Daniel 11
11
1Na mĩ Mikael, kam ɓalt kɨdasa bang lo Darius, de kɨ Mede, m'ɗa kadat kɨta ɗa sia kɨ kad ngang. 2Tajigla m'a m'adi i ger nyag'n ɓet a ɗan nya jeje. Oo, ngarg mɨta a ɓain kam dɔning Perset ɓaitɔ, na ngar kɨkõsɔɔ, a i ngenyamajg tɔid tube, na lon ngah tɔg ngãi kɨtakul nyamajg lon a ne, a sila deg tube kad n'ndoorɨn kõɓe lo Grekg.
Ɗɔɔ to mbɨna ngargt kɨ ɓodo kɨ dɔɔ
3Na ngar mad kɨ i kɨrãɗɔɔ a ɓai, a õɓe dɔ dɔninggt kɨ tɔg ngãibe, na a ɗa kɨgo ndigt lon. 4Na lon ngah tɔg a ne, kõɓe loa a so, kɨ kegɨna kɨgo kogt kɨsɔɔ, ĩn nélg kɨsɔɔ a ɓaint, na a adɨn kõɓe loa ngakat kɨ ngaka al, kõɓe a i kɨ tɔg ngãi tit kɨkete al tɔ, a ɔrrɨn kõɓe loa kɔ, a adɨn deg madg, na ngakaa al.
5Kamla ngar kɨɓodo a ngah tɔg ngãi, na kɨkɨɗa ku mbaiɓegt loa a tɔia kɨ dõ.
6Go ɓalgt kɨ asɨ tat ye, a unɨn kɔd adɨn na, na ngon kɨdẽ lo ngar kɨɓodo a taa ngar kɨdɔɔ kɨtakad ladɨn nooj nat, na tɔg ji ngon kɨdẽ'n non a tokɨnõt al, ngawa kɨ ngana a ndɨn kɨ dɔd dõ al tɔ, a lan ngon kɨdẽ'n non kɨ koit nat kɨ ngékɨlaɓerg loa kɨ ngona kɨ ngeɗasia ad i ngawa kaglot'n non.
7Na de mad girrkoojt loa, a ɓai ga goot bɔwa, a ɗe ɗɔɔ kɨ bahkad koosɨ ngéɗɔɔg lo ngar kɨdɔɔ, a and kam kuj ngomdɔɓet loa, a dum dɔd, a tetd ɗɔɔ. 8A ɔi yog lod kɨ ɓakumta nyag lod kɨlẽ kɨjoo lɔrg kɨjoo larjãg lod kɨ gatd i ngãi awɨn dɔning Ejipt't, na a ta ko dɔ ɗɔɔt kɨ ngar kɨdɔɔ ɓal madg. 9Kamla ngar kɨdɔɔ a ɗe kɨ ɗɔɔ kam kõɓet lo ngar kɨɓodo, na tɔga a asɨ al; a tel dɔningt lon gog.
10Na ngan ngar kɨdɔɔ a ɓain kɨ ɗɔɔ, a kawɨn bahkad koosɨ ngéɗɔɔg kɨnat, a awɨn tit mankõn be, a tɔin, a ɗɔɔin mbã kɨ kuj ngomdɔɓe lo ngar kɨɓodo. 11Kamla wong a tɔl ngar kɨɓodo sɔkɨr, a tee, a ɗɔɔ kɨ ngar kɨdɔɔ, ĩ tɔ a ɓai kɨ bahkad koosɨ ngéɗɔɔg, na a lan bahkad koosɨ ngéɗɔɔ'n non ji ngar kɨɓodot. 12Na lon a hɔ bahkad koosɨ ngéɗɔɔ'n non a ne, dɔa a sir, a tɔl deg dubg nja kɨlahg, titbe ka a dum dɔ al. 13Kɨtɔ ngar kɨdɔɔ a ɓai kɨ bahkad koosɨ ngéɗɔɔg ngãi tɔi kɨkete nõ, na go ɓalg madgt ɗe dɔat kɨ bahkad koosɨ ngéɗɔɔg kɨ nyaɗɔɔg ngãibe tɔ. 14Na kaglot'n non ye, deg ngãibe a ɓai ndoorɨn ngar kɨɓodo, na deg kɨ ngéɗa ta kõ ku degt loa a ɓain kɨta tɔlkon nyakookamndilt 'nten, na a son. 15Kamla ngar kɨdɔɔ a ɗe, a ad ɓan ning kɨ dõ kad ndogbɔrr ɓebot, na a ta ɓebo kɨngang'n non. Koosɨ ngéɗɔɔg kɨɓodo kɨ gõɗɔɔg kɨkɔt lo ngar a ɗan loɗadt al kɨta tɔgd kad ɗan ne loɗadt a goto. 16Na ngar kɨdɔɔ kɨ a ɗe ndoora ye, a ɗa kɨgo ndigt lon; de mad kɨɗa kɨ a ɗa loɗant nõat a goto, a ɗe kam dɔningt kɨmaj ngãi ad i dɔning Israel, na dɔning'n non tube a so jiat. 17Kamla ngar kɨdɔɔ a ndah kamɨnt kad ɗe kɨ tɔg kõɓe lon tube, a ɗe kɨ kɔjtag kɨtakad ĩ kɨ ngar kɨɓodo lan ne nooj nat, na a ɗa kɨgo kɔjtagt'n non, a ad ngar kɨɓodo ngonɨn kɨdẽ kad ta'n kõɓe, na maj a ura kam kɔjtaɗat loa nõ al, a taa kõɓe kɨɓodo al. 18Kamla ngar kɨdɔɔ a ɓet tan kɨ dɔninggt kɨkad bahbot ko lokudkàdt, na a taa dɔningg madg ngãibe tɔ, kamla bɨraɗɔ mad a ad nyaɗaa kɨgo lo kidt tɨga, tel so dɔat gog. 19Taa ne, ngar a nda kumɨn go ɓebogt kɨngang kɨ ɗan kɨ kuj ngomdɔɓegt kɨ kam dɔningt lon kɨ kɔsɨ dɔn. Na i nya mad al. Na oi, kanj kad de mad oo banga lo madt. 20Goot gog de mad a ɓai ga goota, a la kɨ de ngetaa nya ji degt kɨ lo ngetɔgt kam dɔninggt kɨmajtɔi kam kõɓet lon, na go ndɔgt ngãi al a tɔlɨna, a i ta ɗɔɔt al na ĩ ta kɨ laber.
21Na de mad kɨ kari pãbe la a lan kõɓe jiat ye, i de kɨ sumba de ndah ngart al. Na taa kõɓe kɨ goɗob kɨ gootal kɨ ndo deg kɨ tag kɨ to pehpeh. I kaglo'n deg ndɨn kɨ lapia. 22Koosɨ ngéɗɔɔg kɨ asɨn tetɨnɗɔɔ goto ãin nõat tit mankõ be, a tetɨnd ɗɔɔ, na a tɔl bɨra ngejamosɨkadkari tɔ ho.
23Na ngar'n non lon un kɔn kɨ de mad a ne, i kɨgo lo ndokumt, a ɓai aw ɗɔɔ kɨ de'n non, a ngah tɔg kɨdɔt dɔt. Deg ngãibe a son goat. 24Lon deg a ndɨn lom ye, a and kam dɔningt'n kand nyag kɨmaj ngãi tont mbuj kam nusɨ dɔningt kɨ Ejipt, a ɗa nya'n bɔwag ke kaag maɗi nu ɗan al, a keg nya kɨ ɓoog ad deg kɨ ngéndulo goa, kɨta a ɔj ta kamɨnt kad kɨ n'taa kuj ngomdɔɓeg, nya 'nten a ɗa nya kaglot kɨ tẽbe.
25A ɓai kɨ tɔgɨn, a ire kamɨn ngang kad ndoorɨn ngar kɨɓodo kɨ koosɨ ngéɗɔɔg, na ngar kɨɓodo a ɓai aw ɗɔɔ sia kɨ bahkad koosɨ ngéɗɔɔg ngãibe, na ngar kɨɓodo a asɨ al, kɨta deg a lan tad ber ndoorɨna ne. 26Kɨtɔ, deg'n in nat sia, ndɨ san sia kɨɗabe la tujɨna, na ngar kɨdɔɔ a tuɓa bahkad koosɨ ngéɗɔɔg loa, na deg ngãibe a oin. 27Na ngarg kɨjoo'n non a san ta tabɨlt kɨɗabe na kamd a sah ɗob kɨta ɗa majal kɨ na koon, tag tube a elɨna ye, i tag kɨbal. Na takɔj lod i kari kɨndang kɨta dɔboi nyag a ɗen kɨ kaglo'n i kɨ gang kete woi.
28Ngar kɨdɔɔ a tel kɨ dɔningt lon gog kɨ nyamajg kɨngãibe. Goot gog a nda kamɨnt kad kɨ n'ɗɔɔ kɨ deg lo kunkɔ kɨjaɓat; a ɗa kɨgo ndigt lon kamla a tel kɨ dɔningt lon gog ɓaitɔ.
29Kaglo'n i kɨ kɔj kete woi ye, ngar kɨdɔɔ a tel ɗe gog kam dɔningt kɨɓodo, na kaw ɗɔɔ loa kɨdɔboit ye, a i tit kɨ kɨdasa al. 30Kɨtɔ deg kɨ ko lokudkàdt a ɗen kɨ toog kɨbo kɨ Kɨtim ad Sipɨr ɗɔɔn sia, a ndana ɓoolt, ad a tel kɨgog. Taa ne, a ɓan wong kɨ tɨngabil kɨ deg'n Luwah un kɔn ad'd. Na a nda ron kɨɗabe nat kɨ deg'n mbetɨn kunkɔ lo Luwah. 31A la kɨ koosɨ ngéɗɔɔg lon, kad yerrɨn kɨ kuj kɨjaɓat kɨ kuj ngomdɔɓe, a ɔgɨn dɔ kadkari kɨlahorrt. A udɨn nya kɨyerr kɨ ngenujɓe ad ɗa dõ.
32Ngar ĩ kɨɓe kɨ dɔn kɨtakul tag kɨ to pehpeh kɨ taat, a ndoo deg kɨ ngétɔi dɔ kunkɔ lo Luwah, na deg kɨ ngéger Luwah lod a ɗan loɗadt bijir, na a ɔjɨn kadkam lod kɨ tɨga wakɨsɨ. 33Ngényager kɨmaj ku degt'n non a ndoon deg ngãibe, na kam kaglot kɨ tẽbe a tɔlɨn kɨmad kɨ kiyaɗɔɔ, kɨ mad horr a hõd, na kɨ mad a hɔnd ɓert, a tirɨn nyag lod pur. 34Kaglot'n non i kaglo'n deg dain yod titbe a ne, de kɨ kad ɗa sed kɨ jaraw. Deg ngãibe a ndulon god kɨgo lo ndokumt. 35Na kɨmadg ku ngényager kɨmaj'n non a ɔin na koi lod a i ta ɗob kɨ tee kɨta kad girrdeg lo Luwah telɨn kɨ kar nyang, na kɨ ɗan go ron kɨta kaglo kɨ dɔboit.
Kɨtɔ nya 'nten a ɗa nya kaglot kɨ gang kete woi.
36Ngar'n non a ɗa kɨgo ndigt lon, a tɔi ron, a tɔi dɔn kɨ dõ dɔ luwahgt tube, a eltag kɨbobo ndoorɨn Luwah lo luwahgt. Maj a urra kam nyagt tube'n a ɗa mbã ndɔt'n wong kɨtɔlsɔkɨr lo Luwah a mbagɨr. Luwah a tɔlkon nya'n ndambera kad'n ɗa. 37A tur go luwahg lo bɔwɨng al, ke nyandɨg lo dekɨdẽg, ke luwah mad kɨɗang kɨta a tɔi dɔn kɨ dõ dɔdt tube, 38na a ɔsɨgon luwah mad kɨ ngeɗa sia kad taan kuj ngomdɔɓeg gan goot luwahg'n non, a ad luwah mad'n bɔwag gerɨna al lɔr kɨ larjã kɨ medkɔsɨg kɨ gatd i ngãi ɔsɨn gon luwah'n non. 39A taa kuj ngomdɔɓeg kɨngang ngãi kɨtakul tɔg lo luwah mad kɨmbah, na deg'n ndɨgna luwah kɨ mbah'n non a ne, ngar'n non a tɔid kɨ dõ kɨ kɔsɨgon. A tel deg'n non ngékõɓeg dɔ degt ngãibe, na a kegd dɔning nyabajit lod.
40Kaglot kɨdɔboit, ngar kɨɓodo a tee kad ɗɔɔ kɨ ngar kɨdɔɔ'n non, ngar kɨdɔɔ a hura yedeng tit nélbarwãi be, kɨ pusɨɗɔɔg kɨ ngékal sɨndag kɨ too kɨbo kɨta kaw ɗɔɔg ngãibe, a andɨn kam dɔninggt kɨ dang dang, a nda lo gang na a taa lo tit man kɨ tɔi dɔ kongɨr, 41A and kam dɔningt kɨmaj ngãi, ad i dɔning Israel. A tɔl bahkad koosɨ deg ngãibe, na dɔning Edom kɨ dɔning Moab kɨ Amoniag ngãibe a teen jiat kɔ. 42A la jin taan dɔningg kɨ dang dang, na dɔning Ejipt a tee jiat al. 43A tɨr nyamajg ad i nya lɔrg kɨ nya larjãg kɨ nyag kɨ gatd i ngãi kɨ kam dɔning Ejipt't tube ndɨdɔt, na Libiag kɨ Etiopiag a dɔd girr tɔgt. 44Na hoitag kɨ ko loɓakàdt kɨ ko dɔɔ a ad kama gang man, a tee kɨ wong kad n'awɨn tɔ koh deg ngãibe, kɨ'n nujd kɔ. 45A ɗa kujkub lon kɨmaj tit kuj kõɓe be kɨ dõ mbɨna bahbot kɨ mbalbo kɨjaɓat kɨ kɨmaj dum, titbe kaa ne, a tee dɔngoint, na de mad kɨ ngeɗasia a goto.
Currently Selected:
Daniel 11: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
