Daniel 7
7
Nyakookamndilt'n Daniel oo
1Kam ɓalt kɨdasa bang lo kõɓe lo Beltasar, ngar kɨ Babilon ye. Daniel nii, na oo nyag kɨ kam ndilɨnt, lon ton dɔ tɨraɓit. Kamla ndang nii'n non, na ɔrr hoi dagɨro ta nyag'n non.
2Daniel el an: M'oo nyag kam ndilɨmt ndɔ, na m'oo nélg kɨsɔɔ kɨ dɔrãt lan kɨ tɔgd kɨdɔ bahbot.
3Dãg kɨbo sɔɔ ɓain, teen ko kam bahbokat't, in dang dang, titɨn kɨ na al. 4Kɨdasa i tit kɨ tubo be, na aw kɨ bɔgɨn kɨ tit kɨ bɔg yel kuro be; kamla lon m'to m'oo nyag nõ ɓaitɔ ye, tɔrrɨn bɔgag kɔ, unɨn na dɔningt kɨ dõ, adɨna ɗa dõ dɔ njant tit de be. Na adɨna goosɨ lo de tɔ. 5Kamla m'oo dã mad kɨɗang, i dã kɨkõjoo, tit dã urs be. Ɓai ɗa dõ kadɨnt kɔtkokɨɗa, na aw kɨ kɨnga dã mɨta kam tant dõ ngangɨnt. Elɨna anan: I ɓai dõ, i sa dã ngãibe. 6Go nyat'n non a ne, m'nɔl lo, na m'oo dã mad kɨɗang tɔ, tit kɨ kag be, aw kɨ bɔgɨn sɔɔ gidɨnt tit yel be. Dã'n non dɔa i sɔɔ, na adɨna tɔg kõɓe kɨkootɓool. 7Go nyagt'n non ye, m'oo nyag kam ndilɨmt ndɔ. M'oo dã kɨkõsɔɔ, i kɨkootɓool ngãi, ngah wong kɨdum, na aw kɨ tɔg ngãi kɨ tɔi. Nganga i hand kɨbobe, a la nyag nont yalɨm, a tɔd kɔsɨkɔsɨ, a ɓa ndeg nyag kɨ nãin mbujmbuj kɨber kɨ njant. Na i ngankodang, tit kɨ dãg kɨkete nõat nõ al, gaja i kɨlah. 8M'nɔl gaj dãg kɨkɨlah'n non, na m'oo gaj dã mad kɨdu ɓa kudt; ɗa ad gaj dãg mɨta. Na gaj dã'n non kuma i tit kum de be. Na taa ndɨ elta kɨ dɔsɨr.
Takɨgang lo Luwah
9Lon m'nda kum m'ɗa m'nɔlɨn nyag ɓaitɔ ye, ndan pongg kõɓeg, na. Ngendɨ maɗi nõ ndɔgt ɗe ndɨ dɔt ber. Kub loa ndà ngũng tit neij be, bisɨdɔa ar nyang tit bĩ bat kɨjanjoi be. Pong gangta loa i tit ndõhorrg kɨ kõ giling giling, nja pong kõɓe'n non loa i tit horr kɨ kõ mugɨj be.
10Horr kɨ tit bah be tee ko kɨnõat, nũ nõ Ngendɨ maɗi nõ ndɔgt. Deg dub nja dub dub ɗa ɗan kɨlaɓer adɨna, kɨdub dub kɨlahg ɗan nõat. Ngégangtag ndɨn ber, teen maktubg.
11Kamla m'nda kum m'nɔlɨn lo ɓaitɔ, kɨta gaj dã kɨ du'n kah ko ngãi. Na ndɨ elta kɨ dɔsɨr ye. Lon m'ndɨ m'nɔl lo ɓaitɔ ye, tɔlɨn dã kɨkõsɔɔ, tujɨn dãroa, na lana kam horrt kɨ õ giling giling. 12Na ndeg dãg taa ne, taan tɔg kõɓe lod, na nyand kɨ dɔd dõ kaglo sĩ ɓaitɔ. Na dɔboia i kɨ kɔj woi.
13M'oo nyag kam ndilɨmt ndɔ taa ne, m'oo nya nda kɨ titɨn na kɨ ngon de be, ɗe kam kilndiigt kɨ dɔrãt, ndɔt kɨro Ngendɨ maɗi nõ ndɔgt, na adɨna ndɔt kɨ nõat 14Na adɨna tɔg kõɓe kɨ tɔko kɨ kõɓe, kɨtakad deg tube kɨ girrdeg kɨ dang dang, kɨ deg kɨ ta ɓe lod i dang dang ɗan kɨlaɓer adɨna. Tɔg kõɓe loa tokɨnõt, na kõɓe loa to lotont kohgt lo kohg, kõɓe loa a nuj al.
Kɔrr girr nyakookamndilt kɨdasa
15Na mĩ Daniel kamm dam ta paa kɨta nyag'n m'oo kam ndilt, ad kamm gang man. 16M'ndɔt kɨro kɨkɨɗat ku ĩgɨtɨn ɗan lot'n non, na m'ndɨjea kad elɨm rota dɔ nyagt 'nten tube m'an: Nyag 'nten tube ye, girra jeje ye i ɗi a? 17Dãg kɨbo kɨsɔɔ'n non ye, ĩn ngarg sɔɔ kɨ a ɓain dɔningt.
18Godt, deg kɨjaɓat lo Luwah kɨ Ngetɔitɔi a taan kõɓe; kõɓe a i lod mbãkɨnõt, kɨ kohgt lo kohg. 19Kamla m'sah kĩm ger girr ta lo dã kɨ kõsɔɔ'n i dang kɨ dãg kɨmita nõ. I kɨkootɓool ngãi, aw kɨ ngang kɨ hand, kɨmunrĩ njaa i kɨ ningakasɨ, la nyag tube nont yalɨm, tɔɔd kɔsɨkɔsɨ, na ɓa ndeg nyag kɨ njan mbujmbuj kɨber. 20M'ndig kĩm ger girr gaj dãg kɨkɨlah'n i dɔ dãt'n non, kɨ gaj kɨmad'n non in ɓa, in gaj kɨmita son nõat, gaj dã'n non aw kɨ kumɨn ho kɨ tan kɨta kelta ndɨ elta kɨ dɔsɨr kɨ tɔi lo ndeg namɨng. 21Na lon m'ndɨ m'oo lo ɓaitɔ ye, gaj dã'n non mbagɨr ɗɔɔ kɨ deg kɨjaɓat, na ɗa kɨ'n tetd ɗɔɔ, 22mbã kad Ngendɨ maɗi nõ ndɔgt ɗe gangta ad deg kɨjaɓat lo Luwah kɨ Ngetɔitɔi, na kaglo asɨ woi ye, girrdeg lo Luwah ngahn kõɓe.
23De'n m'ndɨjea ta ye, ɔrrɨm girrta ye titbe elɨm an: Dã kɨkõsɔɔ ɔj go: Kõɓe kɨ kõsɔɔ'n a õɓe dɔningt, kõɓe loa a i ngankodang, a i tit kɨ ndeg kõɓeg al, a taa lo kɨ dɔningt kɨtaagbe, a ɓa madngétaang mbujmbuj kɨber girr njant, a tɔd kɔsɨkɔsɨ tɔ. 24Ta lo gajg kɨkɨlah i titbe: In ngarg kɨkɨlah kɨ a ɓain kam kõɓet'n non, na ngar mad a ɓai godt, a i ngankodang, a i tit kɨ ngarg kɨkete nõat al, a ɔsɨ ngarg kɨmita lad kɔ, na a taa kõɓe jid. 25Na a eltag ndoorɨn Luwah kɨ Ngetɔitɔi, a da kum girrdeg lo Luwah ndo, kɔjtaɗa loa i kad'n mbel kaglo ɗa nahg kɨ mberkɨndag'n deg lo Luwah ndɨ telɨn rod got. A õɓe dɔ girrdegt lo Luwah asɨ ɓal mɨta kɨ nusɨ. 26Kamla ta kɨ gang lo Luwah a so dɔat, a taan tɔg kõɓe jiat, na a nujɨna kɔ mbãkɨnõt.
27Na kõɓe, kɨ tɔg kõɓe, kɨ tako lo kõɓe kɨ girr dɔrãt kɨtaagbe a adɨn degt kɨjaɓat lo Luwah kɨ Ngetɔitɔi. Kõɓe lod a i kõɓe kɨ a tokɨnõt, kõɓeg kɨ dang dang tube a ɗan kɨlaɓer adɨnd, a telɨn rod go tat lod.
28Girr ta 'nten tɨga nẽbe. Na mĩ Daniel ta a ne, kamm gang man ngalang, ad takum'm ɓa ndà, na m'ngom nyag'n non kammt.
Currently Selected:
Daniel 7: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
