AMOSI 2
2
Moabu
1 Iha nyiho Mndumii ahamba; Kwi madeko haṟaṟu ha Moabu, ee, kipfa kya haana, njechiima nyashi yako ilechimhoyapfo; kipfa nalekoṟa modo mafuo ha mangi ya Edomu mtano hawa ifu lyiili, 2Kyaindi njechidika modo huye ya Moabu, nafo fochirumatsa mamba ha Kerioti; na Moabu nyepfa kipfa kya mtiṟi, na kifahiyo kya maṟu ha membe. 3Na inyi njechiwutapfo walaanyi na wachili wawuke kiidi kyawo; njiwewaaha wasongoru wose kiidi kyawo, ikyo Mndumii ahamba.
Yuda
4Iha nyiho Mndumii ahamba; Kwi madeko haṟaṟu ha Yuda, ee, kipfa kya haana, njechiima nyashi yako ilechimhoyapfo; kipfa waleleha chila ya Mndumii; manya walewada wuwawaso wokepfo; madedo hawo ha wongo halewadetsa, iho wandeawo walehaosha; 5kyaindi njechidika modo huye ya Yuda, nafo fochirumatsa mamba ha Yerusalemu.
Mwanduye fo Ruwa huya Israeli
6Iha nyiho Mndumii ahamba; Kwi madeko haṟaṟu ha Israeli, ee, kipfa kya haana, njechiima nyashi yako ilechimhoyapfo; kipfa walekumba walya wasumhanyi kwi fesa, na wahuṟi kwi mṟaaye fumu fo shaadu; 7wakawefola-fola kiluli kikeri mdohu fo wakiwa, na idetsa ohendo lucha lo wai wahoo; mndu na ndee wakawekaa na mndumka umu, itane rina lyako lyafana ngafu nalyo lyi Yele; 8wo wekelaaya nguo tsilya wandu walesoko, na ipfo rasionyi lya ruwa owo inyo wekyenyo olea luiluhuṟe na fesa tsilya tsilewoneka ipfo kikumbyonyi kya wandu. 9 Ambuya, inyi njilewerumatsa Waamori oshangunyi lowo, ichu awei mleshe cha mweresi, nawewode pfinya iṟihishye cha mwalonyi; kamkuṟuo cha ili uikuṟuo ikidi na mri yalyo. 10Ngoseṟa njilewadosa wuka orukenyi lo Misiri, ngawateteṟa maaka makumi haana kulya nuka, kundu mwitoṟie oruka lo Mwaamori. 11 Ngawewuta wandu kiidi kyanu kiidi kya wana wanu wawe waikimbi, kiidi kya wanake wawe wewika kyaasa chi wudo nyo wana wa Israeli? Ikyo nyi Mndumii ahamba. 12Indi muleinenga walya waele watengo mvinyo wanyo; mukawia waikimbi walya, mlawone moihamba shisuku.
13Ambuyenyi, njechimulemya,
chandu igari lyekyelemio nyi mkunja kulawonekeho mwanya.
14Na icho aidicha ekooya kidichionyipfo;
Manya icho aichi ikapa mteeṟa pfinya yake yesia;
Ichu akuhodye echiidima ikiṟa moo fokepfo.
15Ichu alemye wuda echihoṟokapfo;
Manya ichu awode madende maangu ekiapfo;
modoya frasi echikiṟa mrima fokepfo;
16Na ulya awode ngoo njikari kiidi kya wandu
wai mbahanyi, nechidicha kitaaṟe mkonu fo,
nyi Mndumii ahamba.
Currently Selected:
AMOSI 2: KIM2
Highlight
Share
Compare
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
