HEBRU 13
13
Pathian Lungawiruaihnak
1Khristian unau ning imanin pakhat le pakhat it dun tu ngio ih. 2Ning inn ah mikhual tlungruai tu ilai ngaihhar tu ih. Ciatih bangin a bawntute in amahte lin loin a inn ah vancungmi tlungruai de i.#Sem 18:1-8; 19:1-3 3Thawngtote hai mah ih; anite thawn thawngto tlang bangin ruat dun tu ih. Harsahnak a tuartute hai mah ih; anite thawn a tuar tlang bangin ruat dun tu ih.
4Hoidunhnak heh aisu inkhai upat hmaizah tuhhnak i. Nupui le pasal tu sangtlak in um tu veve seh.#13:4 Nupui le pasal tu sangtlak in um tu veve seh tihnak tu Greek in let fangin khuahluan heh cianghlim tuseh tiin i. Nupa sualhnak a bawntu le kangkawm sualhnak a bawntute tu thukhanhnak tuar tlang tuh i.#Danp 31:6, 8; Jos 1:5
5Tangka daih ze mah ih; ning naihnak ah lungkhim tu ih. Zaimantifangin Pathian in, “Ning zam tuh lo ai ning hlum tuh lo ing,” kin ti i. 6Ciatih imanin ralpha in um ngasing khaw,
“Bawipa tu i bawmtu i,
thin kin lau tuh lo i.
Mi in kin vumah ziang bawn
thil tuh i?”
tiin ti ngasing.#Saam 118:6
7Pathian thu ning reltu, hlanai ning konghoitute khiah hih tu ngio ih. Amahte nun songai nundan le amahte thihhnak thute khiah ruat leh tu ilai amahte sanghnak khai phatak ngai in cung tu ih. 8Jesuh Khrih tu mizan, tunnia le kumzangza in kho ngio i. 9Zirhhnak phun dangdang in lampui dik in ning pialruai maseh. Kin thin thahathnak heh, aihdin thula ah ai tuh, ai tuh lo tiin dan songin ngah loin, Pathian ninghiohnak songin ngah pha sawn i. Dan a hluntute tu ciami a hlunhnak dan in bawm cuanglo i.
10Judah mite Pathian biahnak ai naruaihtu suangbawite in kin puleng vumai hibawlhnakte heh amahte daihdaih in ai thil lo i. 11Sumhnam thisan heh Judah mi Suangbawi Sang in sual hibawlhnak hrangah Hmun Thianghlim Ber songah lutpui i; ikhalselai ciami sumhnam ruangpum heh hnarpua ah tai tlang i.#Sua 16:27 12Ciatih imanin Jesuh a thi fangin mizapui sualhnak in a thisan thawn somciang tuhin Jesuh tu khuapui pualam ah thi i. 13Ciamanin kin khai hnarpua ah feh in a tuarhnak zakthihnak tuar tlang ngasing. 14Zaimantifangin he laivum ah kumzangza a khomi khuapui nai lo ising; a hleng tuhlai khuapui ian cuan tlang ising. 15Ciamanin kin hibawlhnak tumrul ah thangphathnak heh Pathian hnenah pe tlang ṭio ngasing; ciatih ai kin pehnak heh kin ka in Jesuh kin Bawipa i tiin kin phuanghnak i. 16Phathnak bawn heh hai mah ilai, ning naihnak midang thawn kawm tlang tuh khai hai mah ih; zaimantifangin ciami tu Pathian lungawiruaitu hibawlhnak i.
17Ning konghoitute thu ngai tu ilai amahte thupehnak bangin hlun tu ih. Amahte naper dan heh Pathian hmaiah phuang tlang leh tuh sio manin cawlum loin ning kilkhawlhnak i. Amahte thu ngai le i sikhaw lungawi aipuang in amahte naper per tlang tuh i; amahte thu hlun hlah le i sikhaw lungsiahnak thawn per tlang tuhai ciami heh ning caah zaikhai hnempuihnak um tuh lo i.
18Kin caah sawngen tu ṭio ih. A hmanmi heh bawn kin hiam ṭio imanin a hnawm a pha thiathiamhnak kin thinlung heh thiang i. 19Ning hnenah Pathian in i hlengruai cing tuhin roh ngai in sawngen tu ih, tiin ning ngen ing.
A Tawphnak Sawngen
20Hibawlhnak ai a nun a pehnak manin Tuukhal Lian kin Bawipa Jesuh tu Pathian in thihhnak in thoruai zo i; Cen a thihhnak songin kumzangza thutiamhnak khiah khoruai zo i. 21Daphnak Pathian in amah ai daihhnak ning bawn thil tuhin ning kulhnak thilpha hmuahhmuah ning pe tu hram seh; cen Jesuh Khrih hmangin a daihhnak heh kin songah bawn tu hram seh. Kumzangza in kumzangza tian Khrih tu songlawi in um tuseh! Amen.
A Tawphnak Ponkam
22U le naute, lai i kuathnak heh a sau ze lo manin hetihin thapehnak thu i relhnak heh thinsau ngai in ngai tu ih, tiin ning ngen ing. 23Kin unau Timothy tu thawng songin suak zo i ti ning lingruai i hiam i. Hleng man lekhaw ningmah tawk tuhin i kawi fangin fehpui tuh ing.
24Ning konghoitute le Pathian minungte veksen hnenah kin hnuksathnak kin rel sah tu ih. Italy ramai a ummi unaute inkhai hnuk ning sat tlang i.
25Pathian ninghiohnak ning hnenah um tu hram seh.
Currently Selected:
HEBRU 13: RZB
Highlight
Copy
Compare
Share
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
