SUANGBAWI LAIBU 14
14
Phar Lawm Fangin Hibawlhnak
1Mi fuk thai phar ur in a lawmtu mi pakhat hibawlhnak hrangah, 2Bawipa in he dante heh moses hnenah pe i. Phar ur nai pa cak leh ai mi cianghlim i tiin a ti nia ah ani tu suangbawi hnenah fehpui tuhai, #Mat 8:4; Mar 1:44; Luk 5:14; 17:14 3suangbawi in hnarpua ah fehpui tuhai sik tuh i. A phar ur lawm ngaingai lekhaw, 4suangbawi in a hnahpha vaniute pahnih, cedar thing le ponsan le hissop dangdawn thawn koih tuhin thupe tuseh, 5Cen vaniu pakhat heh tidap ciangfai dahhnak hleng vumah ro tuhin suangbawi in thupe tuseh. 6Cen suangbawi in a dang vaniu pakhat lang tuhai a rociahnak vaniu ai thisan songah cedar thing, ponsan le hissop dangdawn thawn nim tuh i. 7A phar ur in cianghlimruai tuhhnak pa heh suangbawi in vaniu thisan in vel sarih tian phiah tuhai cia hnuaah cianghlim i tiin ti tuh i. A nungmi vaniu tu hampalak ah hlat tuseh. 8Ciapa in a hnikpon sawp tusek seh; a sam met tu selai takhlu tuseh; ciatihin mi cianghlim cang tuh i. Khuasong ah lut tu selai, ikhalselai a inn pualam ah ni sarih song um rih tuseh. 9Ni sarihhnak ah a sam met leh tuseh; a khahmul, a mithmul le a taksa vumai um a hmul hmuahhmuah met tusek seh; a hnikpon sawp tuhai takhlu tuseh; ciatihin mi cianghlim cang tuh i.
10A niriathnak nia ah kum khat khim a hnahpha tuucangte lu hnih le tuula lu khat koih tu selai olive siti roih cia sangvut rel khat le olive siti khuat khat khai koih tuseh. 11Ciapa le a koihhnakte khiah suangbawi in Thukham dahhnak Ponhlam ah fehpui tuseh. 12Cen suangbawi in tuucang lu khat lang tuhai olive siti khuat khat thawn kuan leh hibawlhnak sel tuseh. Hemite tu Bawipa hnenah suangbawi ca a tumce in pehnak lehsawng i. 13Sualhlat hibawlhnak hrang le maitai hibawlhnak hrang sumhnam ro hmunah ciami tuucang heh suangbawi in ro tuseh. Hemi tu a bawn tengteng tuhhnak i, zaimantifangin kuan leh hibawlhnak tu sualhlat hibawlhnak bangin suangbawi covo i ai a thianghlim bik i. 14Suangbawi in tuucang thisan a hrekkhat heh lang tuhai a thiangruai tuhhnak pa ai a kiahhan lam bilhnah ah le a kiahhan lam kutzungpui ah le a kiahhan lam kezungpui ah mat tuh i. 15Cen suangbawi in olive siti hrekkhat khai lang tu selai a kekeh lam kut songah bung tuseh; 16ciami siti songah a kiahhan lam zungkawk nim tuhai Bawipa mithmuh ah vel sarih tian phiah tuseh. 17A kut songai tanghnak siti hrekkhat le tuucang ai thisan hrekkhat lang tuhai a thiangruai tuhhnak pa ai kiahhan lam bilhnah le a kiahhan lam kutzungpui ah le a kiahhan lam kezungpui ah mat tuseh. 18A kut songai tanghnak siti tu ciami pa a lu vumah burh tusek seh. Ciatihin cianghlimruaihnak heh suangbawi in bawn tuseh.
19Cen suangbawi in sualhlat hibawlhnak sel tuhai cianghlimhnak bawn tuh i. Cia hnuaah maitai hibawlhnak hrang sumhnam heh ro tuhai, 20puleng ah hibawlhnak sel tuseh. Rong hibawlhnak khai bawn tuseh. Ciatihin suangbawi in cianghlimhnak bawn tuhai ciami pa tu mi cianghlim ah cang leh tuh i.
21Ciapa tu a farah manin zaikhai lai ben hlah lekhaw a cianghlimhnak hrang tuucang lu khat lek koih tuhai mawhhlat hibawlhnak sel tuh i. Hemi tu Bawipa hnenah a tumce in selhnak i. Olive siti roihhnak sangvut rel tan lek rong hibawlhnak hrang koih tuhai olive siti hai khat koih tuh fawn i. 22Khurote pahnih ihlahle lailengte pahnih koih tuhai pakhat tu sualhlat hibawlhnak le pakhat tu maitai hibawlhnak hrang tuh i. 23Hemite tu cianghlimhnak ni riat nia ah Ponhlam dawngkham ah suangbawi in sel tuh i. 24Suangbawi in tuucang le olive siti lang tu selai Bawipa hnenah a tumce lehsawng in suangbawite ca sel tuseh. 25Tuucang heh ro tuhai a thisan hrekkhat a lang hnuaah ciami pa ai kiahhan lam bilhnah le a kiahhan lam kutzungpui le a kiahhan lam kezungpui mat tuseh. 26Cen suangbawi in siti hrekkhat khai a kekeh lam kut songah bung tu selai, 27a kiahhan lam zungkawk in Bawipa ai mithmuh ah siti hrekkhat heh vel sarih tianin phiah tuseh. 28Tuucang thisan a mathnak a kiahhan lam bilhnah le a kiahhan lam kutzungpui le, a kiahhan lam kezungpui ah siti mat tuseh. 29A kut songai a tanglaihnak siti tu ciami pa lu vumah burh tusek seh. Ciatihin a cianghlimhnak bawt tuseh. 30Cen khuro pakhat ihlahle laileng pakhat heh, 31sualhlat hibawlhnak ah sel tuhai a dang pakhat tu maitai hibawlhnak ah rong hibawlhnak thawn sel tuseh. Ciatihin suangbawi in cianghlimhnak bawn tuseh. 32Hemi tu mi fuk thai phar ur nai ai midang bangin hibawlhnak a bawn ben lotute ca pehnak dan i.
Inn Muat
33 Bawipa in Moses le Aaron hnenah, 34Canaan ram, Israel mite co tuhin a pe tuhhnak ramah a lut fangin amahte inn songah a muat um ai ciami a muat heh zai amam lekhaw a hnia lamai dante hlun tuhin a pehnak i. 35Mi pakhatkhat in a inn muat i ti a hmu fangin suangbawi hnenah kawi tu selai rel tuseh. 36Ciafangin inn sik tuhin a feh hlanah suangbawi in inn songai umhnak thilri hmuahhmuah heh thilri thiang loin siar tuh loin thawn tuh sek in thupe tuseh. Cia hnuaah feh tuhai, 37Inn muat heh sik tuseh. A muatdan heh a tangphaw thah ihlahle a san thiathai in ngan ai bangkhang khai ai hang lekhaw, 38ciami inn heh hlum tu selai ni sarih song tawhkalh tuseh. 39A ni sarihhnak nia ah inn heh sik leh tuseh. A muat zai lekhaw, 40a muat umhnak lungtote heh lang tusek selai khuapui hnarpua a cianghlimlo hmunah lon tuhin thupe tuseh. 41Cia hnuaah bangkhang a songlam hmuahhmuah ziat tuh sek in le bangkhang mathnak laisawr khai lang tuh sek ai khua hnarpua a cianghlimlo hmunah lon tuhin ruai tuseh. 42Ciatihin lang ai amahte lonhnak lungtote tumrul in a dang lungtote lang tu selai hmang tuhai laisawr a thar in mat tuseh.
43Lungtote lon ai bangkhangte ziat ai mat leh sek hnuaah a inn heh muat thotho lekhaw, 44suangbawi in sik leh tuseh. A muat heh zai ngaingai lekhaw ciami inn khiah inn cianghlimlo i. 45Ciami inn heh bal tuhai lungtote, thingte, a mathnak laisawr hmuahhmuah phur tuhai khuapui hnarpua a cianghlimlo hmunah lon tusek seh. 46Ciami inn tawhkalhhnak songah a luttu heh ciami nia zan lam tianin mi cianghlimlo i. 47Ciami inn songai a mitmutu le rong a aitu heh a hnikpon sawpciang tusek seh.
48Suangbawi kawi ai a sik fangin inn bangkhangte mat leh hnuaah a muat suak nawn hlah lekhaw a muat lawm zo manin suangbawi in ciami inn heh inn cianghlim i, tiin ti tuseh. 49Inn cianghlimhnak tuh ah suangbawi in vaniute pahnih, cedar thing, thiamri san le hissop dangdawn lang tuseh. 50Vaniu pakhat tu tidap ciangfai dahhnak ai bawnhnak khuriang vumah ro tuseh. 51Cen cedar thing, hissop dangdawn le thiamri san le vaniu nung heh lang tu selai a rohnak vaniu ai thisan songah le tidap ciangfai dahhnak songah nim tuseh. Cia hnuaah ciami inn heh vel sarih tian phiah tuseh. 52Ciatihin vaniu thisan, tidap ciangfai, vaniu nung, cedar thing, hissop dangdawn, thiamri a san pawl in inn heh cianghlimruai tuseh. 53Cen vaniu nung heh khuapui hnarpua hampalak ah hlat tuseh. Ciatihin cianghlimruaihnak heh ciami inn hrang bawn tuhai inn cianghlim ah cang tuh i.
54Hemite tu mi fuk thai phar ur, 55hnikpon ituseh inn ituseh a muatmi, 56hmaihma, uihlut ihlahle masia pawl, 57a cianghlim le cianghlimlo, ti larruaihnak ai pehnak dante i.
Currently Selected:
SUANGBAWI LAIBU 14: RZB
Highlight
Share
Copy
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
