JEREMIAH 5
5
Jerusalem sualhnak
1Aw Jerusalem mite,
Ning khuasong lampui dunghlun ah
dawp tu betbo ilai,
Khua dang tang in sik tu ih.
Dawr bawnhnak hmunte tianin
si tu ih!
Dikcanglairelhnak a situ le thil dik
a bawntu,
Mi pakhat tal tawk nitur i sim?
Hmu le i sikhaw Jerusalem tu
Bawipa in ngaithiam tuh i.
2 Bawipa ai hming sal in
thukham dun napui
ning ponghnak bangin tu
tum lo i si.
3 Bawipa ai sihnak tu thudik i.
Ning vit napui zai nam lo i si.
Ning fon dek napui
zaikhai hlun ning nuam cuang lo i.
Milungruh i si ai ning sualhnak in
let ning nuam cuang lo i.
4Cen i thinlung in, “Hemite tu
mifarah le mi lungmolh,
thu ling lote i!
Amahte Pathian ai dan ling
tlang lo i,
A daihhnak khai bawn ben
tlang lo i.
5Thunaitu upa hnenah feh tuhai
thu rel tuh ing;
Anite tu Pathian dan ling ai,
a Bawipa ai
dikcanghnak khai ling hlen i,”
tiin ruat ing.
Ikhalselai amahte veksen in Bawipa ai
thunaihnak tu el tlang ai
a thupehnak tu hlun nuam
tlang lo i.
6Ciamanin tupui songah chintit
in dawp tuh i;
Nelrawn ai mehleng in hlikhlai tuh
dekdo i.
Tlavangte khai amahte khua
songah vak tuh dekdo i.
Sumpua ah a suak fangin sahrang
in hlikhlai tuh dekdo i.
Zaimantifangin amahte sualhnak
tam ze ai, tun le tunin
Pathian zam de i.
7 Bawipa in,
“Zaimanin na minungte ai sualhnak
tu ngaithiam tuh ing?
Kaimah hnenin tlan ai
Pathian ngaingai a ilomi
khuavangte bia zel i.
Rong kham ngai in cawm ing;
Ikhalselai kangkawm sualhnak
bawn ai,
Amahte can heh hlotlaute hnenah
hmang i.
8Anite tu phatak ngai ai
cawmhnak siphuh cang hur bang i;
A innhnen pa ai nupui
sualpui tuh lek hiam i.
9Hebang thilsual a bawn manin,
cawh tuh lo ing maw?
Hemi bang miphun vumah heh
aisu in phuzul loin um thil tuh i?
10I minungte ai cabit kuang sat
tuhin a ralte hlat tuh ing.
Ikhalselai a bo sek hlanlo
siatsuah tuh sek lo i.
A kakte sat tuhin rel tuh ing,
Zaimantifangin a kakte tu
kaimah ai ilo i.
11Judah mi le Israel mite in
i engsan zo i;
Kaimah Bawipa in
rel zo ing,” ti i.
Bawipa In Israel Hnawl I
12 Bawipa tu a minungte in zaikhai siar lo ai, “Zaikhai bawn tuh lo ngawn i; bawngsia khai tawk tuh lo ising; Raltawng le rian tlung khai tuar tuh lo ising,” ti tlang i. 13-14Cen, “Prophette tu zaikhai ilo i, hlivua bang ian i; Bawipa hnenin a hlenghnak thurel tuh zaikhai nai lo i,” tiin ti i. Cungnungber Bawipa Pathian in, “Jeremiah, i minungte in hebang ai pong manin a ka songai i dahhnak i thu khiah mai bangin cangruai tuh ing. Hemi minungte tu zanthing bang i tuhai mai in kang tuh sek i,” ti i.
15Aw Israel mite, ram hlapui an miphun phunkhat ningmah tawng tuhin Bawipa in koih i. Miphun hlun le miphun hat ngai i ai amahte pon ning ling lohnak le amahte anka ning cing lohnak mite i. 16A conkiang ralkapte tu mihat bikbik i ai ninghiohnak nai loin mi rek de i. 17Ning lo rong ituseh, ning inn rong ituseh, ai tuh sio ai ning fanu le ning fapate khai rek tuh sek i. Ning tuurual le ning kawlpawrualte khai rek tuh sek ai ning cabit kuang le ning thaihmin kungte khai vawng tuh sek i.
18 Bawipa in, “Ciabang tian a hleng inkhai i minungte tu siatsuah tuh sek lo ing. 19Hemi bangin zaimanin i vumah thil bawn i si? tiin zawt fangin, Jeremiah phatak niu in rel tu: Kaimah i zam ai amahte ram songah heh miphun dang ai khuavang bia ai ruaih manin amahte ram lo ah, miphun dang ruaihtu ah cang tuh i,” ti i.
Pathian In A Minungte Ralringruai I
20 Bawipa in Jeremiah hnenah, “Jacob ai tesinfate le Judah mite hetihin rel tu.#Isa 6:9-10; Ezk 12:2; Mar 8:18 21Phantakniu in ngai tu ih, ningmah mivoi le mitawte, mit nai napui zaikhai hmu thil lomi, bil nai napui zaikhai za thil lomi, 22Kai tu Bawipa ing. Zaimanin i kihzah tlang lo i si? Zaimanin i hmaiah hlawng derdo lo i si? Tifingriat cingkim ah siatnawi a dahtu, ti in zaikom inkhai kan thil tuh loin a dahtu ing. Tilep heh suk le so ah sep tuh i. Ikhalselai a kamai siatnawi pualam ah lan thil lo i. Tilep khai tho tuh i, ikhalselai pah thil tuh awng lo i.#Job 38:8-11 23Ikhalselai ning tu thinlung ruh le engsanhnak thinlung ian nai i si, i zangtak ai i zam tlang zo i si. 24Fur ruah le khal ruah siruai ai kumsiar rongkhawm can ning pe napui upathnak pe tuhin rin i ruat awng lo i si. 25Ning sualhnak in ning caah thilpha tuh khai heh tisual sek i.
26“I minung lakah hrokhrawl mite um i. Mi in vaniu awk tuhin thangtoh ai a bawh bangin anite in minung awk tuhin thang thawn mi bawh i. Mi awk tuhin thangtoh i. 27Sazul pa in a inn ah vaniu a dimruai bangin misualte in amahte inn songah mi rokhnak thilri in dimruai i. Ciaman milian le thunai ngai in a canghnak khiah! 28Ciamanin nainung le rong kham in um ai a thauhnak khiah! Amahte thilsual bawnhnak tu bo nia nai lo i. Nu le pa nai lo ngakṭah farah hnenah amahte covo pe awng lo i; nauneh mite vumah dikcanglairelhnak thawn nung awng lo i.
29“Ikhalselai hebang thil bawn tlang manin kaimah Bawipa in cawh tuh ing. Hemi miphun vumah phuzul tuh ing. 30Hemi ramah mangbang kihkul le tihikkul thil bawn i: 31Prophette in thudonrel i; prophette ai thupehnak bangin suangbawite in mi uk ai i minung aisu inkhai el lo i. A tawphnak can a hleng fangin akontih in um leh tuh i?” tiin ti i.
Currently Selected:
JEREMIAH 5: RZB
Highlight
Copy
Compare
Share
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
