HEBRU 10
10
1Judah mite ai dan cenin a ngaingai heh felniu le khimniu in larruai thil lo i; a hleng tuhhnak thil pha ai a hla ian i. Amahte bawn kel hibawlhnak heh kumsiar in bawn de i. Ciatih ilekhaw akontih in dan in a ruaihnak bang hibawlhnak hmang in Pathian hnen a kawitu minungte heh mi semkhim in bawn thil tuh i? 2Pathian a biatute amahte sualhnak in cianghlimruai ngaingai iselai sual i ing ti thinlung nai tlang tuh nawn lo ai hibawlhnak hmuahhmuah um tuh nawn lo i. 3Ikhalselai thil umdan ngaingai ahcen kumsiar in amahte sual linghnak tuhin hibawlhnak sawn i. 4Zaimantifangin kawlpawcang le me thisan in sualhnak heh cianghlimruai thil lo i. 5Ciamanin laivum ah Khrih a lar dawn fangin Pathian hnenah,
“Hibawlhnak le selhnak tu
na daihhnak ilo i;
ikhalselai kaimah caah
taksa pum remruat zo isi.
6Sumhnam maitai hibawlhnak
vumah lungkhimhnak
nai lo i, sual cianghlimhnak tuhin
hibawlhnak ahkhai anghnak
nai cuanglo i.
7Cen dan laibu songai
i thula nganhnak bangin
a hnenah, ‘Aw Pathian,
na daihhnak bawn tuhin
heta ah um ing,’ ti ing,” #Saam 40:6-8
tiin rel i.
8A hmasaber ah a relhnak tu, “Hibawlhnak le selhnak ituseh, puleng vumai sumhnam le sual cianghlimhnak hrangah hibawlhnak ituseh, na lungawi zawng le na daihhnak ilo i,” ti i. Hemi hibawlhnakte tu dan bangin bawnhnak inapui hebang in rel thotho i. 9Cia hnuaah ani in, “Aw Pathian, na daihhnak bawn tuhin heta ah um ing,” tiin ti i. Ciamanin Pathian in hibawlhnak hlun pawl heh hnawl sek ai cia ca in Khrih hibawlhnak dah i. 10Zaimantifangin Pathian in bawn tuh a daihhnak tu Jesuh Khrih in bawn sek manin amah ai taksa pum kumzangza hrang in a pedunhnak thawmin kin sualhnak in kin somciang i.
11Judah suangbawite in amahte ṭuanvo heh nisiar in bawn tlang ai amahte sel dehnak hibawlhnak tu vel tampui sel tlang i. Ikhalselai hibawlhnak in sualhnak tu somciang awng lo i.#Luat 29:38 12Ikhalselai Khrih in sualhnak hrangah hibawlhnak tu vel khat pe ai ciami tu kumzangza hrangah i; cia hnuaah Pathian kiahhan lamah to i.#Saam 110:1 13Ciata in Pathian in a ralte a ke phah ah a bawn hlan song iang i. 14Vel khat hibawlhnak in sualhnak in a somciang mite tu kumzangza misemkhim ah bawn i. 15Cen Rauhla Thianghlim inkhai a lingpuihnak kin hnenah larruai i. A hmasaber ah Rauhla Thianghlim in,
16“Hemi tu Bawipa ai ponkam i:
Hmai lam can ah amahte thawn
kin bawn tuhhnak thutiamhnak tu
hetihin i; I dante a thinlung songah
dah tuhai amahte ruathnak
vumah ngan tuh ing,” #Jer 31:33-34ti i.
17Ciahlaiah rel lehsal ai, “Amahte sualhnak le hnophnak tepawl tu hih tuh nawn lo ing,” tiin ti i.#Jer 31:34 18Ciatih bangin amahte sualhnak ngaithiam lekhaw sual hibawlhnak kul nawn lo i.
Pathian Nong Ngasing
19Ciamanin u le naute, Jesuh thihhnak thawmin Hmun Thianghlim Ber songai lut thil luathnak semkhim ngah zo ising. 20Amah in ponzar zik in lampui thar, lampui nung, kin hon zo i. Ciami ponzar tu amah ai taksa pum i. 21Vancung ai Pathian innpui kilkhawltu tuhin Suangbawi Sang ber nai ising. 22Ciamanin thinlung tak rori in le sanghnak fel thawn Pathian nong ngasing. Mawhhnak thinlung cianghlimruai mi le cianghlim ti thawn somciang mi kin taksa pum thawn Pathian nong tlang ngasing.#Sua 8:30; Ezk 36:25 23Umlamhnak nai i ing tiin kin larruaihnak kho ngai in pom ngasing; zaimantifangin a thukhamhnak a khimruaitu Pathian heh rintlak i. 24Pakhat le pakhat zawnruathnak nai ngasing; pakhat le pakhat bawm dun in ithnak le phathnak khai larruai ṭen ngasing. 25Hmunkhat ai kin pumkhawm dehnak heh com hlah sing ih. Mihrek in com napui Bawipa ai Ni a nong zianzo manin, kin tu pakhat le pakhat thazang pe dun tuh amam ising.
26Thudik kin ling ngah hnuaah sualhnak ling kong in bawn betbo thotho lesingkhaw sual thianfai thilhnak tuhin sual hrangah hibawlhnak zaikhai um nawn lo i. 27Amahte caah a tanghnak covo tu a hleng cing tuh Pathian thukhanhnak le Pathian a tawngcaitute a kang sektu tuh a kihkul mai khiah lau kong in iang tuh lek ihang.#Isa 26:11 28Moses dan thu a hlun lotu heh thunaitu pahnih pathum in sual i tihnak in a thu relcathnak ah ninghiohnak zaikhai um loin rek i.#Danp 17:6; 19:15 29Ciatih ilekhaw, Pathian Fapa zaisiar lotu le sualhnak in mi cianghlimruaitu Pathian thutiamhnak thisan nautattu le, ninghiohnak a naitu Rauhla a zohsuamtute tang zaibang in bawn tuh ini? Ciabang minung tu zaitlukin cawhhnak roh ngai tuar tuh i, ti khiah ruat tu ih! 30Zaimantifangin, “Kaimah in phuzul tuh ing, kaimah in rulthun tuh ing,” a ti hlaiah, “Bawipa in a minungte tu thukhan tuh i,” a titu aisu i ti ling i ing.#Danp 32:35, 36 31A nungmi Pathian kut songah tlok heh zaitlukin tihikkul i.
32Hlan ai ning umdan ruat tucuk ih. Cialai ah Pathian tleuhnak ning hnenah a hleng sawng ah tuarhnak le harsahnak a phunphun tawk tlang napui ciami harsahnak in ning neh lo i. 33Vel khatkhat ah mizapui hmuh ah zohsuamhnak le reemhnak tawk tlang ai vel dang ah ciatih bangin zohsuamhnak le cawhhnak a tawktute tuarpui tlang i si. 34Harsahnak a tawkmi thawngto mite vumah ngaihharhnak nai tlang i si. Ning naihnak thilri hmuahhmuah ning sut sio fangin ning sunghnak heh anghnak in tuar ben i si. Zaimantifangin he thilri tahin in pha sawn le kumzangza a kho tuh nai lai ising ti ling i si. 35Ciamanin ning thin nau mah ih, zaimantifangin ralphahnak nai le i sikhaw lehsawng tampui ngah tuh i si. 36Pathian daihhnak bawn thil tuhin le a thukhamhnak co thil tuhin thinfual in um tu ih. 37Zaimantifangin Lai Thianghlim in,
“Can comniu hnuaah
a hleng tuh mi Ani tu
hleng tuh i, rai tuh lo i.
38A dikcangmi a miphun in
sang tuhai nung tuh i;
Ikhalselai khellettu um lekhaw,
amahte vumah lung i awi
tuh lo i,” #Hab 2:3-4ti i.
39Kin tu khel lamah let ai a pairal mite ilo i ing. Sanghnak nai in nunohnak a cotu sawn i ing.
Currently Selected:
HEBRU 10: RZB
Highlight
Copy
Compare
Share
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
