓool, a ãin man lod kɨ rondad kɨta a tirɨn nyag tube kɨdɔningt purpur kɨta nyaɗa kɨ lo ngetɔgt lo ngendɨt tube. 20A nujɨn ɓebog kɨ deg'n ndɨnt, dɔning a tel gootɓe, na a gerɨn mĩ la mĩ Bɨraɓe ye.
21Ta lo Bɨraɓe'n elɨmt an: 22Ngon de, terrta in i ndɨ elɨn dɔning Israelt, anan: Ndɔg ngãibe ndɨ tɔin na nyakookamndilt kɨɗen to kari kɨ ndang ye, gira i ɗi a? 23Kɨtɔ 'nten i eld an: Titbe kel Bɨraɓe Luwah; m'a mad terrta 'nten goto. Deg a elɨn terr ta 'nten kam Israelt gog al ta na i eld an: Ndɔg ɗen nderbe kad tɔl ta nyakookamndilt tube, 24Kɨtɔ nyako kamndilt kɨpãbe ke ta lo ngendo'n tee a goton kam Israelt. 25Kɨtɔ mĩ Bɨraɓe, m'a m'elta na ta kɨ m'el a tɔl kona kɨkanj ndɨ kok, kɨta kaglo ndɨsɨt kɨ dɔsɨ dõ ye, in girrdeg kɨ ngétaaɗɔɔ, m'a m'elta, na m'a m'tɔlkona, kel Bɨraɓe Luwah.
26Ta lo Bɨraɓe'n elɨmt ɓaitɔ an: 27Ngon de, oo Israelag elɨn anan: Ta nyakookamndilt i kɨta ndɔg kɨsãi, elta kɨta Luwaht kɨta kaglog kɨsãi ɓaitɔ, 28Kɨtɔ 'nten eld an: Titbe kel Bɨraɓe Luwah; Ta lom kɨɗa kɨ a to kok do tɔl konat goto, ta lom kɨ m'el a tɔl taa, kel Bɨraɓe Luwah.
Currently Selected:
Ejekel 12: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
