JAMES 3
3
Ning Hmurka Ralring Tu Ih
1U le naute, mi tam ze in zirhtu cang hiam mah ih. Zaimantifangin ning linghnak bangin kinmah zirhtute tu midang tahin luar deuh in thukhanhnak tawk tlang tuh ising. 2Kin veksen in khelh pang de ising. Ikhalselai a ponkam ai a khelh lomi heh a taksa pumpui a uk dun bentu i ai misemkhim i. 3Siphuh heh kin thu hlun tuhin a kakharh a ka ah kharh ai kin daih hmuncang ah fehruai ising. 4Ihlahle lawng heh ruat tucuk ih; lian ngai ai hlivua in fehruai i, inapui a uktu ngaingai heh lawng herhnak cikniu i ai ciami hmangin lawng mawngtu in a daihhnak ah fehruai i. 5Ka songai lai khai ciabang i; cikniu napui thula lian ngaingai tluangkhawng thai i.
Thing le hampa zaitluk tam ai tu kaupui ita inkhai maibaw cikniu in kang sek de heh ruat tu ih. 6Ciami maibaw bang heh lai i. Lai heh a pha lo i ai kin taksa songah umhnak hmun nai ai ciata in phatlohnak in kin ruangpum veksen ah feh sek i. Kin nunhnak hampui tianin mai in tai ai ciami mai tu hell hmun in a hlenghnak i. 7Minung in ramsa hmuahhmuah ngawiruai thil lomi nai lo i; hampalak ramsa le vaniute ituseh, bokvak ai a vakmi ramsate le ti songai ngate ituseh, ngawiruai thil sio i. 8Ikhalselai ka songai lai heh a ngawiruai bentu ngaingai aisu khai um lo i. Lai tu a pha lomi i ai uk thilh lomi i; mirek thai ru nai i. 9Kin lai heh kin Bawipa le kin Pathian thangphathnak ah hmang ai cen amah ai hmuihmel cuangin a semsuahhnak kin minungpuite cukcamhnak ah hmang lala ising.#Sem 1:26 10Thangphathnak ponkam le cukcamhnak ponkam tu kin ka pakhat songin suak i. U le naute, hebang in i tuhhnak ilo i. 11Cirhti pakhat songin ti hlum le ti kha suak awng lo i. 12U le naute, thaikung in olive thai, thai awng kel lo i; cabit kuang inkhai thaihmin thai awng lo i. Cen cirhti al inkhai ti hlum suah awng lo i.
Vum Lam Ai Fimhnak
13Ningmah lakah fimhnak le linghnak a naitu um aw i sim? Um le i sikhaw a nuncan pha in larruai tu selai, thinniamhnak le fimhnak thawn thilpha bawnhnak in larruai tuseh. 14Ikhalselai ning thinlung songah iksikhnak le mi huahnak le mah ca lek ruathnak ian dim lekhaw i fim i tiin porh dun hnelhno mah ih; thutak vumah sualhnak bawn hnelhno sawn i si. 15Ciabang fimhnak tu vancung in a hlenghnak ilo i; Laivum fimhnak i; rauhla thawn a raldunmi fimhnak i ai khuasia fimhnak sawn i. 16Iksikhnak le pamhaphnak ian a umhnak hmunah buaihnak le phatlohnak a phuncang um ve i. 17Ikhalselai van in a hlenghnak fimhnak tu zaidang tahin a thiangmi fimhnak i; ciahlaiah daphnak in dim i, a lungnem ai pawlkom thiam i. Ninghio thinpemhnak nai ai naper pha ai thai suakruai i. Hlaihdanhnak nai lo ai ti dun khel khai nai lo i. 18Cen remhnak a bawntute ai daphnak thawn pawihnak hlaici in amahte khawmhnak a thai heh phathnak i.
Currently Selected:
JAMES 3: RZB
Highlight
Copy
Compare
Share
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
