ISAIAH 51
51
Jerusalem Hnemhnak Thu
1 Bawipa in,
“ohnak a daihtute, i ngai tucuk ih!
I bawmhnak daih in a kawitute,
Ning suakhmun lungpui khiah ruat tu ih,
Amahte in ning laihnak lungto khiah!
2Ning pu Abraham le ning tetu
Sarah khiah ruat tucuk ih.
I ko laiah Abraham tu fate nai lo i.
Ikhalselai hmuifu pe ai fate pe ing.
A tesinfate tu mi tampui ah bawn ing.
3“Jerusalem vumah ngaihharhnak nai tuh ing.
Siatsuah siohnak a khua ramai a umtute vumah.
A ram tu nelrawn ah cang napui
vuandum ah cangruai leh tuh ing,
Eden ai i dahhnak vuandum bangin.
Lungawihnak le thinnuamhnak um tuh i,
I hnenai anghnak le thangphathnak in dim tuh i.
4“Aw i minungte, i ngai tu ih;
I ponghnak heh ngai tu ih.
Miphun hmuahhmuah hnenah
I thuzirhhnak hlengruai tuh ing.
I dante tu amahte caah tleuhnak i tuh i.
5Rang ngai in kawi tuhai o tuh ing,
I mi nehhnak tu nong zo i.
Miphun hmuahhmuah kaimah rori in uk tuh ing;
Ram hlapuite in kaimah kawi tuh khiah umlam tlang i.
I ohnak tu umlam in iang tlang i.
6Vanvum khai hlir tu ih! Laivum heh cuan tu ih!
Van khiah maikhu bangin pai tuh i;
Laivum heh hnikpon hlun bangin her tuh i;
Cen mi zongzong thothi bangin thi tuh sio i.
Ikhalselai i mi nunohnak tu kumzangza tham tuh i;
I mi nehhnak tu kumzangza in kho tuh i.
7“Dikcanghnak a lingtu ningte, i ngai tu ih;
I zirhhnak thinlung songah a dahtute!
Midang in na hring ai zoh na suam ta inkhai
zaikhai lau mah ih!
8Ciabang minungte tu
Hnikpon mot bangin bo tuh i.
Ikhalselai i mi nunohnak tu kumzangza hrang i tuh i.
I mi nehhnak tu catloin kho tuh i,” ti i.
9Aw Bawipa, tho tulai kin bawm tu!
Na hathnak suah tulai kin o tu!
Hlanlai ai na suak awng bangin suak leh tu.
Tipuithuanthum rulhreng Rahab a rektu le
a sattu heh nangmah isi.
10Tifingriat a kangruaitu le
na ohnak tepawl fehsuak thil tuhin
ti lakah lampui a bawntu heh nangmah isi.
11Na ohnak tepawl tu Jerusalem ah,
lungawi aipuang in, la sa kong le
au kongin hleng tlang tuh i.
Kumzangza in lungawi tuhai
thinhnawmhnak le lungsiahnak in
kumzangza in luat tuh i.
12 Bawipa in,
“Na hatruaitu heh kaimah ing.
Zaimanin hampa bangin a san com ai
a thi thai minung tu ning lau hnelhno i?
13Ningmah a bawntu Bawipa,
Vanvum khai a pharhtu le
lailung ai hamtohhnak a dahtu Pathian khiah
hai tlang zo i sim?
Zaimanin na naunehtute ai thinrawhnak le
Ningmah siatsuah tuh a tumtute heh
hlawng biakbo in kih i si?
Amahte thinrawhnak in zaikom inkhai
ning dap thil tuh awng lo i!
14Tunai thawngtotute tu a rai hlanah luat tlang tuh i,
Amahte nun sau tuhai
a duhzah in aih tuh rong ngah tuh i.
15“Kai tu Bawipa ning Pathian ing.
Tifingriat tu kaimah in phawr ai
A tilepte tu hukruai dekdo ing.
I hming tu Hmualnaiber Bawipa ing.
16Vante khai pharh ai
laivum ai hamtohhnak khai Kaimah in bir ing.
Jerusalem hnenah, ‘Nang tu i minung isi!
I thuzirhhnak pe zo ai
I kut in na hup ing,’ ti ing,” tiin ti i.
Jerusalem Tuarhnak Dap Zo I
17Aw Jerusalem, phawk tuhang!
Phawk tulai tho tuhang!
Bawipa in a thinraw in na dingruaihnak
cawhhnak khuat heh ding zo isi.#Thup 14:10; 16:19
A holnawi tianin ding ai na sawnruai zo i.
18Na konghoitu aisu khai um lo i.
Na minung lakah a kut san in
Na thotu aisu khai um lo i.
19Bawngsiahnak phun hnih tawk isi;
Raltawnghnak manin na ram tu hnawm sio ai,
Na minungte tu rong loin ro sio i.
Na ninghiotu aisu khai um lo i.
20Lam kingkawn cangcang ah
na minungte tu helhep in leu tlang bial i.
Thangtohtu ai awkhnak kiho bang i.
Pathian ai thinrawhnak ru tawk tlang i.
21Harsahnak a tuartu Jerusalem mite,
Zuri bangin a sawn hnelhnotute,
22 Bawipa ning Pathian in ning ṭan ai ning hnenah,
“I thinraw in i pehnak khuat tu
ning kut songin lang leh hnelhno lai ing.
Ning tluruaitu zu heh
ding kul tuh nawn lo ihang.
23Ningmah ning naunehtute,
Lampui ah ning tluruaitute hnenah,
Hnawmborh fon bangin ning fontute hnenah
ciami khuat khiah pe tuh ing,” tiin ti i.
Currently Selected:
ISAIAH 51: RZB
Highlight
Copy
Compare
Share
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
