Kɨlag 9
9
Sool ad kamɨn Krist
1Kaglot'n non, Sool taakò al, na tuɓa go ngéndoog lo Bɨraɓe, mbad kad'n ɗa sed majal ho, n'tɔld ho. Aw ngah bɨradɔ ngejanyamosɨkadkari, 2ndɨje maktub roat kad n'ad kɨbog lo kuj kawna lo Juipg kɨ Damasɨt. Kam maktubgt'n non ndɨje ta ɗob kad'n hɔ dekɨdɨngãg kɨ dekɨdẽg'n ndɨ ndulon goɗob lo Bɨraɓe kɨ n'ɗe sed Jerusalemt.
3Sool i dɔ ɗobt ɓaitɔ, nãi nderbe kad ud ɓebo Damasɨt, tentenbe kunj mad ɓai ko dɔrãt, ɓa busɨ dɔat unj gug dɔa, 4ad Sool so ber, kamla oo dɔ ndi de mad ela an: Sool, Sool, kɨtɔɗi i ndɨ i dakum ndo a? 5Sool ndɨje an: Ĩ nõ a Bɨraɓe? Ndi de tur an: I mĩ Jeju kan i ndɨ i da rom ndo nõ. 6I ɓai dõ, and kam ɓebot, a elɨn nya'n a i ɗa nõ.
7Deg'n awɨn nat sia ye, dɨba ɗan god mbo. Oon dɔ ndi de, na oon de mad al. 8Sool ɓai dõ, na lon tee kumɨn ye, oo nya mad al, tel mundo. Hɔn jia ɔrrɨna ne ta ɗob andɨn sia Damasɨt. 9Asɨ ndɔ mɨta Sool oo lo al, sanya al ho, ãi man al ho.
10Kam ɓebot kɨ Damasɨ, ngendoo lo Jeju mad ndɨ nõ tɔa i Ananias, Bɨraɓe ada oo nyakam ndilt, na ela an: Ananias. Ananias tura an: Mĩ la m'ɗan Bɨraɓe.
11Bɨraɓe ela an: I ɓai dõ, aw dɔ ɗobt kɨ a kunɨna ɗob kɨ dene, and kam kujt lo Judas, i ndɨje de mad tit nõ kɨ tɔa i Sool, i de kɨ Tarsɨ. De'n non ndɨ elta kɨ Luwah. 12Na oo nya kam ndilt, oo de mad tɔa i Ananias and goat, nda jin dɔat kad kuma tee ad oo lo.
13Ananias tur an: Bɨraɓe, m'oo hoi de'n non ro degt ngãibe, m'oo kah de'n non kɨ majal tube'n ɗa kɨ ngéndoog lo Krist kam ɓet kɨ Jerusalem. 14De'n non ngah tɔg nẽbe kokɨro kɨbogt lo ngéjanyamosɨ kadkari kad hɔ deg'n hã ndɨ kunɨn tɔi.
15Na Bɨraɓe el Ananias an: Aw i ngah de'n non; kɨta m'kɔta kad ɗa kɨla. A ad girrdeg kɨ dang dang, kɨ ngarg, kɨ deg kɨ Israelt gerɨn tɔm. 16M'a m'ɔja kõg tube'n ɓet a ngah kɨtatɔm.
17Ananias ɓai aw and kam kujt'n Sool i tit. Nda jin dɔ Soolt kamla el an: Ngonkom Sool, i Bɨraɓe Jeju'n hã tee dɔit dɔ ɗobt nõ la, lam kɨ dɔit kad kumi tee ad oo lo ye, kad Ndil Kɨkunjɗang ɗoosɨ kami tɔ ho ye.
18Kaglot'n non, tajigt nya mad kɨ tit ngɔnya be urr kum Soolt kɨ ber, ad oo lo ar nyang, ɓai dõ, na ad ɗana baptem. 19Kamla sanya kad ngahn tɔg kam kɨnga ront.
Sool la mber ta lo Jeju ɓebot kɨ Damasɨ.
Sool ɗa ndɔ ngãi al nat kɨ ngéndoog lo Krist kam ɓebot kɨ Damasɨ 20Tentenbe, mba girr la mber ta lo Krist kam kuj kawnat lo Juipg an: Jeju i Ngon Luwah.
21Deg tube'n oon dɔ ta loa ye, ta yad ad elɨn anan: I de'n ɗan hã ɗa da kum deg ndo Jerusalemt kɨta ɔsɨn dɔd ber nõ Jejut ye ale? I kɨta nya 'nten hã ɗen Damasɨt kad'n hɔd n'dɔɔnd na n'aw sed n'ad ngéjanyamosɨkadkari ale?
22Na Sool taa ne, elta kɨ kam kɨmisɨmisɨ ɔj kɨ tɨga wakɨsɨ an: Jeju i Krist, i kɨ wur lo Luwah, ad dumdɔ Juipg'n ndɨn ɓebot kɨ Damasɨ.
23Lon ndɔg tɔin asɨ tat be ye, Juipg ɔjɨn na ta kad'n tɔlɨn Sool. 24Ndɔ ho kàda ho ɗa ngomɨn tabitg kɨ kand kamɓet kad'n tɔlɨna, na hoitaa so mbi Soolt. 25Na ngéndoog lo Jeju, unɨn Sool ndɔ, ndana kam jangt, tuin na dɔ ndogbɔrrt kɨ ber.
Sool aw ɓebo Jerusalemt
26Lon Sool tel aw Jerusalemt gog ye, sah kɨ'n nda ron nat kɨ ngéndoog lo Jeju. Na ngéndoog ɓoolɨn, kamd ta al kad Sool tel ngendoo lo Krist kɨ jeje. 27Na Barnabas la una ɗe sia ɔja ngombangkɨlag ho, eld titbãi hã dɔ ɗobt kɨ Damasɨ Sool oon Bɨraɓe ho, Bɨraɓe ela'n ta ho, lan mber hoita kɨmaj kam tɔ Jejut kɨ kam kɨmisɨmisɨ kam ɓebot kɨ Damasɨt.
28Kaglot'n non Sool i nat kɨ ngombangkɨlag, ndɨ aw sed ho, ndɨ tel sed ho kam ɓebot kɨ Jerusalem, a la mber ta kam tɔ Bɨraɓet kɨ kam kɨmisɨmisɨ. 29Ndɔd Juipg kɨ Grekg, majɨn na sed ta, na ĩgɨn non lan tad ber, sah kɨ'n tɔlɨna. 30Na lon ngankõg oon nya 'nten ye, awɨn sia ɓebo Sejaret, kamla adɨna aw ɓebot kɨ Tarsɨ.
31Kaglot'n non ngékawna kɨ dɔning Judet kɨ dɔning Galile, kɨ Samari kɨtaagbe ndɨn kɨ lapia, tɔgɨn kam kadkamt; ndɨ awɨn kɨ ketekete kam ɓool Bɨraɓet, kɔrd bɨla kɨ dɔt dɔt kɨta Ndil Kɨkunjɗang ɗa sed.
Pierr aw ɓebogt kɨ Lida kɨ Jope
32Pierr a lago ɓeg kɨ n'oo ngétaata lo Krist, ndia tee dɔ degt kɨjaɓat lo Luwah ĩgɨn ndɨn ɓet kɨ Lida. 33Pierr ngah de mad tit nõ tɔa i Ene. De'n non to kɨ kɔtɨn dɔ tɨrat ɓal jijoo, roa oi njɔrr. 34Pierr ela an: Ene, Jeju Krist yooti dɔ mõit loi, i ɓai dõ, i kaw go nya toi.
Tentenbe Ene ɓai dõ. 35Deg kɨ ngendɨ ɓebot kɨ Lida kɨ dɨlalo kɨ Sarõ tube, lon oon nya 'nten ye, telɨn kɨ ro Bɨraɓet.
Pierr ad Tabita ɓai lo koit
36Kam ɓet kɨ Jope, dekɨdẽ mad ndɨt nõ, i ngendoo lo Jeju, na tɔa i Tabita, a kunɨna Dorkas girr tɔa i kɨ ta grek i wal. Dekɨdẽ'n non, kɨ kaglo tube ɗa maj kɨ deg ngãibe ho, ɗa kɨ ngéndog ho. 37Ndɔ mad mõi ɗaa, ad oi. Lon ndogɨna man woi ye, lana kam kujt kɨ dõ. 38Lon ngéndoog lo Jeju oon hoi Pierr kad i kam ɓet kɨ Lida, kɨta i sãi al kɨ Jope ye, lan kɨ deg joo kad elɨn Pierr kɨ ɗe rodt Kanag kanj ndɨ kɔkɨ. 39Pierr kaa ne ɓai kanangbe aw sed. Lon a tee Jope ye, tɔi awɨn sia kam kujt kɨ dõ non. Ngéngawkoig tube ndɔt'n kɨ roat, ɗa non, ɗa dan ngamajg kɨ kubg'n Tabita ɗan sed lon ndɨn kɨ dɔn dõ ɓaitɔ. 40Pierr ad deg tube teen tɨga kamtã la ɔsɨ gojɨn ber, elta kɨ Luwah, kamla ɓet tan kɨ dɔ nint el an: Tabita i ɓai dõ.
Taa ne, Tabita tee kumɨn, lon oo Pierr ye, ɓai ndɨ dõ. 41Pierr la jin unɨn Tabita kɨ dõ. Kamla kun ngétaata lo Krist kɨ ngéngawkoig, la Tabita jidt kumkajir. 42Deg tube'n ndɨn Jopet, lon oon hoi nya'n ɗa nya ye, ngãibe taa'n ta lo Bɨraɓe. 43Pierr ɗa sed ndɔ ngãi kam ɓet kɨ Jope, ndɨ kuju lo Simõ kɨ ngékɔrrgidndar.
Currently Selected:
Kɨlag 9: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
