MIKA 6
6
Madedo ha mwikimbi
1Adanyienyi kilya Mndumii-Ruwa aihamba;
“Iyo mwikimbi, henda dedia mafumvu,
na shifumvu shiicho ṟu lyapfo.”
2Adanyienyi mondu fo Mndumii-Ruwa nyo mafumvu,
adanyienyi nyo otende lo wuyana!
Mndumii-Ruwa nawode mondu na wandu wake.
O nechihamba kilya akumba nakyo Waisraeli.
3Mndumii-Ruwa nahamba adi,
“Lanye wandu wako kiki njilemuwutia?
Kiki ngamuwinyisha nakyo?
Njihaluonyi!
4 Inyi njilemuwuta Misri,
ngamukiṟa wusingenyi
ngamwinenga Mose, Aroni na Miriamu wamusongoe.
5 Lanye wandu wako,
kumbuonyi chandu Balaki mangi ya Moabu aleoka mtambo,
na chandu Balaamu mana o Beori alemhaluo.
Kumbuonyi shilya shilemuhoya njienyi kiidi kya Shitimu na Gilgali.
Kumbuonyi mumanye mawuto hako hemukiṟa!”
Wandu wawesa
6“Njihendie Mndumii-Ruwa na kiki,
kundu njiindie Ruwa ai huyako?
Ngesa, njimhendie na kiano kemaya modonyi,
njimnenge ihache lya maka fumu?
7Ngesa, Mndumii-Ruwa nechichihiṟo
na maruwa ha machondi kiku,
ang'u meda kiku (1,000) na kiku (1,000) ya mafuda ha msinefu.
Ngesa, njimneenge mana oko o kuwoka mbee,
kipfa kya ideko lyako,
ee, mana oko o kuwoka
kipfa kya wunyamaṟi woko?
Mwikimbi ahaluo
8Iyo mndu, Ruwa amekuloṟa kilya kii kicha,
kindo Mndumii-Ruwa akundi kikeri kiile;
iwuta mbonyi tsa wulohi,
ukunde isaṟia na ikunyiiṟa
oshangunyi lo Ruwa opfo kiidi kya mchumie mcha.
9Mndumii-Ruwa nalaha wenyi mṟi,
na nyi kichihiṟie imwindia.
Adanyienyi, nyo wandu wa Yuda,
adanyienyi nyo mulekusanza mṟinyi.
10“Ngesa, njechikarishia mawicho
hamawumbie kanyi kowo,
masaa halewoneka kwi wulembi,
hakaṟunda kwi kihesha kya wulembi,
kindo kikeri kiwicho?
11Ngesa, njechiidima ihamba ke wawode tewe pfo,
wandu wekelemba ili wahesha shindo,
wakaweira maho heheshia halashikie.
12Wasuṟi wa mṟi yawo waichuo wulembi,
wenyi mṟi wawo wekededa wongo,
orio kindo wadeda nyi wulembi.
13Koikyo na inyi, ngawoka iwaombotsa wanda,
na iwarumatsa kipfa kya njonyamaṟo tsawo.
14Mochilya kyaindi mochiihuda-pfo,
mochiengeṟa iliyo nyi njaa kiidi kyanu,
mkawika kisa kechiringo-pfo,
na kokooya moringa kindo njechikinyamaṟa na shida.
15Mowaya mbeu, indi mochisambuo-pfo.
Mochikama msinepfu, indi mochiṟunda na mafuda-hopfo.
Mochikama msabibu, indi mochinyo mvinyo-fo pfo.
16 Nyi muosha ofano luwicho lo mangi Omri,
na ofano luwicho lo kishari kya mangi Ahabu,
na ofano luwicho lo kishari kya mana o Ahabu,
mukaweosha makusaṟo hawo.
Ko ikyo njimuendie orumatso,
orio mndu nechimumina.
Wandu wechiwapiṟa orio handu.”
Currently Selected:
MIKA 6: KIM2
Highlight
Share
Compare
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
