Ejekel 11
11
Luwah gangta do mbaiɓegt kɨ Israel
1Ndil unɨm na aw sem tabit kujt lo Bɨraɓe ko loɓakàdt in su mba loɓakàd na oo, kad tabit't nõ deg dɔjoo gidaimi. Kudɨt m'oo Jaajania ngon Ajur kɨ Pelatia ngon Benaja, mbaiɓeg lo deg. 2Bɨraɓe elɨm an: Ngon de, ingɨn non la ĩn deg ngekɔjta ɗagootal na adɨn takɔj kɨ majal kam ɓet'n ɗan. 3Elɨn anan: Kaglo asɨ al ɓaitɔ ye, ad kɨ ɗan kujg. Ɓebo'n ɗan i jo ndirr nya na jĩ dã. 4Kɨtɔ 'nten i elta kɨta Luwaht kɨdɔ det. In ngon de, elta kɨta Luwaht.
5Kamla Ndil Bɨraɓe ɗe dɔmt elɨm an: I el an: Titbe kel Bɨraɓe. Ĩn Israelag, i elɨn titbe na m'ger nyag tube kɨ i gan dɔt. 6I ɗan ad tɔlɨn deg ngãi kɨdɔtdɔt kam ɓebot'n ɗan, i ɗoosɨn ɗobg loa kɨ nin. 7Kɨtɔ 'nten, titbe kel Bɨraɓe Luwah: Ngékoig losɨ kɨ ũnd kamat ĩn dã, ɓebo i jo ndirra na ĩn ta, m'a m'tee sesɨ kɨtɨga. 8I ɓoolɨn kiyaɗɔɔ na m'a mad kiyaɗɔɔ ɗe dɔsɨt, kel Bɨraɓe Luwah. 9M'a mad i ten kamat ko, m'a m'lasɨ ji mbahgt na m'a m'gangta dɔsɨt, 10A i oin koi kiyaɗɔɔ, m'a m'gangta dɔsɨt ta ɗobnint lo Israel na a i gerɨn mĩ la mĩ Bɨraɓe ye. 11Ɓebo'n ɗan a i jo ndirrsɨ al, a ĩn dã kamt al, m'a m'gangta dɔsɨt ta ɗobnint lo Israel. 12Na a i gerɨn mĩ la mĩ Bɨraɓe ye. Kɨtɔ i telɨn rosɨ go tagt lom al, ke turɨn go mberkɨndag lom al tɔ na i ɗan kɨgo nyabelɓegt lo girrdeg kɨ gugɨn dɔsɨ.
13Lon m'ndɨ m'elta kɨta Luwaht ɓaitɔ ye, Pelatia ngon Benaja woi. Kamla m'so kɨ takum'm na m'ko kɨ ndim kɨbobe m'an: Ah Bɨraɓe Luwah, a i nuj ndeg Israel tube e?
Ndeg Israelag a telɨn kɨ dɔningt lod
14Na ta lo Bɨraɓe ɗe romt an: 15Ah ngon de, ĩgɨn ɗan ĩn ngankõi, ngankõi kɨ girrkooj loi kɨ Israelag tube, Ĩgɨn non la ngéndɨ Jerusalem elɨnd anan: I nyan Bɨraɓe kɔ, awɨn sãi, Jĩ la, adjɨn dɔning 'nten nya kagɓet ye. 16Kɨtɔ 'nten, i eld an: Titbe kel Bɨraɓe Luwah, Rota m'ɔid, m'aw sed sãi ku girrdegt, m'tɨnda m'tĩd kɨ dɔningg kɨ dang dang na m'a mĩ loyaro lod kɨta kaglo kɨ tẽbe kam dɔninggt ĩn awɨnt. 17Kɨtɔ 'nten a i el an: Titbe kel Bɨraɓe Luwah: M'a m'kawsɨ ku girrdegt, m'a m'kawsɨ kɨnat ko kam dɔninggt ĩn i tĩn na tit na m'a m'adsɨ dɔning Israel. 18Lon telɨn, a oin nyag kɨyerr kɨ yog tube kamt kɔ. 19M'a m'ad'd ngarkam kɨɗa, m'a m'ũ ndil kɨkij kamdt, m'a m'ɔrr ngarkam kɨmbal ko kam dãdt na m'a m'ad'd ngarkam kɨdan, 20kɨtakad telɨn rod go tat lom na turɨn go mberkɨndag lom kɨ ngomɨn god, A ĩn deg lom na mĩ to m'a mĩ Luwah lod.
Bɨraɓe mbet ɓebo Jerusalem
21Na ta lo ĩgɨn kamd i do yogt lod kɨ nyag kɨ yerr lod ye, m'a mad nyaɗad tel so dɔdt, kel Bɨraɓe Luwah. 22Kamla Kerubg ten bɔgd na gãg ĩn nat sed na kunj Luwah lo Israel kɨɗangeɗeng i dɔdt dõ. 23Kunj Bɨraɓe kɨɗangeɗeng ɓai dan ɓebot na duba dɔ mbalbot kɨ gid ɓebot ko loɓakàd. 24Ndil unɨm aw sem kɨgo nyakookamndilt lo Luwah kam dɔning Kaldeat kɨro ɓergt Kam la nyakookamndilt in m'oo ye nyẽmɨr romt kɔ, 25na m'el ɓerg tag tube lo Bɨraɓe ĩn tee dɔ adɨm.
Currently Selected:
Ejekel 11: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
