Daniel 6
6
Luwah ug Daniel ɔrra ta tubogt
1Darius, de kɨ Mede la, ta kõɓe, ɓala asɨ dɔkɨbojidet gidaijoo.
2Darius ndig kad ndah mbaiɓeg ɓu kɨ kam ɓalt dɔ kõɓet kɨtakad ndɨn kɨ log tube dɔ kõɓet.
3Ndah bɨradɔd mɨta kɨtakad mbaiɓeg'n non dan kɔr nyag lo ngar rodt. Daniel i kɨkɨɗa ku bɨradɔgt'n non, kɨtakad nya lo ngar nãin kɔ al, na ɓeta ngar ɓawong. 4Kamla Daniel'n non ngah tɔko tɔi ndeg bɨradɔg kɨ mbaiɓeg kɨta ndil kɨmaj i kamat, na ngar nda kamɨnt kad ndaa dɔ kõɓet kɨtaagbe. 5Taa ne, bɨradɔg kɨ mbaiɓeg sahn ta kad lan kɔ Danielt dɔ ta nyagt lo kõɓe, na asɨn ngah ta kɨ la kɔat al, ke ɗagootal roat kɨta i de kɨro ngahn ta mad kɨmajal ke ɗagootal roat al.
6Kamla deg'n non elɨn anan, a ngahn ta mad kɨ la kɔ Danielt al bat; ɓet a ngahn ta mad dɔat dɔ ta mberkɨndat lo Luwah loa.
7Bɨradɔg kɨ mbaiɓeg'n non ndan tad nat awɨn ro ngart, elɨna anan: Ngar Darius, kɨ i ndɨ kɨ dɔi dõ mbãkɨnõt.
8Bɨradɔg dɔ mbaiɓegt tube kɨ ngékõɓeg, kɨ mbaiɓeg kɨ ngékɔjtag kɨ bɨrangekõɓeg ngahn na unɨn ndikun mad kɨngang kɨɗa, kad ngar ndamber mberkɨnda kɨ ɔg dɔ dekɨɗen kɨ elta ke a kɔ nya mad de al, ke luwah mad al kam ndɔt kɨdɔmɨta, na ĩ ngar kɨ kɨɗaibe koon la deg a kɔi nya ye, ĩla i be al a ne, a lan de'n non kam bulo tubogt. 9Tajigla, ngar, i nda mber kɔg dɔ ɗa nya 'nten, i ndang tɔi dɔ ta kɨndangt, kɨtakad de mbel al kɨgo mberkɨndat lo Medeg kɨ Perseg kɨ dum kad de ɔrr ta kɨ kamt. 10Kɨtɔ 'nten la ngar Darius ndangɨn tɔn dɔ mberkɨndat kɨndang kɨ mberkɨnda kɔg dɔ ɗa nya'n non.
11Lon Daniel ger kad ngar ndang tɔn dɔ mberkɨndat kɨndang'n non ye, and kam kujt lon in penetɨrg kɨ kujt kɨ dõ ɗan tag sumba dɔ ɓebo Jerusalem sew; ɔsɨ gojɨn ber nja mɨta ndɔ kɨɗa, elta kɨ Luwah lon, na ɗaa mersi tit'n a ɗan maɗi.
Lan Daniel go tubogt
12Kamla deg'n non ɗen kɨta ndan tad nat kete, na ngahn Daniel lo keltat kɨ Luwah lon, ndɨ koa kɨ rotĩn. 13Awɨn ro ngart, na elɨna ta dɔ saria kɔg dɔ ɗat, anan: In ngar, i ndang tɔi dɔ saria kɔg dɔ ɗat, kɨtakad dekɨɗen kɨ a kɔ nya de mad ke luwah mad kam ndɔt kɨdɔmɨta, na in ngar kɨ kɨɗaibe al a ne, a lana kam bulo tubogt, ale? Ngar tur an: Nya 'nten i ro ruba kɨgo sariat lo Medeg kɨ Perseg kɨ dum kor kɔ. 14Kamla deg'n non elɨn ta nõ ngart anan: Daniel'n non, kɨkɨɗa ku kɨhɔgt kɨ Juda, tur go ta loi al ngar, tur go saria kog dɔ ɗa kɨ i ndang tɔi dɔt al tɔ, na ndɨ elta kɨ Luwah lon nja mɨta ndɔ kɨɗa.
15Lon ngar oo dɔ ta 'nten ye, kama tuj ngãi, nda kamɨnt kad kɨ n'ɔrr Daniel, ndur yon mbã kàd ud kɨta kad kɨ n'ajan.
16Taa ne, deg'n non ndan tad nat ɗen ro ngart, elɨna anan: Ngar i ger ɓet, mberkɨnda lo Medeg kɨ Perseg i titbe: mberkɨnda kɔg dɔ ɗa, ke mberkɨnda kɨɗen'n ngar ndang tɔn dɔt a ne, dum kɔrr ta madt kɔ. 17Kamla ngar el kad ɗen kɨ Daniel, na kɨ lana kam bulo tubogt. Ngar el Daniel an: Ad Luwah loi in i ndɨ ɗa kɨlaɓer loa kɨndɔgndɔg ye, ug ɔrri. 18Deg ɗen kɨ mbal utɨn ne ta bulo, na ngar ɔsa kɨ kase kɔsɨ dɔ nya lon kɨ kase kɔsɨ dɔ nya lo mbaiɓeg lon kɨtakad mbelɨn nya mad al dɔ tat lo Daniel.
19Kamla ngar and kam kuj kõɓet lon, na ɔg ron nyasa kondɔt'n non ad ɗen kɨ dekɨdẽg roat al, ɓi ho kuma al tɔ.
20Lon bijalo ɓai woi ye, ngar ɓai kanangbe aw ta bulo tubogt.
Daniel tee go tubogt kɨkanj kad nya mad ɗaa
21Lon tee ta bulo tubogt ye, ko kɨ ndɨ kamkil kɨdɔ Danielt, an: A. Daniel, ber lo Luwah ngekumkajɨr, Luwah loi in i ndɨ ɗa kɨlaɓer loa kɨndɔgndɔg asɨ kug kɔrri ta tubogt a? 22Kamla Daniel el ngar an: Ngar, kɨ i ndɨ kɨ dɔi dõ mbãkɨnõt. 23Luwah lom la malaika lon ad ut ta tubog, na ɗamɨn majal al, kɨta ngahmɨn kɨkanj ta nõat kɨ kɨnõit tɔ ngar, m'ɗa nya mad kɨgoot al al. 24Kamla ngar ɗa ronel ngãi, na el kad ɔrrɨn Daniel kam bulo tubogt kɨtɨga. Ngahn dó mad roat al, kɨta ɓakul Luwah lon.
25Ngar el ad ɗen kɨ deg kɨ ngela ta kɔ Danielt ye land kam bulo tubogt, ĩn kɨ ngandg kɨ nẽdg, na lon son ɔdɨn girr bulo al ɓaitɔ ye, tubog hɔnd tetɨn kɨngad tube.
26Kamla ngar Darius ndang ta 'nten lan kɨro degt tube kɨ girrdeg kɨ dang dang tube ngéndɨ dɔningt kɨtaagbe, an: Kɨ i ndɨn kɨ lapia kɨngãi.
27M'nda mber kad deg kɨ kam kõɓet lom kɨtaagbe ɓoolɨn kɨ rondad nõ Luwaht lo Daniel kɨta i Luwah kɨ ngekumkajɨr ndi londɨnt mbãkɨnõt kõɓe loa a nuj kɔ al bat, tɔg kõɓe loa a aw mbã kɨ dɔboit.
28I ngekug kɔrr kɨ ngetaa deg lon,
ndɨ ɗa nyakɔjg kɨ nyag kɨyaya
kam dɔrãt dõ kɨ kam dɔningt.
I ngekaj Daniel ta tɔg tubogt.
29Titbe la maj urrɨn Daniel'n non kaglo kõɓet lo Darius kɨ kaglo kõɓe lo Sirus kɨ i Perse.
Currently Selected:
Daniel 6: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
