WAEFESO 5
5
1Kikawa kido muwe mokuwaakisha na Ruwa cha wana wakunde. 2 Muchumie mhendo fuu mchilie nyi ikunda, chando nao Kristo awelukundi kahenda ikudambikya Ruwa hando helukaya-pfo so kambiia odambiko na kidaso sha opfamo sa lolo da. 3Indi wuṟuhui na wulala wose na wuehi manya wulasendo ipfo konu chando kiwari wana Ruwa. 4Ma shindo sha wuruhui na wuṟenze; ma sumu tsa wutondo ma piṟisi yepiṟa. Ishi shose shisumhanyipfo, kya indi kisumhanye mnu nyi madedo heindia Ruwa na iana. 5Nakyo nyikyo mukiichi mukamanya ke kwipfo mṟuhui oose ang'u o wulala ang'u mwehi nao moindya maruwa ha wongo awode kyoṟa ipfo wumanginyi wo Kristo na wo Ruwapfo. 6Mulawone mndu echimlemba na madedo ha wulya. Kipfa kya ishi nyashi ya Ruwa ikeri ichea wandu wa oleho. 7Ma mulawe wodoyawo wa njia ii. 8Kipfa kacha muwekeri meemenyi, wulalu mukeri sa kui ikulunga na Mndumii. Chumienyi mui wana wa sa, 9na sa yo yechiwono wuchenyi wose na wuhoṟotsunyi wose na owikonyi lo kii lohi lose. 10Mochitambahanya kilya kichihianyi na Mndumii. 11Ma mulakusanze na wewuta mawuto halai mecha, halya ha meema, kya indi muwadedye. 12Kipfa shilya shekewuto nyiwo kiṟika shiendye mndu naṟenze na ishihamba. 13Indi shose shekyuwutio senyi shimanyikie. 14Kyamba shose shawutio kundo kuwode sa. Nkyo kimaduma; kohambo “Pang'uka iyo olaa, uṟukye uukye wapfunyi, nao Kristo echikulimika.” 15Muambuye mnu nekuṟisa chando mochumia cha ili mui waṟango. Mulawe cha ili muwuṟye wuṟango. 16 Muwe mochihinja na mwaanya fo oweṟe muwode kipfa mkonu ii injiwicho. 17Nkyo kimaduma mulawe cha ili mui wadumbwo mdo, kya indi muidikyane na kilya Mndumii akundi. 18Ma mulakunanze na mpfinyo fuwode kidetsa okiio, indi muichuṟo nyi Mumuyo Mwele. 19 Mochiwiana shiimbo sha njopfundo na sha wuindi na sha wuitiki wo Mumuyo. Mowee moimbya mndumii ipfo ngoonyi tsanu na imwamtsya misinango fo wuindi. 20Anenyi Ruwa Wande maheri hose kui rina lya Mndumii odu Yesu Kristo kya shindo shose.
Waka na wamii
21Muwe mochikunyiṟyana ipfo makambenyi hanu muwodo nyi wuowu woowuo Kristo. 22 Waka wakunyiṟye wamii wawo cha ili nyio Mndumii waimhidya. 23Cha kipfa mii ai mdo fo mka chando nao Kristo ai mdo fo siṟi, o Kristo amonyi mkiṟi o siṟi ii mbihu foke. 24Chando siṟi ikunyiṟye Kristo na wudo waka wakunyiṟye wamii kui shindo shose. 25 Nyo wamii kundenyi waka wanu chando nao Kristo alekunda siṟi kawekudambikyaho mwano amonyi hando hayo. 26Kundu naitane njele echiihaṟamisha kisambyonyi kilya kya mṟinga furianyi na idedo. 27Kundu naihoṟotse oshangunyi loke amonyi ikeri siṟi ya kiṟumi ilawode mlesi ma paṟi ma ki kya shindo cha isho indi kundu iwe njele. 28Na wudo kisumhanye wasoṟo ikunda waka wawo cha mbihu yawo wawenyi. Ichu akundi mka oke nyio amonyi akukundi. (29Ma indi kuipfo mndu awesuo nyama tsake amonyipfo, kya indi nyi eketsilela na yoṟa chando nao Kristo awutie siṟi yake. 30Kyamba so lui shiwungo sha mbihu foke.) 31 Nkyo kitewe Biblia ihambie, mndu o wandu echida ndee na mae kechiwadana na mka oke, nawo wa wawi wechiwangu mbihu fumu. 32Iki nyi Kyama kikoome king'anyi inyi ngasenda nakyo Kristo na siṟi yake. 33Nanyo-da kimuwaṟi kui mndu kui mndu orio ose nakunde ado mka oke cha ili akukundi amonyi. Indi mka nahende yowuo mii.
Wana na wafee wawo
Currently Selected:
WAEFESO 5: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
