1 WAKORINTO 14
14
1Lalakyenyi mkundie fu muwe mochilanga shisumbo sha Mumuyo, indi kilya kii kinene nyi kundu muhendetambahaluya. 2Kyamba ichu modeda mdedya Ruwa. Kyamba kulaipfo mndu moicho, indi awa modeda sha kisenyi kui Mumuyo. 3Kya indi ichu motambahaluya nyi adedya wandu kyewaholotsa na iwaṟamtsa na iwakarisha. 4Ichu aideda mdedye fo shiṟuma nyi ekekuholotsa amonyi, indi motambahaluya o awa moholotsa siṟi. 5Na inyi njiwekundi muwededa mdedye ya shiruma nyo mose, kya indi kilya njiwekundi kya wueṟa nyi kundu muwewa wetambahaluya. Kyamba icho motambahaluya nyi mnene kota ichu modeda mdedye fo shiṟuma kulawode awa na moshidambuya, siṟi ikuwutye-ho iheda holotso. 6Alewo wanawawama, kokoya ngamchea njededa mdedye shiṟuma nyi kiira kiki njembonya ngamda ndadeda nanyo otambahaluyo ang'u wulaanyi ang'u odambuyo ang'u mapfundo. 7Ma koka nyi shindo shilai na moo ili shalekya maṟu kiwe nyi mtoṟiṟo kiwe nyi kinubi (nyi wuda lyekapa lii na ndusu mfungade), shilamlekya maṟu hailachanyi kechimanyika kida ke nyi kiimbo kiki kikapo nyi mtoṟiṟo ang'u nyi kinubi? 8Kyamba na ombe lo shida koka lolekya ṟu lilamanyikye nyi o ku echikuṟehyeṟa kya ihenda kiwahanyonyi? 9Shi wudong'u nanyo na mdedye fonu fo shiṟuma, kokoya modeda lilamanyikye, nyi wuda kochimanyika-ho kilya kiidedo ngesa? Kyamba moewa wededa mkume-hu tupu. 10Kunu wuyana kuwode mdedye ya mbaṟi sa tsifo, manya kulaipfo ma fumu fulatambahaluka. 11Kyasia-ng'u komkoya ndamanya mhambye fo kishomo kilya njechiwiia mokideda ulya ndaicho, nao modeda ulya echinjiwiia inyi mndaicho. 12Na wudo nanyo ili mulalakye mudo sha mumuyo kundenyi ilanga sheholotsa siṟi mushike isuṟyo. 13Nkyo kimaduma ichu modeda fo shiṟuma naterewe-ng'u nainengo pfinya yedambuya. 14Kyamba kokoya ngaterewa kui shiṟuma nyi mumuyo foko fuiterewa-ho indi mhio foko fulawika kindo. 15Akashika nyi kyawa-se kida? Nyi njechiterewa kui mumuyo, njiweterewa na kui mhio; njichiimba kui mumuyo njiweiimba na kui mhio. 16Cha kipfa kokoya iyo oterewa kui mumuyo ochiana na ichu adamya kidembo-hu kya mndu alaichi nyi echiidikya kindo uihamba? 17Kyamba iyo ee nyi uiana necha, kya indi ulya ungi akuwutia-ho ihenda iiropfo. 18Inyi ngaana Ruwa kimaduma nyi njekededa fo shiṟuma ngamweṟa nyo mose. 19Kya indi ipfo kundo siṟi iisanze ngakukundika ideda ma madedo cha hatanu kui mhio foko hawe hechilosha wengi kota ideda madedo kiku kui shiruma shilya. 20Wanawawama, ma mulawone mochiwa wana kui wutichi wotichia mbonyi muwe wandu watimye. 21 Ipfo wuwawasonyi kuu-kuṟehye kuile; Njechideda na mkambo fu kui mweke fo wenyi-shishomo shingi na kui momu ya wahemu; manya waidedyo wado wechinjiichopfo. Mndumii nyi wudi ahambye. 22Nkyo kyaenenga mdedye ya shiṟuma yawa kichano chi kya waidikipfo kya indi nyi kyemanyisha walaidikye; indi odambukyo lulya lo lukerye chi walaidikyepfo kya indi walya waidikye. 23Kyasia-ng'u kokoya siṟi yose isanzi handu hamu na wose washike ideda kui shiṟuma kishika kukaida napfo wandu walaichi ang'u nyi walaidikye alae chi wechihamba nyi wusuko wumbode? 24Kya indi kokoya wahoya idambuya wose kukaida napfo mndu alaidkiye ang'u alaichi mbonyi nyi ahenda idedyo nyi wose, 25na ihenda iwonyo owingo na pata, na wudo echiho wanda kewikya Ruwa wuindi na ihamba na pata ke Ruwa asanganyi na nyo.
Chile tsa siṟi
26Alewo wanawawama, nyi kukuwukyeho ki? Orio mandi mosanza handu hamu nyi orio mndu onu awode kiimbo ang'u opfundo ang'u otambahaluyo ang'u shiṟuma ang'u odambuyo; isho shose shitanyike shewembesha kiwimbi. 27Kokoya mndu adeda kui shiṟuma wadede wawi washika ifo wawe waṟaṟu nahong'u, nawo wadede kui makamba, na umu nashidambuye. 28Kya indi kokoya kulaipfo modambuya nakutsie ipfo kisanzyonyi nakudeye kikoke amony ai na Ruwa. 29Indi waikimbi wadede wawi ang'u waṟaṟu na wengi watambahaluo. 30Kya indi sa adambye kamanyisho idedo, ulya o kuwoka nahende itsia. 31Kyamba nyi moidima iikimba nyo mose umu umu wawuteho ikulosha wose na ihenda wihiṟyo moo wose. 32Nayo mumuyo ya waikimbi nyi yekaa yechiidikya waikimbi. 33Kyamba Ruwa alai o mtandawuko kya indi nyi o ofoṟo. 34Kiwe chando kikeri ipfo siṟinyi tsa waele tsose ke waka watsie ipfo shisanzyonyi sha siṟi, kyamba walai-waenenge momu fodeda kya indi wawe wenyi-wuindi chando nawo wuwawaso wohamba. 35Wakakunda ikulosha kindo wawese wamii wawo kulya kanyi kowo kyamba nyi kiendye mndu mka sonu ili adeda kisanzyonyi kya siṟi. 36Alae nyi ipfo konu dedo lya Ruwa lipaṟikye ko? Ang'u nyi konu kwenyi likushikye ko? 37Kokoya kwipfo ahamba ke nyi ai mwikimbi ang'u mndu o mumuyonyinahoneṟye ishi ngamuṟehya nyo ke shikeri sha mawawaso ha Mndumii. 38Indi kokoya mndu akileha nyi ahenda ileho. 39Ili kyamba kido, wanawawama, muitike ihenda dambuya, na ideda kui shiṟuma mulaiime. 40Indi shose shitanyike kui wuindi na ki osenge.
Iṟuka lya Kristo
Currently Selected:
1 WAKORINTO 14: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
