EZEKIELI 41

1Kyasia mndu ulya kanjiduo kiṟiha kilya kya kyamba alya handu haele, kapimaho napfo nyi kuwewode wuleshe wo wanda mita (3), 2na wulandari wo mita (5). Handuho nyi kuwewode omombo njora tsose, tsiwewode wushimbi wo mita (2:5). Kawepima kiṟiha kyo king'anyi nakyo nyi kiwewode wuleshe wo mita (20) na wulandari wo mita (10).

3Kyasia kaida na kiṟiha kilya kya kyamba, kapima handu halya na wuleshe wo huye nyi wuweshikie mita (1.0) na wulandari wo mita (3:5). 4Kipimo kya kiṟiha kyo nakyo nyi kiweṟinganyi njora tsose ko wulandari wo mita (10). Kiṟihaki nyi kiwei kufui na kiṟiha kilya king'anyi nao kanjiwia handu ha nyi hai haele mnu.

Shiṟiha shiwei kufui na hekalu

5Nalyo mndu ulya kapima wulandari wo mba iya ya Mndumii-Ruwa, nawo nyi wuweshikie mita (3). Napfo nyi kuwewode shiṟiha shitutu shiweṟingichie mba iya ya Mndumii-Ruwa shiwewode wulandari wo mita (2). 6Shiṟihashi nyi shiwei kiidi kya koṟofa (3), orio koṟofa iwewode shiṟiha (30). Omombo lulya lo nja ya hekalu handu kuwode koṟofa luwei lusise kota lulya lo koṟofa ya wanda, iki nyi kundu shiṟiha shilya shiwange necha shilakusirie na omombo lulya lo hekalu. 7Kyasia koambuya njomombo tsilya tsa hekalu ko ora lo nja nyi tsihianyi ko wulandari woke wanda mṟasa huye. Sumuhana na mba iya ya Mndumii-Ruwa ipfo nja ya shiṟiha shilya kuwewodepfo ngasi yedoya huye kuwuka koṟofa iya ya wanda itane iya ya huye.

8Kyasia, ngawona hekalu lilya liwewode sakafu injiirie huye ikatengetia, na sakafu ikawa nyiyo otende lo korofa tsilya tsiṟaṟu oshangunyi lo hekalu; wuleshe wo huye wo msingi fu ko huye nyi mita (3). 9Wulandari wo omombo lulya lo nja wo shiṟiha shilya sha kyamba wuweshikie mita (12:5) mwanya fulya fo shiṟiha shilya shiweṟingichie sumuhana na hekalu 10na shiṟiha shilya sha waringi shiwewode wulandari wo mita (10) shikaweṟingichia hekalu lilya njora tsose. 11Ambuya nyi kuwewode pfo mongo iwi kiidi kya shiṟihasho yeida na nja, fumu fuweambuye ora lo huye na fungi ora lo nuka. Otende lulya luwelungie mba yo ya kulya kya nja nyi fuwewode wulandari wo mita (2:5).

Mba ya ora lo kyukanyi

12Sumuhana na hekalu lilya ora lo kyukanyi kuwewode pfo mba iwewode wuleshe wo mita (45) na wulandari wo mita (35) omombo lotso luwewode wulandari wo mita (2:5).

Shiheo shose sha hekalu

13Nalyo kapima mba iya wuleshe woyo mita (50) na kuwokia alya hekalunyi koweida ipfo huya lyo wuleshe wo mita (50), 14na wulandari wo oshangu lo hekalu lilya ora lo ngamenyi nyi mita (50), 15nalyo mndu ulya kapima hekalu lilya wuleshe wolyo kuwokia ora lo kyukanyi hamu na njomombo tsalyo njora tsose nyi tsiweshikie mita makumi hatanu (50).

Mdambuye fo mba iya ya hekalu

16Kiṟiha kilya kisumuhanyi na hekalu alya handu haele na alya handu haele mnu. 17Ishi nyi shiweshichope ko mbau tsikaweshikia wokia huye mṟasa wanda ya sakafu ipfo huye ya mongo, na ipfo kiṟiha kya kyamba na ipfo nja yakyo kose kuṟeheṟehe maṟeho hafananyi 18na mitende na tsa shiwumbe shiwode makungo. Ikidi lya mtende fumu nyi fuleitumo nyi mṟeho fo kiwumbe kiwewode makungo fukatengetia kiṟiha kyose. Orio kiwumbe nyi kiwewode njoshangu tsiwi; 19oshangu lo mndu lukoambuya mtende fulya ora lumu na oshangu lo mwiso lukoambuya ora lo kawi lo mtende fulya; nyi wudo mba i iwekeri njora tsose. 20Koikyo wokia sakafunyi mṟasa huye ya mongo fulya kuweṟeheṟehe shiwumbe shiwode makungo na mitende. 21Mafuremu ha handu halya haele haweṟinganyi njora tsose.

Rasio lya mbau

Alya oshangunyi lo mongo fulya foida handu halya haele mnu nyi kuwekeri ho kindo kifananyi 22na rasio lya mbau. Nakyo kiwewode wuleshe wo nusu mita na wulandari wo mita (1.0). Njora tso tsake na njotende tsake nyi tsiwenjisungusie ko mbau. Nalyo mndu ulya kanjiwia, “Ii nyiyo mesa ikeri oshangunyi lo Mndumii-Ruwa.”

Mongo

23Kii kidi kuwewode mongo foida na kulya hekalunyi na mongo fungi foida na handu halya haele. 24Mongo yo iwewode mbau tsiwi tseidima iweṟukia njora tsose.

25Alya mongonyi foida na kulya hekalunyi nyi kuweṟeheṟehe na shiwumbe shiwode makungo na mitende cha shilya shiweshiṟeheṟehe kulya omombonyi lo hekalu, kuwekaaho mriti huya ya mongo fulya foida na mba ora lo nja. 26Mbai na kiṟiha ki nyi kuwewode matiṟisha matutu na njomombo tsake tsinjichope ko maṟehoṟeho ha mitende.

Currently Selected:

EZEKIELI 41: KIM2

Highlight

Compare

Copy