JEREMIAH 9
9
1“I lu heh namkum iselai,
I mit heh mithli cirhti iselai
i daih ngai i!
Ciatihin sun le zan in kap tuh ing,
A rek cia i minungte caah
kap tuh ing.
2Nelrawn ah riahbuk nai inglai
i daih ngai i!
I minungte hlum in um tuh napui ing!
Amahte veksen in kangkawm
sualhnak bawntu ciang i;
Mi engsan thai ciang i.
3Amahte lai tu thudonrel tuhin
ralring in um tlang i;
Thudik ilo in thudon sawn in
ram uk i.
Bawipa in, “I minungte in,
thilsual pakhat hnua pakhat bawn
tlang i.
A Pathian in i ruat tlang lo i,”
ti i.
4Aisu inkhai a rualpui rin ralring
in pawl kul i.
Amahte unau rin rintlak nawn lo i.
Zaimantifangin a unau tlang in
Jacob bangin mizawl hmang ciang i;
Aisu inkhai a rualpuite relsia sio i.
5Amahte veksen in a rualpui
hoisual sio ai,
Aisu inkhai thudik rel tlang lo i.
Amahte lai heh thudonrel zirh tlang ai,
thilsual bawn com awng lo i.
6Thil poimawh pakhat hnua pakhat
bawn tlang ai,
Mizawlhnak tu com awng lo i.
Bawipa in,
“I minungte in i hnawl zo i,” ti i.
7Ciamanin Cungnungber Bawipa in,
“I minungte thir bangin er tuh ing;
Ciatihin cu tuh ing.
I minungte in thilpha lo bawn tlang zo i,
Akontih in ti tuh cuang ing?
8Amahte lai tu thihhnak thal bang i,
Thudon ciang rel tlang i.
Amahte innhnen ah ponkam pha
pong napui,
A ngaingai incen thangtoh tlang i.
9Ciabang a bawn tlang manin
cawh tuh lo ing maw?
Hemi bang miphun vumah phuzul
tuh lo ing maw?
Bawipa kaimah in pong zo ing,”
tiin ti i.
10Kaimah in, “Fing le tlang hrangah,
mithi ngai bangin kap tuh ing;
Lenpal hrangah au tuh ing,
Zaimantifangin ro zo sek i;
Aisu khai ciata ah feh tlang nawn lo i.
Kawlpaw rung thawmvang khai
thang nawn lo i,
Vaniu le ramsate khai piak sio ai
tlan tlang sio i,” tiin ti ing.
11 Bawipa in, “Jerusalem khiah
khuarop ah bawn tuh ing,
mehleng umhnak hmunah;
Judah khuate tu nelrawn ah cang
tlang tuh i,
Aisu khai um nuam lohnak hmunah,”
ti i.
12Ciafangin, “Bawipa, zaimanin he ram heh aisu khai fon nuam lohnak ah cang ai siatsuah sekhnak le nelrawn bang ram ro ah cang ini? Mifim aisu tal hebang thu lingthiam tuhin um aw im? Midang a relthilhnak tuhin
aisu hnen talah relfiang awng aw sim?” tiin zawt ing.
13Cen Bawipa in, “I minungte in i pe cia i thuzirhhnakte hlum tlang manin hetih bangin a canghnak i. I thu ngai tlang lo ai i relhnak khai hlun tlang lo i. 14Amahte thinlung ruh ze ai a pupate ai zirhhnak bangin Baal milim sawn bia tlang i. 15Ciamanin Cungnungber Bawipa, Israel ai Pathian kaimah in i bawn tuhhnak heh ngai tu ih: I minungte aih tuhin a kha ngai thinghnah thingthai pe tuhai amahte din tuhin thihsi pe tuh ing. 16Amahte in ituseh, a pupate in ituseh, a ling awng lohnak miphun lakah piakruai tuh sek ai a siatsuah sek hlanah anite tawngtu tuhin ralkap hlat tuh ing,” tiin ti i.
Jerusalem Mite In Bawmhnak Ngen I
17Cungnungber Bawipa in,
“Thil a cang tuhhnak heh ngaisung
tu ih!
Mithi ngaitute ko tu ih!
Mithi phumhnak la a satu nupangte
ko tu ih!” ti i.
18Mipui in, “Rel tu ih, rang ngai in
kawi tlang tu selai
Kin caah mithi phumhnak la sa
tuseh.
Kin mithli a rualrual in far ai,
Kin kaphnak in kin mit a por sek
hlanlo,” ti tlang i.
19Zion ai kaphnak awthawm heh
ngai tu ih,
“Kin bo zo sek i,
Zakthi bikaw in um zo i ing.
Kin ram heh hlum tuh i ing,
Kin innte bal zo sek i,” ti tlang i.
20Kaimah in, “Aw nupangte,
Bawipa ai ponghnak heh
ngai tu ih!
A relhnak heh phatak niu in ngai tu ih!
Ning fanute mithi ngaidan zirh tu ih!
Ning rualpuite mithi phumhnak la sadan rel tu ih!
21Thihhnak heh kin tukvirh
in lut ai,
Kin kumpibawi inn tianin hleng zo i;
Khuasong lampui ah naupangte
rek tuhin le,
tawk dun hmunah tlangvalte
hnawmcan tuhin hleng zo i.
22“Mithi ruang tu khuahacang ah
piak tlang i,
Lo laiah piakhnak ekdawm bangin;
Rongkhawmtute in fang at
tlang ai zamhnak,
Aisu inkhai khawm nuam loin a
piakhnak bial fang bangin.
Hetihin rel tuhin Bawipa in i ruai i,”
ti ing.
23 Bawipa in,
“Mifim in a fimhnak uar maseh;
Mihat in a hathnak hngalpui maseh;
Milian in a lianhnak in
tluangkhawng maseh.
24Aisu inkhai uar dun nuam lekhaw
Kaimah i linghnak le i lingthiamhnak ah
uar dun tu sawn seh.#1Cor 1:31; 2Cor 10:17
Zaimantifangin i ithnak tu bo nia rel lo ai,
A dikcang le a hman bawn ngiode ing.
Hemi heh lung i awiruaitu i.
Kaimah Bawipa in
rel zo ing,” ti i.
25-26 Bawipa in, “Egypt mi, Judah mi, Edom mi, Ammon mi, Moab mi le sam comniu in a mettu#9:25-26 sam comniu in a mettu tihnak tu cialai san ah miphun hrekkhat in amahte khuasia upathnak tuhin amahte sam comniu in met tlang awng de i. Ciami heh Israel mite in kham tlang i. nelrawn mite i cawhhnak can hleng tuh i. Hemite tu a zarhtan tlang napui zarhtanhnak ai a hnikhnaihhnak i thukham tu hlun lo i. Hemite in ituseh, Israel mite in ituseh, aisu inkhai i thukham hlun tlang lo i,” ti i.
Currently Selected:
JEREMIAH 9: RZB
Highlight
Copy
Compare
Share
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
