HOSEA 7
7
1Ambuya kiheri njikundi ichiṟa wandu wako Israeli,
wuwicho wo Efraimu nyi wokekuloṟa,
handu hamu na mawuto mawicho ha Samaria.
Kyamba wo nyi wawuta
sha wongo, miwi nyi aifunja mba tsa wandu,
na wasoki nyi wasaṟikia,
wandu ipfo paṟepaṟenyi.
2Kii kidi wakusaṟie manya le pfo ke inyi njikumburie
mawuto hawo mawicho hose,
wulalu mawicho hawo nyi hawatengetia njora tsose,
na isho wawutie shose nyi shikeri oshangunyi loko.
Wuwicho wosamia mbenyi ya wumangi
3Ambuya nyi wachihiṟa mangi
ko mawicho hawo,
na wanene wengi ko wongo tsawo,
4wandu wa wose nyi waṟuhui,
ambuya nyi wafananyi na
iṟungu liliatse modo,
ulya mosungusia mkate alaweliatsie wokia aweriha mso,
mṟasa mkate fushimbiṟe.
5Mfiri mnene fo mangi nyi,
wekenanza wasongoru wo wawo,
ko mvinyo na mangi kawelya na waseṟeṟi .
6Ambuya chandu iṟungu lyekeaka,
nyi wudo mrima yawo ikeriaka ko mtambo;
kio taṟaṟaa, nyashi yawo, yekeduka cha mtsu,
kiheri kya ngamenyi tsikaaka cha modo fuwode ngumia.
7Ambuya wose nyi waledosa nyashi ing'anyi cha nungu ya modo,
wakawewaha wanene wawo,
na wamangi wawo wose wakaoloka,
manya kuwode ma mndu,
umu alecha injiterewa njimwikanyiepfo.
Waisraeli waikusiria mkambo ingi ya wandu
8Efraimu nakusanza na wandu wa mkambo ingi,
kawewa cha mkate fulamhalutse.
9Ambuya wahenu nyi waleonga pfinya tsake,
manya nalamanye;
mhasa ikaichuo mdonyi foke, kyaindi o aichi pfo.
10Ikudosa lya Waisraeli nyi lya waṟingishia,
manya kudo walekunda,
iwuya na ko Ruwa Mndumii owopfo,
manya impfula ko,
shindo shi shose.
11Efraimu nyi awa cha mbeta injitondo ilawode wuṟango,
kunu ikeri Misri ang'u Ashuru iterewa.
12Ambuya kiherikyo wakeri ihenda,
nyi njechiiwasotsia mdeho foko njiwaombotse,
wanda cha shilehe,
njiwakape sumuhana na mawuto hawo mawicho.
13Ochia nyi lowo kyamba nyi walenjida inyi,
ngapo na iwahoye kyamba nyi walenjidicha,
na inyi njiwekundi iwakiṟa,
kyaindi wakawoka injideda shindo sha wongo.
14Nyi walenjifihiṟia kyaindi chi ko mrimapfo,
wakawekupiṟimtsia shitaṟenyi shawo,
kundu njiadanyie shiterewo
shawo sha mso na mvinyo,
kyaindi waengeṟa injidekio inyi.
15Manya chandu njilewalosha,
na iwawanza mawoko hawo,
kyaindi wo nyi waleengeṟa,
ikusaṟa mawicho kipfa kyako.
16Ambuya, nyi walehalukia maruwa hengi,
wakawa cha uda wulekeidima iṟunda,
Wanene wawo nyi wechipfa ko oshu,
kipfa kya madedo hawo hekudosa dosa,
Kipfa kya ikyo nyi wechisalucho orukenyi lo Misri.
Currently Selected:
HOSEA 7: KIM2
Highlight
Share
Compare
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
