MIPUM SIARHNAK 11
11
Taberah Hmun
1Israel mite harsahnak tuar manin Bawipa vumah phuncam tlang murhmo i. Ciatihin phuncamhnak heh Bawipa in a za fangin a thinraw manin amahte vumah mai hlat i. Amahte lakah maikang ai riahbuk hiang hmunkhat kang dekdo i. 2Mizapui tu bawmhnak ngen in Moses hnenah au tlang i. Moses in Bawipa hnenah sawngen fangin mai dit leh i. 3Ciatihin Bawipa ai mai amahte lakah a kang manin cia hmun heh Taberah#11:3Taberah tihnak tu Hebrew in maiko ti ca i. tiin ko tlang i.
Moses In Konghoitute Sawmsarih Ril I
4Israel mite lakah a fehtu ramdang mi hrekkhat in sa rawp tlang i. Amah Israel mite lala inkhai phuncam tlang murhmo ai, “Sa ai tuh um selai maw! 5Egypt ramah cenin ngasa khai a lovang in ngah de ita singkhaw. Kin ai dehnak zilte, zilhmui, khahsuat, lasunte khai ngai ngio i ing. 6Ikhalselai tun tu tha kin bo ihang; kin ro cuahco i. Aih tuh zaikhai um lo i; nisiar manna lek, manna lek,” ti tlang i.
7Manna tu hlaici cikniu thawn bang ai a pianzia heh a ngo loiloi, aihre loiloi i.#Luat 16:31 8Ciami manna heh Israel mite in khawm ai a vut in rial ai ihlahle sum ah su ai a suang hnuaah sangper in bawn i. A urdan tu olive siti thawn roihhnak sang thawn bang dun i. 9Manna tu amahte riahbuk ai zan ah nai a tla fangin tla ve de i.#Luat 16:13-15
10Mizapui tu amahte riahbuk dawngkham ṭen ah ding in phuncam tlang murhmo khiah Moses in za i. Bawipa tu amahte vumah a thinraw i. Moses tu a lungsir ai, 11Bawipa hnenah, “Zaimanin na sal pa kaimah heh he tlukin i hnawmcan isi? Zaimanin na mithmai pha co thil lo ing? Zaimanin he minungte kilkhawl tuh thilrit i phurh tuhin i vumah hlengruai isi? 12Hemi minungte paitu khai ilo ai semruaitu khai ilo ing. Naulentu in a ban in a cawi ngio bangin zaimanin he minungte heh amahte pupate hnenin na thukhamhnak ram tian cawi tuhin i ruai isi? 13Minung hezah ca sa tu akon ai lang cawk tuh ing? Catloin au ai sa i ngen tlang thliahthlo fawn i. 14Fiang ngai in na rel ing: minung hezah ca kaimah lekin ṭuanvo lang cawk lo ing, Thil i rit ze i. 15Hetih tuh pah lekhaw i hnawmcanhnak in i luat thil tuhin ning i hio tulai cammalak in i rek tu lawlaw,” tiin ngen i.
16Ciafangin Bawipa in Moses hnenah, “Mizapui lakah rinsantlak le sangtlak konghoitute sawmsarih kokhawm tulai i umhnak Ponhlam ah koih in na hiangah ding tlang tuseh. 17Kaimah zuktolh in nangmah thawn pon dun tuhai i pe cia rauhla heh na hnenin a hrekkhat lang tuhai anite hnenah pe tuh ing. Ciatihin mizapui kilkhawl tuhhnak thilrit heh amahte in na sawng tuhai nangmah lekin phur tuh nawn lo ihang si. 18Ciamanin mizapui heh, ‘Thangha hrang cianghlim dun tuseh; sa ai tuh ngah tuh ihang. Ning kaphnak le sa ning rawp ai ning ngenhnak le, “Egypt ram ahcen sa kin kham ngai napui, ning tihnakte heh Bawipa in za i. Tun tu Bawipa in sa ning pe tuh man hangin sa ai tuh ngah tuh ihang i si. 19Sa ai tuh heh ni khat, ni hnih, ni nga, ni hra, ni kul song lek ilo in, 20ningcir ai ning awk tum dekdo tianin hla khat song pumpalah ai tuh i si. Zaimantifangin Bawipa Pathian ning hnawl manin a mithmuh rori ah Egypt ram an suak tuh lohnak napui ising, tiin ning phuncam manin i,’ tiin rel tu,” tiin ti i.
21Moses in Bawipa hnenah, “Tun tian i hoihnak mizapui heh ting ruk i. Hla khat song amahte kham ai tuhin sa pe tuh ing ti isim? 22Kawlpaw le tuu amahte kham khop ro tuhin um cawk tuh im? Tipuithuanthum ai nga hmuahhmuah rin kham tlang ni tur im? tiin ti i.
23Ciafangin Bawipa in, “I huham le i hathnak in ti thil lohnak nai im? I ponghnak bangin a cang peupeu le cang peupeu lo a rai hlanah hmu tuh isi,” tiin ti i.
24Cen Moses tu suak ai Bawipa relhnak tepawl heh mizapui hnenah rel leh i. Konghoitute sawmsarih heh Ponhlam kimvel ah pumkhawm tuhin ruai i. 25Ciafangin Bawipa tu mairo songin kawi ai Moses hnenah thurel i. Moses hnenai a pe zohnak rauhla hrekkhat heh lang ai konghoitute sawmsarih hnenah pe i. Amahte hnenah rauhla a hleng sawng fangin prophette bangin pong tlang murhmo i. Ikhalselai ciami heh a rai hlanah lawm leh i.
26Ciami konghoitute sawmsarih lakah a tel ve mite pahnih Eldad le Medad tu Ponhlam ah kawi loin amahte riahbuk ah um kawm i. Ciata amahte riahbuk ah rauhla hleng ai cammalak in prophet bangin pong kawm dekdo veve i. 27Eldad le Medad umdan heh tlangval pakhat in a hmu fangin dawp ai Moses hnenah rel i.
28Ciafangin a naupang lai in Moses a bawmtu Nun ai fapa Joshua in Moses hnenah, “I bawipa ciamite pahnih heh kham hlah sim,” tiin ti i.
29Moses in, “Kaimah ca ziang cang ni ngai maw ti lek ruat isim? Bawipa in a minungte vumah a rauhla hlengruai ai amahte veksen in prophet bangin pong sio selai i daih i!” tiin ti i. 30Cia hnuaah Moses le Israel mite konghoitute sawmsarih tu amahte riahbuk ah tlung leh i.
Bawipa In Vahnimte Kuat I
31Rinlopui in Bawipa in hli zuangruai ai tifingriat lamin vahnimte heh ciami hli in laipua in pi thum sang in zuanpui ai amahte riahbuk in nisuah lam, nitlak lam, sak lam, hlang lam ni khat hleng ban song hmuahhmuah vahnim lekin dim sio i. 32Ciamanin mizapui tu cia nia in a thangha tian sun le zan it lo sing loin vahnim khawm tlang i. Minung pakhat in han sawmnga tahin tlawm khultu um lo i. Amahte riahbuk cingkim ah a ro in pho tlang i. 33Ikhalselai vahnim sa a bo hlan, ai tuh tampui a nai laiah, mizapui vumah Bawipa tu a thinraw ai amahte vumah pul tlungruai i. 34Sa a rawp mite tu ciata ah phum manin cia hmun heh Hibroth Hataavah tiin ko i; a sullam tu Rawphnak Hlanmual tica i.
35Ciata in mizapui tu suak tlang ai Hazeroth tihnak ah hleng ai ciata ah riahbuk bawn tlang i.
Currently Selected:
MIPUM SIARHNAK 11: RZB
Highlight
Share
Copy
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
