Кердипэ 1
1
О Дэл керэл о дюняс
1Ангал о Дэл кердяс о булутя тай э пху. 2Э пху сас би ништоско чючи, тэмина сас опэр хорипэ, тай о Духос#1.2 Авг. евр. збора «руах» аврэ тханэндэ кан овэл «тынышы», «балвал». э Дэвлэско урялас опэр пани. 3О Дэл пхэнляс:
— Мэ овэл ярэки.
Тай уло ярэки. 4О Дэл дикхляс, кай о ярэки лачё, тай паляшты лэс катар тэмина. 5О Дэл тхэдяс о ярэки «дес», ай э тэмина — «рат». Сас бэлвэль, тай сас сабаги — дес екхто.
6О Дэл пхэнляс:
— Мэ овэл учярдипэ машкарэ ко паня, тэ палящиес о пани катар пани.
7О Дэл кердяс о учярдипэ тай паляшты о пани тал учярдипэ катар пани опэр лэстэ, тай уло аякха. 8О Дэл тхэдяс о учярдипэ «булутя». Сас бэлвэль, тай сас сабаги — дес дуйто.
9О Дэл пхэнляс:
— О паня тал булутя тэ кидиндён екхетханэ, тай тэ овэл шукипэ.
Тай уло аякха. 10О Дэл тхэдяс о шукипэ «пху», ай о кидинэ паня тхэдяс «морес». Тай дикхляс о Дэл, кай адава лачё.
11— Мэ керэл э пху зэлэниматэс: чяря гугусенца тай тэрэкя вэрсавэ сортенца опэр пху, савэ анэн имиша зэкенца, — пхэнляс о Дэл.
Тай уло аякха. 12Э пху кердяс алаи, со барёл: вэрсавэ сортя чяря, савэ анэн гугуся, тай вэрсавэ сортя тэрэкя, кай анэн имиша зэкенца. Тай о Дэл дикхляс, кай адава лачё. 13Сас бэлвэль, тай сас сабаги — дес трито.
14Тай о Дэл пхэнляс:
— Мэ овэн ярэкя опэр учярдипэ ки булутенго, тэ палящиел о дес катар рат, тай он мэ овэн сикаипэ, тэ галярэн о вахытя, о деса тай о брэша. 15Он мэ овэн ярэкя опэр учярдипэ ки булутенго, тэ овэл ярэки опэр пху.
Тай уло аякха. 16О Дэл кердяс дуй барэ ярэкя — о баро ярэки, тэ гортярэл о дес, тай о тикно ярэки, тэ гортярэл э рат, тай генэ Ов кердяс о чергэня. 17О Дэл тхэдяс лэн опэр учярдипэ ки булутенго, тэ анэн ярэки опэр пху, 18гортярэнас о дес тай э рат тай палящиенас о ярэки катар тэмина. О Дэл дикхляс, кай адава лачё. 19Сас бэлвэль, тай сас сабаги — дес штарто.
20О Дэл пхэнляс:
— Мэ пхэрдёл о пани дживиндимаса, тай мэ урян чирикля опэр пху, опэр учярдипэ ки булутенго.
21О Дэл кердяс барэ моряки гайванен, вэрсавэ дживиндиматэс кажнес лэски породаса, кай вразэн андэ пани, тай чириклен пхакенца кажня лаки породаса. 22О Дэл алгышты лэн тай пхэнляс:
— Мэ аракхлён тумэндэ пуя тай мэ овэн он бут, пхэрэн о паня андэ морес. Тай о чирикля мэ бутён опэр пху.
23Сас бэлвэль, тай сас сабаги — дес панджто.
24О Дэл пхэнляс:
— Мэ керэл э пху вэрсавэ сортя дживиндиматэс: кхерутнэ гайваня, тай кай балакадиен, тай вэшэски гайванен.
Тай уло аякха. 25О Дэл кердяс вэрсавэ вэшэски гайванен, тай кхерутнэ гайванен, тай вэрсавэ, кай балакадиен. Тай дикхляс о Дэл, кай адава лачё.
26Дэчи о Дэл пхэнляс:
— Тэ керас манушэс, сар амэн, Амаро шавлин. Мэ овэл сагбус опэр маче ки моряки тай опэр чирикля ки булутенгерэ, опэр гайваня, опэр алаи ки пху тай опэр алаи, со бэшэл опэр пху.
27Аякха о Дэл кердяс манушэс, сар Пэс; Ов кердяс лэс, По шавлин, сар шавлин э Дэвлэски; муршэс тай джювля Ов кердяс лэн. 28О Дэл алгышты лэн тай пхэнляс:
— Мэ аракхлён тумэндэ пуя тай мэ овэн бут; пхэрэн э пху тай овэн сагбудэс опэр латэ. Овэн сагбудэс опэр маче ки моряки, тай опэр чирикля ки булутенги, тай опэр алаи, со бэшэл опэр пху.
29Дэчи о Дэл пхэнляс:
— Мэ дав тумэн алаи о чяря э гугусенца опэр алаи ки пху тай алаи о тэрэкя, кай дэн имиша зэкенца. Он кан овэн тумэнги хапэ. 30Тай алаи э гайванен э пхуякерэн, тай алаи э чириклен опрунэн, тай алаи, со кхелавэлпэс опэр пху, — алаен, андэ кастэ си бэшыпэ, — Мэ дав тэ хан алаи э чяр.
Тай уло аякха. 31О Дэл дикхляс опэр алаи, со Ов кердяс, тай алаи сас бут лачё. Сас бэлвэль, тай сас сабаги — дес шовто.
Currently Selected:
Кердипэ 1: КРБ
Highlight
Share
Copy
Want to have your highlights saved across all your devices? Sign up or sign in
© 2021 Bible Translators of Ukraine
© 2021 Pioneer Bible Translators
This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/