EZEKIELI 42

Mba tsiwi kufui na hekalu

1Kyasia mndu ulya kanjiduo ora lo kya nja kiidi kya mba iwei ora lo huye, kawenjiitsa na kiṟihenyi kuweisumuhananyi na handu halya haele na sumuhana na hekalu lilya ora lo huye. 2Mba i iwekeri ora lo huye nyi iwewode wuleshe wo mita (50) na wulandari wo mita (25). 3Kuwewode koṟofa tsiṟaṟu tsiwelungie mita (10) tsa mbelya mba ora lo kyamba tsikawesumuhana na sakafu mbelya mba ko ora lo nja. 4Ora lo huye lo mba i kuwewodepfo njia yeida, wulandari woyo nyi mita (5) na wuleshe woyo nyi mita (50). Mongoyo iwekeri kya ora lo huye. 5Shiṟiha shilya sha huye nyi shiweshisise kota shilya sha kiidi na shilya sha wanda kyamba nyi shiwekeri kuleshe. 6Shiṟiha shilya sha huye nyi shiweshiwike huye ya mriti manya shiweshihekie huye ya ngo tseshitarama cha mba tsilya tsiwei ipfo mbelyamba kya ora lo nja pfo. 7Ambuya nyi kuwewode omombo sumuhana na shiṟiha shilya ko ora lo nja, wuleshe wo omombo lo nyi (50). 8Kii kidi shiṟiha shilya sha mbelyamba ko ora lo kya nja nyi shiwewode wuleshe wo mita (20), shilya shiwesumuhanyi na hekalu nyi shiwewode wuleshe wo mita (50). 9Wanda ya shiṟihashi kuwewode njia iwukie ora lo ngamenyi mtsitsionyi fo mba i kokoya mndu akunda iida na pfo awukia nja, 10alya hando omombo lo nja luwokie. Ora lo kyukanyi kuwewodepfo mba ingi iṟinganyi na iya ingi ili liwei haleshe na mba iya ingi ora lo kyukanyi mtsitsionyi fo hekalupfo. 11Oshangunyi lo shiṟiha sho nyi kuwewodepfo njia yeida cha iya ya ora lo huye. Shipimo sha mba yo nyi shiwefananyi na shilya sha mba iya ingi, ofano loke na mkudosie foyo nyi fuwefananyi na iya ingi. 12Koikyo nyi kuwewodepfo mongo fo wanda na shiṟiha shilya ora lo nuka lo mba iya, mtsitsionyi fo ora lo ngamenyi alya handu omombo lulya luwokie.

13Nalyo mndu ulya kanjiwia, “Shiṟiha shi shose nyi handu haele.” Kiidi kya shiṟihashi wakohanyi wechiida oshangunyi lo Mndumii-Ruwa wechikulia shidaso shi shiele nakamu, kyamba ipfo nyipfo kundu mochiwika shidaso sha mso, shidaso shewuta wunyamaṟi na shidaso shewuta njowingo, kyamba handu ho nyi hai haele. 14Kyamba wakohanyi wakamemaa iṟunda lyawo handu hai haele, ili mandi wakundi iwuka wahende nja, nyi kiwawaṟi wakuatuo nguo tso waweṟee ili waweṟunda ipfo oshangunyi lo Mndumii-Ruwa kyamba nguwo tso nyi tsinjiele. Nyi kiwawaṟi waṟae nguo tsingi kuwoka walamewuka nja wakoyane na wandu.

Shipimo sha hekalu

15Mndu ulya ameidima ipima handu halya ha mba iya ya Mndumii-Ruwa ko kyamba nyi alenjiduo nja lukaidia mongo fulya fo ora lo ngamenyi kawepima hekalu lyo ko ora lo nja. 16Kaduo urusu lulya loke lopima, kapima nalo ora lo ngamenyi, nalo nyi luwewode mita (250). 17Kawepimase kui orusu lulya loke ora lo huye nalo luwewode wuleshe wo mita (250). 18Na wudo kawepimase ora lo nuka kui kipimo kilya kyake, nalo luwewode wuleshe wo mita (250). 19Kawehalukiase ora lo kyukanyi na kipimo kilya kyake nalo luwewode wuleshe wo mita (250). 20Kii kidi kamarisa ipima njora tsose tsa mba iya natso tsose nyi tsiwewode mita (250) njora tsose. Omombo lo nyi luleletsana kiidi kya ora lulya luele na lulya lungi.

Currently Selected:

EZEKIELI 42: KIM2

Highlight

Compare

Copy