MARK 13

Jerusalem Biakinn Hnawmhnak Thu

(Mat 24:1-2; Luk 21:5, 6)

1Jesuh tu Biakinn in a suak sawng fangin a hnuahluntu pakhat in, “Sayapa, sik tu! Hemi inn le lungto puipui tu ngaihsunurkul ngai i!” tiin ti i.

2Jesuh in, “Hemi a ngaihsunurkul innte heh hmu ilo sim? Hemi lungto puipui heh pakhat khai amahte umhnak kelah a um nawn lo tikcucan hleng tuh i,” tiin ti i.

Harsahnak Le Reemhnak

(Mat 24:3-14; Luk 21:7-19)

3Jesuh tu Olive Mual, Biakinn in ralden ai umhnak Mual ah to i; ciata ah Peter, James le John le Andrew heh a thupniu in kawi tlang ai, 4“Hemi bang can heh zaikom fangin cang tuh i? Kin rel tu! Cia can hleng cing tuh i, ti lingthiamhnak ah ziang hnikhnaihhnak um tuh i?” tiin zawt tlang i.

5Jesuh in anite hnenah, “Ralring tu ih! Aisu inkhai ning zawl maseh. 6Mi tampui kaimah hming in hleng tuhai ‘Amah ing,’ tiin ti tlang tuhai mi tampui zawl tuh i. 7Ning hiangah raltawnghnak thawm le lam hlapui ah raltawnghnak thawm ning za fangin thinlau in um mah ih. Ciabang thil heh hleng tuh i, ikhalselai can tawphnak tu ilai lo i. 8Ram khat le ram khat, ukhnak pakhat le pakhat, tawng dun tuh i. Hmun cangcang ah hlinhlin tlung tuh i; cen rian tlung tuh i. Ciabang heh naukai ur thawn bang dun i.

9“Ningmah hrimhrim ralring tu ih. Ning pom tuhai Council zung tampui ah ning suakpui tuh i; Synagogue ahkhai ning vit tuh i; kaimah manin hotu le kumpibawi hmaiah ning dingruai tuh i. Cia can heh i Thuthangpha ning rel tuhhnak can i. 10Ikhalselai can a tawp hlanah Thuthangpha heh mi zongzong hnenah rel tuh i. 11Cen ning pom tuhai zung ah ning suahpui fangin ziang rel tuh i ing tiin hlanvom in lau cia mah ih. Can a hleng fangin ning rel tuhhnak tu ning lingruai tuh i. Zaimantifangin ning relhnak tu ningmah ai ponkam i tuh lo i; Rauhla Thianghlim ai relhnak ponkam i tuh i.#Mat 10:17-20; Luk 12:11-12 12Unau le unau heh thihhnak tianin engsan dun tuh i; ciabang thotho in pate in a fate vumah bawn tuh i. Fate in a nute le a pate engsan tuhai thihhnak tianin hlengruai tuh i. 13Mi zongzong in kaimah manin ning hua tuh i. Ikhalselai a tawphnak tian a tuar bentu in ohnak ngah tuh i.#Mat 10:22

Tihikkul Thil Ningrim

(Mat 24:15-28; Luk 21:20-24)

14“Tihikkul Thil ningrim heh a ding tuh lohnak hmunah a ding khiah hmu tuh i si,” (Hemi tu lai a siartu: a rel nuamhnak khiah lingthiam tu). “Cen Judea peng ai a umtute veksen in mualtlang vumah tlan tuseh.#Dan 9:27; 11:31; 12:11 15A innphu vumai a umtute in a keng tuhhnak thil lang tuhin a inn songah lut maseh. 16Lo ai a umtu in a silh pon lang tuhin a inn ah tlung maseh.#Luk 17:31 17Naupai le nau awkte ca ahcen har tuh ze i. 18Ciami harsahnak tepawl khiah khuasik cu ngelcel ah hleng tuh loin Pathian hnenah sawngen tu ih. 19Zaimantifangin he thil a hleng tuhhnak heh Pathian in laivum a semsuah ai panin tun tian ah a um awng kel lo harsahnak i tuh i. Hmai lam zaikom fangin khai um tuh nawn lo i.#Dan 12:1; Thup 7:14 20Bawipa in cia nia tu comruai zo i; comruai lo selai aisu bang minung khai tang tuh lo i. Ikhalselai a ril cia mite caah cia nikhua heh comruai zo i.

21Mi pakhatkhat in ‘Sik tu ih, heta ah Messiah um i,’ ‘Sik tu ih, khiata ah Messiah um i,’ tiin ning ti inkhai sang mah ih. 22Zaimantifangin Messiah khel le prophet khel tampui hleng tlang tuh i. Pathian ai ril cia mite rin amahte zawl ben tawp in zawl tuhin ngaihsunurkul le khuaruahhar tampui khai bawn tlang tuh i. 23Ralring tu ih! Hlanvom in zaizongza ning rel zo sio ing.

Mi Fapa Hlenghnak Thu

(Mat 24:29-31; Luk 21:25-28)

24“Ciami harsahnak can hnuaah ni thim tuhai hlapui khai tleu tuh lo i.#Isa 13:10; Ezk 32:7; Joel 2:10, 31; 3:15; Thup 6:12 25Van in arsite tlok tuhai van hangpui ai a um mite ai hathnak le huhamte tu amahte lampui kel in pial tlang tuh i.#Isa 34:4; Joel 2:10; Thup 6:13 26Cen Mi fapa tu lar tuhai hathnak le songlawihnak thawn mairo lakin lar tuh i.#Dan 7:13; Thup 1:7 27Laivum a khat lam tong in khat lam tong tian ai a umtu Pathian ai ril cia mite khawm tuhin laivum ningli ah vancungmite hlat tuh i.

Thaikung In Zirhnak

(Mat 24:32-35; Luk 21:29-33)

28“Thaikung in ralringhnak zir tu ih. A kakte hing ai a dawn khai mem ai a hnah khai a tawt fangin khuakhal can nong zo i ti ling tlang i si. 29Ciabang pah in hebang thil a hleng betbo fangin can nong zo i, a hleng dawn ihang, ti khiah ling tlang i si. 30Heta ah a umtute a thi sek hlanah he thil hmuahhmuah hleng tuh sio i, ti khiah hai mah ih. 31Lai le van tu bo tuh napui i ponkam tu bo tuh awng lo i.

Aisu Inkhai A Tikcucan Ling Lo I

(Mat 24:36-44)

32“Ikhalselai zaifangin cia nia le can hleng tuh i, ti aisu inkhai ling lo i; van ai vancungmi in ling lo i, Fapa inkhai ling lo i, Pa ian in ling i.#Mat 24:36 33Zaikom fangin a can hleng tuh i, ti ning ling lo manin ralring in le ring cia in um tu ih! 34Ziang thawn bang dun i tifangin mi pakhat khual tlawng tuhin feh ai a hnenumte khiah amahte ṭuanvo fel ngai le khimliang in pe ai dawngkham kiltu pa khai it lo le sing loin dawngkham kil tuhin a tiamtu inn naitu pa bang i.#Luk 12:36-38 35Inn naitu bawi tu zaifangin hleng tuh i, ti ning ling lo manin ralring in um tu ih. Zan lamah i thai i, zan seulai ah i thai i, khuavar hlanah khai i thai ai nisuak sawng fangin khai i thai i. 36Mangrin loin hleng lekhaw ning mitmu lak ning tawk pang maseh. 37Ning hnenai i relhnak heh mi zongzong hnen ahkhai rel ing: Ralring in um tu ih,” tiin Jesuh in ti i.

Currently Selected:

MARK 13: RZB

Highlight

Copy