HOSEA 10
10
Inyamaṟo lya shindo sha wuindi sha Waisraeli
1Waisraeli nyi wawei cha msabibu mcha,
msabibu fokeṟaa ndunda.
Chandu ndunda tsikeengeṟeka,
na wudo waleengeṟa iwika marasio,
chandu oruka lowo luleengeṟa ikumbia,
nyi wudo waleengeṟa ngo tsawo tseindia.
2Mrima yawo iwenjiichuṟe ngeṟo,
Wulalu nyi kikiwaṟi wawone ngapo ya wuwicho wowo,
Mndumii-Ruwa nyi echiwunduo marasio ho hawo,
na inyamaṟa shitaṟa sho shaho.
3Kiheri kyo nyi wechihamba luwode se mangipfo,
kyamba lukeindiyase Mndumii-Ruwapfo,
a ngesa mangi nechiidima iluwutiaki?
4Ambuya kindo waideda wulalu nyi madedo ha wulya,
wakawekulisiṟa nyamu na ilya mma ya wongo,
wuhoṟotsu wukeri se wuhoṟotsupfo,
wukilohi wukaoṟa cha sangari iwode wuṟoi mdemenyi,
5Wasamaria nyi waihenda idedema kipfa kya ihache lyo lya Betheli,
wandu wake nyi wechisumukia kipfa kya ihachelyo,
wakohanyi wekemwindia nyi wechimfihiṟia,
kyamba kiṟumi kya ihache lyo kyawutoho, nyi kyasia.
6Samuyo nyi yechidao Ashuru,
ikeri itao cha okamba ko mangi ang'anyi;
Wandu wa Efraimu nyi wahenda iwado nyi sonu,
Waisraeli nyi wahenda iwado nyi sonu kipfa kya sanamu yo yawo.
7Mangi o Samaria ni echidao,
cha ikidi lidao nyi mṟinga;
8 Handu wawekeindia shifumvunyi sha Aweni,
wunyamaṟi wo Waisraeli nyi kochihenda inyamaṟo,
ambuya msha na sangari,
nyi shechioṟa marasionyi hawo,
nawo nyi wechiwia mafumvu, “Lushikie”
na shitoṟomotso, “Luolokienyi!”
Israeli nyi echisambuo kilya alewaya
9 Ambuyenyi nyo Waisraeli,
nyo nyi mulewuta wunyamaṟi wokia kulya Gibea,
mṟasa inu nyi muhenda inyamaṟa,
Nyi kya lohi shida nyi yechimumarisia ipfo Gibea.
10Ambuya njichea wandu wa wanyamaṟi njiwakape,
wandu wa mkambo ya wandu nyi wechiwaṟingichia na iwakapa,
nyi wahenda ikapo kipfa kya njonyamaṟo tsawo tsing'anyi mnu.
11Ambuya Efraimu nyi ihache lililoshe necha,
nalyo nyi likundi ikapakapa Ngano;
Kyaindi wulalu nyi njihenda iliṟika mshe nzingonyi yafo.
Yuda nyi echikuruo ikumbi lyedema o amonyi,
ee, na Yakobo nyi echikuruo ikumbi lyedemia.
12 Wayenyi wucha ko kiira kyanu,
ambuya nyi mochisambuo ikunda;
demenyi madema ho hake hasiie moo,
kyamba kiheri kyenjipfula inyi Mndumii-Ruwa kyameshika.
Na inyi njechiwaletsia mboṟa.
13Ambuya nyo mulewaya wuwicho,
mochisambuo shindo sha mkika,
nyi mochilya ndunda tsa wongo tsanu,
kyamba iyo Israeli nyi ulekusiria pfinya tsapfo kumonyi,
kowekusiria wasikari wapfo wafoi.
14Ambuya, mrundumo fo shida nyi fochichea wandu wapfo,
njomombo tso tsechirumatso,
kiwekuwia chandu Shalmani alenyamaṟa Beth-arbeli shidenyi,
kapoṟipotsa waka handu hamu na wana wawo.
15Nyi wudo kikeri iwutika konu nyo wandu wa Betheli,
kipfa kya wuwicho wo pfo wung'anyi,
na ili mandi kochikya mangi o Israeli nyi akeri henda irumatso.
Currently Selected:
HOSEA 10: KIM2
Highlight
Share
Compare
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
