WAEFESO 2
2
1 Kyanu nyo muwei opfunyi lo madeko na manyamaṟo hanyu. 2Muwehendekye mukuwode naho kui wuitiki wo wuyana wo kiiwulalu kya wuyana wu na wo moapfinya aiapfinya mumuyonyi, nyio moweṟu ulya echikupaya na wandu walaidikye na wulalu da. 3Natso loose luwei chawo luweichumia lui na lango tsa nyama tsadu lochikupaya na wuitiki wo nyama na wo mahio, naso luwei wandu wapfulutsye nyashi kui mbaṟi cha walya wengi. 4Indi o Ruwa molunga isaṟia ili awelukundi na mkundie fung'anyi fudo. 5Kaluwika so moo fumu na Kristo matika halya luwei wapfu kui manyamaṟo nyi mui wakiṟe kui wutonga wo Ruwa. 6Hamu na Yesu Kristo kawemṟutsa kechimdamiṟa kifumbinyi kimu na Kristo ipfo ruwehu. 7Nyi wudo aleloṟa wandu wa maheri halya haitikiria mfeṟa welu fo wutonga woke kui wucha iwu ailuwutya so lui walungye Kristo Yesu. 8Cha kipfa mui wakiṟe kui wutonga kui njia ya wuidiki. Lyo lilewutika kui pfinya yanupfo; nyi kisumbo kya Ruwa. 9Chi mawuto hanu haweliendepfo, kundu manya mndu nalakuwutye-ho ikuṟumisha. 10Kipfa so lui owiko Ruwa; lulewumbyo Kristo Yesu kundu lochiwuta mawuto mecha iho Ruwa alesonguo ihaṟeheṟa kundu luhende ikupaya naho.
Wumu kiidi kya Kristo
11Kusaṟenyi, ke ili kacha muwei mkambo ya wandu wai nyamenyi, muwesendo mulai wadine nyi wayuda wekyekuhamba walya wa odino nalo lui lo mbaṟi iya yekewuto nyamenyi tsa mndu kui owoko. 12Matika halya nyo muwei na Kristo-pfo, muwei wahenu ipfo mengenyi ya Israeli muwedamye mbai ya mbukaho ya kiteṟyo kilya mulawei na kindo muwei, muwei iya wuyana mulawekuwode na Ruwa. 13Indi wulalu ipfo Kristo-hu Yesu, nyo ili kacha muwei wa kuleshe momecha wa afui kui samu ya Kristo. 14Kipfa nyio ai ofoṟo lodu msanzi mosanza Wayuda na wandu wa mkambo ingi wawe wamu kedmya mfo fulya fuwei tunja fuwewika kituwa kilya. 15 Na ipfo mbihu-hu foke kawewuta nafo wuwawaso wulya wuwei wo mawiko ha wuitiki echiitsa-pfo ofoṟo. 16 Kundu wa njora tsi tsiwi nawawike mbika imu ii ya Kristo amonyi ya mndu mhya nawewaoloṟya wa njora tsi tsiwi Ruwa ipfo mbihu-hu fumu kui msalaba echiwaha na mweke fofo kituwa kilya. 17 Nao Kristo nalecha ado echimwongoya mbonyi ya Sia ya ofoṟo nyo muwei wa kuleshe na Ruwa Kaweongoya ofoṟo lu na Wayuda walya wawei wa afui na Ruwa. 18Kyamba nyio lumbode ai moluitsa na ko Ruwa so wa njora tsi tsiwi Wayuda na wa mkambo ingi kui Mumuyo chu umu. 19Nkyo kyainenga nanyo mulakikeri-se wahenu ma wasami, indi mui wa mṟinyi fumu na waele mui na wa kanyi ko Rṟuwa. 20Mui wawike kiwanje-hu kikiwikye nyi wasu na waikimbi, ipfo kundu Kristo Yesu akukerye-pfo iho lya ndumba mowanza kyose. 21Nyio ai mopfunga mbika ya mba yose yechingana ikeri hekalu yele kui Mndumii. 22Kui ikulunga nao, nanyo da mochiengeṟyo-ho napfo ipfo mbikenyi muwe kanyi ko Ruwa kui Mumuyo.
Currently Selected:
WAEFESO 2: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
