Kɨlag 8
8
Sool da kum ngékawna ndo
1Sool la kɔn nat kɨ deg'n tɔlɨn Etien. Ndɔt'n non darondo kɨbobe mba girrɨn dɔ ngékawnat kɨ ɓeɓot kɨ Jerusalem. Ngétaata lo Krist tube tĩn na kɨ log, kɨ go ɓeg tube, kɨ kam dɔning Jude, kɨ dɔning Samari, na ngombangkɨlag koon la nãin kam ɓet kɨ Jerusalem ye. 2Deg madg kɨ ngéɓool Luwah unɨn nin Etien aw duwɨn, nõna ngãibe.
3Na Sool ndig kad'n tuj ngékawnag. Aw kɨ kam kujg; a ɔrr dekɨdɨngãg kɨ kɨdẽg kɨ tɨga, lad dangait.
Pilip la mber hoita kɨmaj Samarit
4Ngétaata lo Krist'n tɨnda tĩnd kɨ lo lo ye, awɨn kɨ yo kɨ la, a lan mber ta lo Luwah. 5Pilip aw ɓebot kɨ Samari, la mber Hoita kɨmaj lo Krist. 6Koosɨdeg nelɨn mbid oon ne dɔ ta'n Pilip el nõ kɨ kam kɨkɨɗa, kamla oon nyag kɨ yaya'n ɗa ad oon kɨ kumd tɔ. 7Kɨtɔ ndilg kɨyerr teen kam degt kɨ ngémõig ngãibe, kɨ ko tadt kɨ ndid kɨbo. Deg madg ngãibe kɨ ngérokoinjɔr kɨ mootg yootɨn. 8Ad deg ɗan ronel ngãibe kam ɓet'n non.
9De mad ndɨ nõ tɔa i Simõ; de'n non, maɗi ɗa mbooli, ad taa ya deg biw kam ɓet kɨ Samarit. Simõ oo ron de madt kɨ ndaa i ngãi 10Ad ɓai dɔ ngan kɨdugt teen dɔ de kɨbogt, deg tube nelɨn mbid kɨgo tat loa koon, ad elɨn anan: De'n ɗan i tɔg lo Luwah'n a kunɨna tɔg kɨbo tɔi.
11Deg nelɨn mbid kɨgo tat loa ngãi kɨta maɗi nu la ɗa ɗa nyag kɨ yaya kɨ nyaɗa kɨgo lo mboolit ad dumɨn dɔd ye. 12Na lon taan Hoita kɨmaj lo Krist kɨ ɔj dɔ kõɓe lo Luwah'n Pilip la mbera ye, dekɨdɨngãg kɨ dekɨdẽg ngãibe ad ɗand baptem. 13Titbe tɔ la Simõ kɨ dɔn kaa ne, telɨn ngetaata lo Krist ho ye, ad ɗana baptem ho, na nyàgo Pilip al, kɨta oo nyag kɨ yaya, kɨ nyakɔjg kɨdangdang'n Pilip ɗa ye, ĩ tɔ ta yaa biw.
14Ngombangkɨlag'n ndɨn ɓebot kɨ Jerusalem oon hoi deg kɨ dɔning Samarit kad taan ta lo Luwah ye, lan Pierr kɨ Jã rodt. 15Lon ten dɔning Samarit taa ne, elɨn ta kɨ Luwah kad ngétaata lo Krist taan Ndil Kɨkunjɗang. 16Kɨtɔ Ndil Kɨkunjɗang ɗe dɔ det mad kudt al ɓaitɔ. Na baptem koon la ɗand kam tɔ Bɨraɓe Jejut ye. 17Ad Pierr kɨ Jã ndan jid dɔdt, ad ngahn Ndil Kɨkunjɗang.
18Lon Simõ oo kad i kɨtakul ji kɨ ndah dɔt lo ngombangkɨlag la deg ngahn ne Ndil Kɨkunjɗang ye, ɔrr nar kɨ n'ad Pierr kɨ Jã, 19na eld an: Admɨn tɔgt'n non ho, kad ĩla m'nda jim dɔ det kɨɗen a ne, kɨ ngah Ndil Kɨkunjɗang ho.
20Na Pierr ela an: Kad nar loi nuj nat sei. Ɔj kamit kad i ndugo kadkari lo Luwah kɨ nar kɨ jiit e? 21Gaja loi, nyanduba loi goto kam tat 'nten; kɨta tagah kɨ ngarkamit i dene nõ Luwaht al. 22Kɨtɔ 'nten i tɔrrndii dɔ majalt'n i gaa nõ, na i kɔ Bɨraɓe kɨ rotĩi ɓood a ne, Bɨraɓe a nyàgo tagah kɨmajal kɨ ngarkamit. 23Kɨtɔ m'oo kad ngarkami ɓakot kɨ nyaɗa kɨmajal kɨ tit wong li be kɨ nya kɨ katbangbe tɔ, ad majal dɔi ɗa.
24Simõ tur Pierr kɨ Jã an: Ĩn kɨɓe kɨ dɔsɨ i kɔn Bɨraɓe kɨ rotĩsɨ kɨtatɔm kad nya mad ku nyagt'n elɨn taa nõ tee dɔmt al.
25Pierr kɨ Jã lon man naj woi ye, lan mber hoita lo Bɨraɓe, kamla tel awɨn ɓebo Jerusalemt, a lan mber hoita kɨmaj kɨ ngan ɓeg kɨ ɓebog kɨ dɔning Samarit.
Pilip ndɔdɨn na kɨ de kɨbo kɨ dɔning Etiopit
26Malaika lo Bɨraɓe el Pilip an: I ɓai dõ, aw ko kɨ dɔɔ dɔ ɗobt kɨ ɓai ɓebo Jerusalemt teen Gajat. Kaglot'n non de goto dɔ ɗobt.
27Pilip ɓai aw tajigt, taa ne, oo de mad, i dekɨdɨngã kɨ kɔrrgoma kɨ dɔning Etiopit, i de kɨ ngekoogo nyangahg lo Kandas ngar kɨdẽ kɨ Etiopit. De'n non ɗe ɓebo Jerusalemt kad n'ɔsɨ gojɨn ɓer nõ Luwaht 28Ndɨ tel kɨ gog ɓe kam pusɨt kɨ sɨnda a ɔrr, ndɨ da maktub lo ngekelta kɨ ta Luwaht Ejai. 29Ndil Kɨkunjɗang el Pilip an: I ndɔt kɨ ro pusɨt nderbe.
30Pilip ãi ngɔd kɨ dɔ dekɨdɨngãt kɨ kɔrrgoma, taa ne oo dɔ ndia ndi da maktub lo ngekelta kɨ ta Luwaht Ejai ad ndɨjea an: I ger girr nya'n i ndɨ i da yo? 31De'n non tura an: M'a m'asɨ ger girra titbãi ĩla de mad ɔrrɨm girra al. 32Ta kɨ kam maktubt'n ndɨ da la ten:
I tit bat kɨ ndɨ ɔrrɨna kɨ lo jakɔt be;
tit'n ngon bat a ɗan gon mbo nõ ngéjabĩnt ye,
titbe tɔ la teen tan al.
33Kam sɔldɔt'n sɔlɨn dɔa la ɔsɨn ne takɨgang'n hã maj kad gangɨn dɔjt kɔ.
Nõ asɨ kad ɔrr girr nya 'nten a?
Kɨtɔ tɔlɨna kɔ.
34Dekɨdɨngã kɨ kɔrrgoma kɨ Etiopit ndɨje Pilip an: M'kɔi kɨ elɨm: Ngekelta kɨ ta Luwaht elta dan dɔ nõ a? Elta kɨ ɔj dɔn e, ke elta dan dɔ de mad a?
35Taa ne, Pilip tee tan, mba girra dɔ tat kɨ kɨɗa'n de kɨ Etiopit ndɨ da nõ la, ela'n hoita kɨmaj lo Jeju Krist. 36A tuɓan go ɗob ɓaitɔ a ne, teen ta mant mad. Dekɨdɨngã kɨ kɔrrgoma kɨ Etiopit'n non el an: Oo man la ten: Ɗi ɔgɨm kad m'ɗa baptem a?
37Pilip tura an: Ĩla i taa ta lo Krist kamit kɨtaagbe a ne, i root kad i ɗa baptem. De'n non tur an mad kamm kad Krist i Ngon Luwah.
38Dekɨdɨngã kɨ kɔrrgoma ad pusɨ duba; ɗisɨn nat tu joo kɨ Pilip, kamla andɨn kam mant ad Pilip ɗaa baptem. 39Tentenbe, lon ten kam mant kɨtɨga ye, Ndil Bɨraɓe ɗe un Pilip ɗat takumat, ad ooa gog al ta. Na ĩ tɔ tuɓa go ɗob lon, ɗa ronel ngarkamɨnt 40Na Pilip taa ne, ngahna kam ɓet kɨ Asɨdod, tɔi nõbe, a lamber Hoita kɨmaj kɨ log tube mbã teen kam dɔningt kɨ Sejare.
Currently Selected:
Kɨlag 8: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
