YONA 2
2
Kiterewo kya Yona
1Yona katerewa Mndumii, Ruwa oke, ai ndewunyi ya ikunga lilya, 2“Kahamba,
‘Njilefihiṟia Mndumii kipfa kya ngataṟa yako,
Nao kanjiidikia;
Ngaterewa njii makidihawi ha ko wapfu,
Na iyo koicho ṟu lyako.
3Kipfa nulenjikumba kundu kuṟungukie,
Kiidi kya makidi hawi ha ipalyipalyi;
mfu fo mṟinga fukanjitengeta riti; njora tsose
masinamu hapfo na mfu ya mṟinga fopfo shileida huyako.
4Na inyi ngahamba, ‘Njimkumbe haleshe na meso hapfo,’
Indi njechiambuya njii sumhana na mba yapfo njele.
5Mṟinga fulenjitengeta, kiidi kya mrima foko.
Kulya kuṟungukie kukanjitengeta,
Kuṟeṟa ikaoṟowia mdo foko;
6Njilesoka itane ngashika wanda ya mafumvu;
Orukalo na ngapo tsalo shilenjioṟowia mlungana;
Indi koiria mrima foko fuwuka ṟungunyi,
Hoi Mndumii, Ruwa oko,
7Mrima foko fuleuma kiidi kyako,
Njilekumbuo Mndumii;
Shiterewo shako shilekushikia,
Ipfo hekalunyi lyapfo lyele.
8Wandu wekeambuya shindo sha maai na wongo,
wekelekana na osaṟio lowo wawenyi;
9Indi inyi njechikuwutia mwaano kui ṟu lyeana;
Njechiawutsiaho shaasa shako shose.
Okiṟo luwukie ko Mndumii.’”
10Mndumii kadeda na ikunga lilya, nalyo likadaika Yona wambaṟa ya ipalyipalyi.
Currently Selected:
YONA 2: KIM2
Highlight
Share
Compare
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
