WAGALATIA 5
5
1Kristo ameluashuo wusingenyi kundu lukuachie ikuachia lya lohi. Kyo kimwenenge mukuhode, mulakilekie muwuye ipfungyo-se kilamyonyi kya wusinga. 2Ambuya inyi Paulo ngambia, mukahenda idino Kristo echimtarama kindopfo. 3Ngawuya iṟingishya, orio mokunda idino nyi awodo na nawe moṟundya mawiko halya hose. 4Nyo ili muiho mokunda isumhantso nyi mawiko halya nyi momaa ikuwuta mbihu-hu fo Kristo mukaweseṟukia wutonga. 5Kipfa so ili lui wawanze nyi Mumuyo nyi luiweda luhedesumhantso nalyo lyechiwa lukuwode na Kristo. 6Cha kipfa ipfo Kristo-hu mbikye fochiapfinya-ho chi ifu fo mndu kokoya ai mdine ang'u alai mdinepfo, indi nyi ifu fo wuidiki wokusirya na Kristo wochikuhamba kui makundano. 7Muweihenda mbele necha. A nyiwu alemulema kudende mulakihendelye-se kilya kii lohi? 8Njowo yo yehomoya mbaṟi ii ingi mrimenyi yanu ii njioke nyi ichu alemlahapfo. 9 Kimombo kitutu kitarang'ae nkyo kyeketarang'a mbumba fo mso mcha fose. 10Inyi njikusirye nanyo kui Mndumii-chu ke mochiilacha mhio yanupfo. Indi ichu momfurunjia mahio o echikudaya kidehelyo kyake ma kawa wu ma wu. 11Kya indi nyo wanawawama, kokoya inyi njiweongoya-se odino nyi ki ili njiweiterengyosewo? Ikyo kiwewuta-ho kipfulutsa kilya, nkyo msalaba. 12Poo! Aiwa waimwendie okachu lu nyi ki kyaima walakutane shitendo na kamu wo wawenyi! 13Nyo mui walahe kundu mochikuachia muwenyi, wanawawama. Ikuachia lyo manya lilawe lyewikya mbaṟi ya kii nyama pfinya, kya indi muhoneryane muwenyi na wenyi mochikundana. 14 Cha kipfa wuwawaso wose wukuruwye idedonyi limu, nalyo nyilyo ilyo, kunda ichu uṟasanyi nao chando ukukundi iyo kumonyi. 15Kya indi kokoya motufuana na iimadana ke-ambuyenyi mulawone mochimeṟana muwenyi na wenyi.
Mbonyi tsa kimrima na Wuyana
16Na ngahamba, muchumie muiwaitike nyi Mumuyo, kyo kimwenenge mulechihenda yawutsya wulanga wo kii nyama. 17 Cha kipfa kilya kii nyama nyi kilehanyi na Mumuyo, na mumuyo nyi alehanyi na kilya kii nyama. Isho shi shiwi shewikyana kitumuo kikatewa mulawute iki murie iwuta. 18Indi kokoya mokaṟo nyi Mumuyo mukeri shi ya mawiko halyapfo. 19Mawuto ha kii nyama ho hamanyikye na pata chando hakeri. Naho hai cha iha, wuṟuhui, mbutie iterefutsye mrima, wukuwu. 20Wuindi woindya mfanano ya ruwa liwe na liwe, wuhanga wuwicho, shituwa, mlusano, wuṟiinganyi, wuduitsi, shiloyo, mapaṟatsano, malehano, wunyeng'. 21Wunanzi, itandaluo ndeu, na shindo shingi cha ishi, kyasho ngasonguo imbia chando njilewembia, ke wewuta wado wo wechikudaya wumangi wo Ruwa wuwe kyoṟapfo. 22Indi iki Mumuyo awikye nyi kikeri kiile, nyi mkundie, msiha, ofoṟo, wuhoo wung'anyi, wulalutsu wo kyamu, wucha wo mrima, wusalari, woloru, ikusanza lya mrima. 23Kwipfo mawiko hechidekya ishi shikeri shidipfo. 24Indi iwa wai wa Kristo Yesu wo wekekapya shii nyama shawo msalabeny hamu na wulang'a na wulanga. 25Kokoya nyi Mumuyo aluenenga moo, kyasia naso luchumie mchumie fusumhanye Mumuyo. 26Lulakushele na shindo sha maai lochianduyana na inyeng'ana luwenyi na wenyi.
Currently Selected:
WAGALATIA 5: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
