JEREMIAH 4
4
Sualsir Tuhin Kohnak
1 Bawipa in, “Aw Israel mite, let ning nuam lekhaw i hnenah let tu ih. I ningdulhnak milim bia heh lon ai i hmaiah rintlak le kho ngai in um le i sikhaw, 2kaimah hming sal in cukcamhnak ning bawn fangin thudik le dikcanglairelhnak le dikfelhnak thawn bawn le i sikhaw ning caah pha tuh hlen i. Ciatihin miphun hmuahhmuah in amahte vumah hmuifu pe tuhin i ngen tuhai thang i phat tlang tuh i,” ti i. 3Bawipa in Judah mi le Jerusalem mite hnenah, “laipua ning vai lai lohnak khiah vai tuhang ih, ning hlaici khiah hling lakah vorh mah ih.#Hos 10:12 4Aw Judah mi le Jerusalem mite, Bawipa kaimah thawn thukham ning bawnhnak khiah khimruai in kaimah hmaiah vunhmur tanmi i tu ih; ciatihin kaimah caah thianghlim ngai in ap dun tu ih. Ciatihin bawn hlah le i sikhaw thil ning bawn sualhnak manin ning vumah i thinrawhnak mai bangin ko tuhai a hmitthaitu aisu khai um tuh lo i,” tiin ti i.
Judah Ca Raltawnghnak Hleng Tuh I
5Hemi ram song khuahacang ah
thirhlung tum tu ih,
Cawm ngai le fiang ngai in tum tu ih.
Judah mi le Jerusalem mite tu ving ai
kulhhnak khuapui songah
laileng tlang tuhin rel tu ih.
6Zion fehhnak lampui hmuh tu ih;
Himhnak hmunah tlan tu ih;
Um phetpho mah ih!
Bawipa in harsahnak
hlengruai tuh i;
Sak lam an a roh ngai in hnophnak
hleng tuh i;
7A relh hmun an chintit a kawi bangin,
Ram tampui hnawmcantu tho zo i;
Judah hnawmcan tuhin a kawi laitak i.
Judah khuate tu khuarop ah cang tuh sio ai,
aisu khai a songah um tuh lo i.
8Ciamanin buri hnikpon sil tu ilai,
Kap in au tu dekdo ih;
Zaimantifangin Bawipa ai
thinrawhnak tu Judah vuman
thawn lai lo i.
9Cen Bawipa in, “Cia nia ahcen kumpibawi le a kuthnia tlangsuakte ai ralphahnak bo tuh i. Suangbawite khuaruahhar tlang tuhai prophette khai mangbang in um tlang tuh i,” ti i.
10Ciafangin kai in, “Aw Cungnungber Bawipa, Jerusalem mite heh a roh ngai in zawl ibang si! Daphnak um tuh i, tiin rel napui ralvang tu a hawng thawn nong dun ihang,” tiin ti ing.
11Jerusalem mite lamah nelrawn ai tlangram an khuahu a roh ngai in zuang tuh i ti relfianghnak can hleng zo i. Ciami khuahu tu mai bangin sa tuh ze i. Fanghi a hmuttu zilhli nem i tuh lo i. 12Bawipa ai thupehnak in a zuanghnak hlivua tu ciami tahin a hat deuh hlivua i tuh i. Ciami hli tu minungte vumah thukhanhnak i tuhai thu a petu heh Bawipa amah i tuh i.
Judah Ram Ralte In Kulh I
13Sik tu ih, ralte khuanimpui bangin kawi tlang i. Amahte siphuhlengte tu simpai tahin hat deuh ai a siphuhte tu muvanlai tahin rang deuh i. Kin lampui pit i! Kin bo i! 14Aw Jerusalem, thilsual na bawnhnak tepawl tu na thinlung in somciang tu sio lai ciatihin ohnak ngah tuh isi. Zaikom tian thilsual khiah na thinlung in ngaisung tuhlai isi?
15Dan khua le Epharaim tlang vum ram an thuthang sia thantu tuhin a thuphurtute hleng i. 16Ralte ram hlapui an hleng tuh i tiin miphunte le Jerusalem ralringhnak pe tuhin hleng i. Ralte in Judah khuate khiah auh tuhai, 17mi in amahte lo a kil bangin Jerusalem khuapui kulh tuh sio i. Zaimantifangin a minungte in Bawipa ralcai ai raltho tlang i. Bawipa in rel zo i.
18Aw Judah, na nundan le na thil bawnhnak in hemi thil poimawh heh na vumah hlengruai isi. Na sualhnak in hemi tuarhnak heh suakruai i. Faipui bangin na thinlung na dawt zo i.
Jeremiah A Lungsia I
19Thin i ur i! I urhnak tuar ben lo ing!
thin i ur i! lung i hlin dukdo i!
Dapthen in um thil lo ing.
Thirhlung tum thawm za ing!
Raltawnghnak awthawm za ing.
20Hnophnak pakhat hnua
pakhat hlun dun i;
Ram pumpuhluk tu hnawmborh
pumhnak ah cang i;
Mangrin loin i ponhlamte tu hnawm sio i.
Amahte ponzarte tu hnawm sek i.
21Zaicam tian raltawnghnak
thawm heh za tuhai,
Thirhlung tum thawm za tuhlai ing?
22 Bawipa in,
“I minungte tu mivoi ciang i;
Kaimah i ling nawn lo i,
Naupang voi niu bang i;
Lingthiamhnak zaikhai nai tlang lo i.
Thilsual bawn cenin thiam tlang ngai i,
Ikhalselai thilpha cenin bawnsuak
tlang lo i,” ti i.
Jeremiah in Hnawmralhnak Hmu Cia I
23Laivum sik ai zamhnak lio
ramkhing le hnawmborh pumhnak i.
Van i cuan fangin tleuhnak zaikhai um lo i.
24Tlangsangpui i hlir fangin hlin dumdo i;
Mual cikniute khai hlin dekdo i.
25Minung aisu khai um nawn lo i;
Vaniute khai zuang sek i.
26Rampha ngai tu nelrawn ah cang zo i.
Amahte khuapui tu hnawmborh
pumhnak ah cang zo sek i.
Bawipa ai thinrawhnak manin.
27 Bawipa in,
“Laivum pumpuhluk tu ramkhing ah cang tuh i,
Ikhalselai hnawmruai tuh sek lo ing,”
ti i.
28Lailung in mithi ngai tuh i;
Vante khai thim tuh sek i.
Bawipa in rel zo ai
a thinlung thleng tuh nawn lo i.
A thu ruatcat zo ai, khel lamah let
tuh nawn lo i.
29Siphuh vum to ralkap le conkiang ralkapte ai
thawmvang a za fangin aisusu
khai tlan tuh sio i.
Mihrek tu tupui songah relh tlang tuh i,
Midang tu lung liang lakah
ben tlang tuh i.
Khua hmuahhmuah in khing tuh sio ai
minung aisu khai um tuh nawn lo i.
30Aw Jerusalem, na bo lawlaw i!
Zaimanin hnikpon san in thuam dun isi?
Zaimanin na sui le na ngun hlawnthil
suah ai thuam dun heh isi!
Zaimanin ning mit khai mawihnak
si mat isi?
A lovang in par isi!
Na daihtu na tlangvalte in na hnawl zo ai,
na rek tuh sawn i.
31Nupang nau nai fangin
authawm bang za ing;
Fa upa ber nau nai kaphnak
thawm bang i.
Ciami tu Jerusalem a haihawh
thil lo aihnak thawm i.
A kut tung ai, “Kai tu i bo zo i,
Kaimah rek tuhin kawi zo i,”
tiin aihnak thawm i.
Currently Selected:
JEREMIAH 4: RZB
Highlight
Copy
Compare
Share
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
