MIPUM SIARHNAK 25
25
Peor Ah Israel Mite Hleng I
1Israel mite Shittim#25:1Shittim tu Akhesiati inkhai ko i. Akhesiatu zanthing hing i le lawithingtiin ti i sing. ai a um laitak ah pasal hrekkhatte in Moab nupangte heh sualpui de i. 2Hemi Moab nupangte in amahte khuavang biahnak le hibawlhnak puai ah Israel mite heh sawm i. Israel mite in rong ai tlang fangin, 3Peor khuavang Baal heh bia tlang ve i. Ciamanin Bawipa tu anite vumah a thinraw ai, 4Moses hnenah, “Israel mite hotute kokhawm tulai mizapui hmuh ah ciamite heh rek tu. Ciatihin Israel mite vumah i thindap tuh i,” tiin ti i. 5Ciafangin Moses in Israel mite hotute hnenah, “Ning hin songin Peor ai Baal biatute heh rek tusek ih,” tiin ti i.
6Moses le Israel mizapui tu lungsia in Bawipa umhnak Ponhlam songah kap tlang i. Cialak ah amahte veksen mithmuh ah Israel pasal pakhat in Midian nupang pakhat a hlam songah lutpui i. 7Ciami heh suangbawi Eleazar ai fapa, Aaron ai tupa Phinehas in a hmu fangin tho ai mizapui lakin suak i. Faipui awh kongin, 8ciami pa le nupang nu heh hnawh ai hlam songah a pahnih in dawt ai thi i. Ciamanin Israel mite vumai hlenghnak urhnak lawm leh i. 9Ikhalselai Israel mite thawng kul hluanli tu ursia in thi zo i.
10 Bawipa in Moses hnenah, 11Phinehas in Israel mite vumai i thinrawhnak heh dapruai zo i. Ani incen kaimah siarlo pathian zaibang khai bia tuhin daih hrimhrim lo i. Ciamanin Israel mite veksen in i siatsuah sek lohnak i. 12Phinehas tu rel tulai kumkhua hrang amah thawn thukhamhnak bawn tuh ing. 13Kaimah ralcaitu zaibang khuavang khai sang thil lo ai, Israel mizapui ai sualngaithiamhnak khai suakruai manin amah le a tesinfate tu a zomzet in suangbawi cang tlang tuh i,” tiin ti i.
14Israel pasal, Midian nupang nu thawn rekhnak a tuarmi heh Salu ai fapa Zimri i. Amah tu Simeon nam songin hin pakhat ai hotu pakhat i. 15Nupang nu a rekhnak hming tu Kozbi i ai a pa Zur tu Midian hin lakah hin pakhat ai miuk i.
16 Bawipa in Moses hnenah, 17Midian mite tawng tulai siatsuah tusek. 18Zaimantifangin Peor ah ning zawl ai thil sual bawn tlang manin le Peor ah ursia a hleng laiah thihhnak a tuarmi Kozbi manin siatsuah tuh sek heh a tlak i,” tiin thupe i.
Currently Selected:
MIPUM SIARHNAK 25: RZB
Highlight
Share
Copy
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
