SUANGBAWI LAIBU 24
24
Maivarhnak Kilkhawl Dan
(Luat 27:20-21)
1 Bawipa in Moses hnenah hetihin ti i: 2“Israel mite hnenah thupe tulai Bawipa umhnak ponhlam songai maivarhnak tu a can hmanniu in ning var thil tuhin olive siti a phun pha ber pawl koih tuseh. 3Hmun Thianghlim Ber song Thutiam Kuang hmai ai umhnak ponzar pualam ah maivarhnakte tu Aaron in Bawipa ai mithmuh ah zan lam cangin var tuhai zing lam tianin varruai tuh i. Hemi dan heh a zomzet in hlun tuhhnak i. 4Sui ciang ai bawnhnak maivarhnak fung vumai maivar khiah Aaron in phatak niu in sik tuhai a can hmanniu in Bawipa ai mithmuh ah var tuh i.
Pathian Hnenah Pehnak Sang
5Sangvut rel nga in lang tu ilai sang phil hlaihnih ah bawn tu ih.#Luat 25:30 6Bawipa mithmuh ai sui khuthnak cabuai vumah tluan khat ah phil ruk ṭen in tluan hnih in dah tu ih. 7Bawipa hnenai rong sel hibawlhnak sang hrangah ciami sang tluan hnih vumah frankincense tihnak rimhmui a pha ber dah tu ih. 8Sabbath nia cangin, san khat hnua san khat, ciami sang heh Bawipa mithmuh ah dah tu ih. Hemi tu Israel mite in a zomzet ning bawn tuhhnak ṭuanvo i. 9Ciami sangte tu Aaron le a tesinfate covo i ai, hmun thianghlim ah ai tlang tuseh; zaimantifangin suangbawite ca Bawipa hnenai pehnak hibawlhnak rong lakah a cianghlim bik i.#Mat 12:4; Mar 2:26; Luk 6:4
A Dikcang Le Dikcanglairel Cawhhnak
10A nu Israel miphun, a pa Egypt miphun pasal pakhat heh Israel mite riahbuk songah feh ai Israel mite pakhat thawn hua dun i. 11A nu hming tu Shelomith i ai Dan phun songin Dibri ai fanu i. Ciatihin a hua dun laitak ah ciami pa in Pathian hming cukcam i; ciamanin Moses hnenah fehpui i. 12Moses in ani tu kilruai ai akontih in bawn tuh ti khiah Bawipa bawnruaihnak iang i.
13Ciafangin Bawipa in Moses hnenah, 14“Hemi pa heh ning riahbuk in khuapua ah suahpui tu ih. Pathian a cukcam lai a zatu hmuahhmuah in a mawh hrimhrim i tica in he pa ai a lu vumah ning kut suan tlang tu ṭen ih; cen Israel mizapui in a thi tian lungto in sep tu ih. 15Cen Pathian a thangsiattu heh he pa bangin cawhhnak tuar tuhai. 16rekhnak tuar tuh i si, tiin Israel mite rel tu. Israel mite ituseh, Israel mite lakai um ramdang mi ituseh, Pathian a cukcamtu heh Israel mizapui in lungto in sep in thi tuseh.
17“Mi a rektu heh rekhnak tuar tuh ve i.#Luat 21:12 18Midang ai sumhnam a rektu heh sumhnam in kuan tuseh. Nunhnak tu nunhnak in kuan tuseh.
19“Mi pakhat in midang tuahmawh lekhaw, a mah inkhai tuahmawhhnak tuar tuseh. 20Mi ruh ekruai lekhaw amah ruh pakhat eksahhnak tuar tuseh, mi ai mit pakhat hnawmtiar lekhaw amah ai mit pakhat hnawm bawnsahhnak tuar tu ve seh; mi ai kam ekruai lekhaw amah ai kam eksahhnak tuar tu ve seh. Midang a tuahmawhtu in tuahmawhhnak tuar tu ve seh.#Luat 21:23-25; Danp 19:21; Mat 5:38 21Sumhnam a rektu heh sumhnam kuan tuseh, minung a rektu heh rek tuar thun tuseh. 22Hemi dan heh Israel mite ituseh, ningmah lakai umtu ramdang mi ituseh, ning veksen in ning hlun tuhhnak dan i; zaimantifangin Kai tu Bawipa ning Pathian ing,” tiin ti i.#Mip 15:16
23Ciatihin Moses in Israel mite heh thu rel ai Pathian a cukcamtu pa heh khuapua ah suahpui ai a thi tianin lungto in sep tlang i. Bawipa in Israel mite hnenai a thupeciahnak bangin Israel mite in bawn tlang i.
Currently Selected:
SUANGBAWI LAIBU 24: RZB
Highlight
Share
Copy
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
