ZEKARIA 2

Kiwonesio kya kaṟaṟu: Orusu lo heshia

1Kyasia ngawona mndu arie orusu lohesha mawokonyi hake. 2Ngawesa nku uhenda? Kanjiwia njihenda ihesha Yerusalemu, njimanye wulandari woke na wuleshe woke chando wui. 3Kudi malaika ulya alededa na inyi nyi ahoṟoki hafui, kukakure malaika ungi kundu wawonane, 4nao kambia, wikya mteṟa nowie manake ulya ke Yerusalemu kochikao nyi wandu cha shihongo shilawode omombo kipfa kya mfoeṟa fo wandu na shuuma shekaa ipfo kiidi kyake. 5Kipfa inyi Mndumii njechiwa omombo lo modo, njitengete njora tsose, na inyi njechiwa kiṟumi kiidi kyake.

Walesamiṟo walaho wawuye na kanyi

6Na wulalu dichenyi oruka lo mtsudu, Mndumii ahamba kipfa inyi nyi ngawarahanyitsa onyo cha njotanu tsiina tsa ruwehu, Mndumii ahamba. 7Kyasia iyo Sioni, kukiṟe, iyo okekaa hamu na mana o waka o Babeli. 8Kipfa Mndumii menyi matorito nahamba adi, Kundu njishihe kiṟumi, nanjiduma ko wandu wa mkambo walya walemuduo wapfungo, kipfa ulya momupaaya nyo, napaaya njeche ya riso lyake. 9Ambuya njechikutakuta owoko loko huye yake, nawo wadao wapfungo ko iwo walewaṟundia; nanyo mumanye ke Mndumii menyi Matorito nyi anjidumie. 10Imba, kesa, iyo mana o Sioni; ambuya njiicha na ikaa kiidi kyapfo Mndumii ahamba. 11Wandu wa mbaṟi tsose wechiwadana na Mndumii, wechiwang'u wandu wako, na inyi njechikaa kiidi kyawo; na iyo nomanye ke Mndumii Menyi Matorito nanjidumya kopfo 12Na Mndumii nechioṟa Yuda, iwe ohawi loke kiidi kya oruka luele, nechisambuṟa se Yerusalemu. 13Tsienyi sau, oshangunyi lo Ruwa nyo moose, kipfa nakure awuka mmbenyi yake njele.

Currently Selected:

ZEKARIA 2: KIM2

Highlight

Compare

Copy