AMOSI 1

Mwikimbi Amosi

1 Madedo ha Amosi, umu o walisi wa Tekoa; mbonyi aleloṟo na iwona kiidi kya Israeli; kiheri kya Uzia, mangi ya Yuda, kiheri kya Yeroboamu, mana o Yoasi, mangi ya Israeli, maaka iwi kidinashi kilameida.

2 Nao nalehamba

“Mndumii nechikoṟoṟoma awuka Sioni,

Ru lyake lyechiichio wokia Yerusalemu;

Shilya shiiliso nyi walisi shechifuha,

Na alya owerihu ko Karmeli kochinaa.”

Mwanduye fo Ruwa mkambo ya mṟasenyi Damasko

3 Iha nyiho Mndumii ekehamba; Kwi madeko haṟaṟu ha Damasiko, ee, kipfa kya haana, njechiima nyashi yako ilechimhoyapfo, kipfa nyalesa Gileadi na shoombo shesea sha menya; 4kya indi njechidika modo fuide kiidi na mba ko Hazaeli, nafo fochirumatsa mamba ha Ben-hadadi. 5Na inyi njechifunja ngiṟi ya Damasiko na iwarumatsia wenyi wa pichi lya Aven kuleshe, na icho awode ndichi ya wuitoṟi ipfo Bet-Adini; na wandu wa Shamu wedao wai wapfunge itane Kiri, nyi Mndumii ahamba.

Filistia

6 Iha nyiho Mndumii ahamba, Kwi madeko haṟaṟu ha Gaza, ee, kipfa kya haana, njechiima nyashi yako ilechimhoyapfo; kipfa waleduo oshari loose lo wandu wai wapfungo, wawawike mawokonyi ha Edomu; 7Indi njechidika modo huye ya omombo lo Gaza, nafo fochirumatsa mamba hake. 8Njechikombetsa wandu wose wa Ashdodi kuleshe; na ichu awode ndichi ya wuitoṟi kiidi kya Ashkelonyi; na inyi njechihaluo owoko loko lukae huye ya Ekronyi; na mtsuhaṟo fo Wafilisti walya njechiwarumatsa, Mndumii-Ruwa ahamba.

Tiro

9 Iha nyiho Mndumii ahamba, Kwi madeko haṟaṟu ha Tiro, ee, kipfa kya haana, njechiima nyashi yako ilechimhoyapfo; kipfa waledambika kishari kyose mawokonyi ha Edomu, manya walakumbuo mma fo mndu na odoe; 10Kyaindi njechidika modo huye ya omombo lo Tiro, nafo fochirumatsa mamba hake.

Edomu

11 Iha nyiho Mndumii ahamba; Kwi madeko haṟaṟu ha Edomu, ee, kipfa kya haana, njechiima nyashi yako ilechimhoyapfo; kipfa nyi aleosha manomae na oshu, alakunde imiichiyo wukiwa, kaduiko nyashi, karihinyika mnu, 12kyaindi njechidika modo fuakie Temanyi, fochirumatsa mamba ha Bosra.

Amoni

13 Iha nyiho Mndumii ahamba; Kwi madeko haṟaṟu ha wana wa Amonyi, ee, kipfa kya haana, njechiima nyashi yako ilechimhoyapfo; kipfa waleranduo waka wanene wa Gileadi na oshu kundu watikire mṟasa yawo; 14kyaindi njechiatsa modo omombohu lo Raba, nafo furumatse mamba hake; hamu na kifahiyo kya mkonu fo shida, hamu na tuṟukumbi ya mkonu fo kiwira; 15na Mangi owo nedao wusingenyi, oo na wachili wake wose, ikyo nyi Mndumii ahamba.

Currently Selected:

AMOSI 1: KIM2

Highlight

Compare

Copy