1 THESALON 4
4
Pathian Daihdan Nun
1A hnuataber ah u le naute, Pathian daihdan ai nung thil tuhin akontih in nung tuh i si ti khiah kin hnenin zir zo i si. Ciatih bangin ning nung thil amam tuhin Bawipa Jesuh hming in ning forh ing. 2Zaimantifangin Bawipa Jesuh hnenin a hlenghnak thupehnak bangin kin zirhhnak i ti khiah ling i si. 3Pathian in ning tu nu le pa sualhnak bawn hrimhrim loin thianghlim tuhin ning daih i. 4Pasalte, ning nupui thawn#4:4 Nupui thawn tihnak tu ning taksa ti inkhai let thai i. thianghlim le mitsih mawi in um tu ih; 5Pathian ling lo lawki mite bangin taksa hiamhnak hlun in um mah ih. 6Hemi thu ahhen Khristian ning unaute zohsuam in nautat mah ih. Hebang khiah bawn tuh loin ning rel zo ai tunah roh ngai in ralringhnak ning pe ing: he bangtluk a bawntute tu Bawipa in cawh tuh i. 7Pathian in nupa sualhnak bawn tuhin kin ko lo i, thianghlim tuhin kin ko sawn i. 8Ciamanin he thuzirhhnak a hlun nuam lotu heh minung ai thu el ilo i, Rauhla Thianghlim ning petu Pathian ai thu el tlang i.
9Sangtu unaute it dun tuh thu ah lai ngan kul nawn lo i. Pakhat le pakhat it dun tu ih, tiin Pathian in ningmah rori ning zirh zo ai, 10Macedonia ramai a umtu ning unaute vumah ciatih bangin nung zo i si. U le naute, ciahnak tahin pha amam in nung tuhin ning forh i nuam i. 11I rel cia zo bangin dap niu in nung tuh tum tu ilai ning naper ṭen heh per in ning pumcawmhnak hlawh tu ṭen ih. 12Ciatih bangin Pathian sang lotute ai upat le kihzahhnak co tlang tuhai ning kulhnak ah midang rinsan hnelhno ning kul tuh lo i.
Bawipa Ai Hlenglehhnak
13U le naute, umlamhnak nai lo ai lungsia in a umtute bangin um tuh loin, a thi cia mite ai thula ah thutak ling tuh ning daih sah ing. 14Jesuh tu thi ai tho leh i ti sang ising; ciamanin Jesuh sang ai a thitu heh amah thawn hmunkhat ah Pathian in thoruai tuh i, ti sang ising.
15Tunai kin zirhhnak tu kin Bawipa ai zirhhnak i: kin Bawipa a hleng leh fangin a nungmi kinte heh a thi cia mite ai hlanah feh hmasa tuh lo ising.#1Cor 15:51-52 16Van in Bawipa ai thupehnak aw thang tuh i, van in vancungmi upa ber ai auhnak aw i tuh i, Pathian ai thirhlung aw thang tuhai Bawipa tu vancung in zuktolh tuh i. Khrih a sangtu a thi cia mite tho hmasa tuh i; 17cen kin a nung laitute in van ah Bawipa tu a tho hmasa pawl thawn mairo lakah kin lang tuh i. Ciatihin Bawipa thawn kumzangza in um tlang tuh ising. 18Ciamanin pakhat le pakhat he thu in hnem dun tu ih.
Currently Selected:
1 THESALON 4: RZB
Highlight
Copy
Compare
Share
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
