Кердипэ 27

О Яков хохаимаса лэл пэ дадэстэ алгыштима

1Кана о Исаак пхурило тай о якха лэски на дикхенас, ов диняс икос э Исавес, пэ барэ чявэс, тай пхэнляс лэски:

— Мо чяво!

— Мэ атхэ, — пхэнляс о Исав.

2О Исаак пхэнляс:

— Мэ ужэ пхуро, тай на джянав о дес мэ мэримаско. 3Лэ то мултуки — тэ стриладэс тай то луки — тай никлё андэ ливади тэ аракхес манги гайванен. 4Тав манги хапэ, саво мэ дэхав, тай ан манги тэ хав, тэ алгыштияв тут ангал мэ мэримастэ.

5Э Рэвэка шунляс, сар о Исаак зборизэлас пэ чявэса э Исавеса. Кана о Исав гело ки ливади тэ мударэл тай тэ анэл гайванес, 6э Рэвэка пхэнляс пэ чявэски э Яковески:

— Мэ шунлём, сар то дад пхэнляс тэ пхралэски э Исавески: 7«Ан гайванес тай тав манги дамлыс хапэ, мэ тэ алгыштияв тут ангал Сагбус Яхвэ, бискай мэрав». 8Шун ман лачес, мо чяво, тай кер, сар мэ кан пхэнав. 9Джя ки атара тай ан манги до зиядэ бузнорэн, тэ керав мэ дамлыс хапэ тэ дадэски, асавко, сар ов дэхэл. 10Дэчи гел лэс тэ дадэстэ, ов кан хал тай кан алгыштиел тут ангал пэ мэримастэ.

11О Яков пхэнляс э Рэвэкаки, пэ дэяки:

— Вай мо пхрал о Исав алаи балало, ай мандэ э моркхи би балэнги. 12Ами, мо дад тэ сыладиела ман? Мэ кан овав ангал лэстэ хохавно тай кан лав опэр мандэ арманя, ами на алгыштима.

13Э дай пхэнляс лэски:

— О арманя мэ овэн опэр мандэ, мо чяво, ай ту кер, сар мэ пхэнав: джя тай ан бузнорэн.

14Ов гело, лиляс э бузнорэн тай андяс лэн пэ дэятэ, тай ой тавдяс дамлыс хапэ, асавко, сар дэхэл о дад. 15Дэчи э Рэвэка лиляс о лаче савутя пэ барэ чявэски э Исавески, савэ сас латэ андэ кхер, тай урявдяс опэр тикно, опэр Яков, 16ай лэски васта тай э мэн, катэ нанай бала, учярдяс э бузнорэнги моркхяса. 17Дэчи ой диняс пэ чявэс э Яковес дамлыс хапэ тай манро, савэ тавдяс. 18Ов ало пэ дадэстэ тай пхэнляс:

— Мо дад!

— Аки мэ, — пхэнляс одова. — Ту саво андар мэ чявэндэ?

19О Яков пхэнляс пэ дадэски:

— Мэ — о Исав, то баштутно. Мэ кердём, сар ту пхэнлян. Мангав, ваздэтут, бэш тай ха мэ гайванен, ту тэ алгыштиес ман.

20О Исаак пхучляс пэ чявэс:

— Сар ту аракхлян лэн аякха чяльти, мо чяво?

— То Сагбус о Яхвэ диняс ман лачипэ, — пхэнляс ов.

21О Исаак пхэнляс э Яковески:

— Пашо пашэ, мэ тэ сыладияв тут, мо чяво, чячес ту мо чяво о Исав я на.

22О Яков пашыло пашэ пэ дадэстэ ко Исаак, саво сылады лэс тай пхэнляс:

— О сэси — сар ко Яков, ай о васта — сар ко Исав.

23Ов на пэнджярдяс лэс, вай о васта лэстэ сас балалэ, сар ко Исав, тай ов алгышты лэс.

24— Чячес ту мо чяво о Исав? — пхучляс о Исаак. Ов пхэнляс:

— Ва, адава мэ.

25О Исаак пхэнляс:

— Мо чяво, ан манги то хапэ пашэ, тай мэ кан хав, ай дэчи кан алгыштияв тут.

О Яков диняс лэс о хапэ, тай ов халяс, андяс винас тай ов пиляс. 26Дэчи лэско дад о Исаак пхэнляс лэски:

— Пашо, мо чяво, тай чюмидэ ман.

27Ов пашыло тай чюмидиняс лэс, тай пхэнляс:

— Вай, мо чяво кхандэл, сар кхандэл э ливади, сави алгышты о Сагбус о Яхвэ.

28О Дэл мэ дэл тут катар булутенго пани

тай катар имиша ки пхуяки,

бут гив тай тэрно винас.

29О породэс мэ керэн туки иргатлыки,

тай дюнядэс мэ бангён туки.

Ов сагбус опэр тэ пхралэндэ,

тай мэ бангён ангал тутэ о чявэ тэ дэякерэ.

Мэ диндёл арманя одова,

саво дэл тут арманя,

ай кон алгыштиел тут,

мэ овэл алгыштимэ.

30Сар о Исаак бытэрды тэ алгыштиел тай о Яков никлисто пэ дадэстар, ало катар астардипэ лэско пхрал о Исав. 31Ли ов тавдяс дамлыс хапэ тай андяс пэ дадэски. Ов пхэнляс лэски:

— Дадэ, ваздэтут, бэш тай ха мо хапэ, ай дэчи алгыштие ман.

32Лэско дад о Исаак пхучляс:

— Кон ту?

— Мэ то чяво, — пхэнляс ов, — то баштутно, о Исав.

33О Исаак алаи изранило тай пхэнляс:

— Кон эсас одова, саво мудардяс гайванес тай андяс манги? Мэ халём лэс ангал отхэ, кай ту алян, тай алгыштым лэс. Ов акана да кан овэл алгыштимэ!

34О Исав шунляс о зборэс пэ дадэски, лачес диняс бэбэря тай пхэнляс пэ дадэски:

— Алгыштие ли ман, дадэ!

35Ай одова пхэнляс:

— То пхрал ало ярамазлыкеса тай лиляс тутар о алгышы.

36О Исав пхэнляс:

— На чячимаса ов тхэдо Яков#27.36 Авг. евр. нав «Яков» («акев» – патум) шунлёл сар збора «якав» («ов лиляс патуматар» я «ярамазлыкеса хохавдяс»). ? Дувар ов хохавдяс ман: лиляс мо баштутно аракхлипэ, акана ли мо алгышы!

Тай пхучляс:

— На ачило тутэ алгышы ли манги?

37О Исаак пхэнляс э Исавески:

— Мэ кердём лэс сагбус опэр тутэ, тай алаи лэски тухумен динём лэстэ тэ овэн иргатя, тай башладым лэс манрэса тай тэрнэ винаса. Со камэл мэ акана тэ керав туки, мо чяво?

38О Исав пхэнляс пэ дадэски:

— Тутэ екх алгышы си, дадэ? Алгыштие ли ман, мо дад!

О Исав лачес руно. 39Лэско дад о Исаак пхэнляс лэски:

— Кан овэл то бэшыпэ

дур катар имиша ки пхуяки,

дур катар пани ки булутенго опрал.

40Ту кан бэшэс камаса

тай кан керэс иргатлыки тэ пхралэски.

Кан авэл вахыти, кана ту кан ваздиндёс,

ту кан чес лэско пхарипэ опрал тэ мэнятэ.

О Яков нашэл ко Лаван

41О Исав гаравдяс холи опэр Яков андар алгыштима, саво диняс лэс о дад, тай пхэнляс пэски: «О деса э роимаски пал мэ дадэстэ пашэ — дэчи мэ кан мударав мэ пхралэс э Яковес».

42Э Рэвэкаки пхэнлэ, со пхэнляс лако баро чяво о Исав, тай ой бичялдяс пал тикно чяво, пал Яков, тай пхэнляс лэски:

— То пхрал о Исав тюшундиел тэ мударэл тут. 43Мо чяво, кер, сар кан пхэнав: чяльти праста андэ Харан мэ пхралэстэ ко Лаван. 44Бэш лэстэ саво-то вахыти, бискай на кан тэныкизэл э холи тэ пхралэски. 45Кана э холи тэ пхралэски кан тэныкизэл тай ов кан бристэл одова, со ту кердян лэски, дэчи мэ кан бичялав тэ пхэнэн туки, кай камэл тэ авэс палэ. Соски манги тэ нашавав тумэн э дон андэ екх дес?

46Дэчи э Рэвэка пхэнляс э Исаакески:

— Мэ бэшымаски на лошазав андар адалэ чяяндэ ки хетеенги. О Яков тэ лэла пэски ромня аканутнэ джювля, асавкя хетеянка, дэчи соски мэ тэ бэшав?

Currently Selected:

Кердипэ 27: КРБ

Highlight

Copy

Want to have your highlights saved across all your devices? Sign up or sign in

This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/

Learn More About Библия опэр крымски романи чиб